សិស្សានុសិស្ស មកពីបណ្ដាសាលាបឋមសិក្សាក្នុងក្រុងសៀមរាប ប្រមាណ ៣០នាក់ បានចូលរួម
ការប្រឡងប្រជែងអានអត្ដបទ និងស្មូតកំណាព្យក្នុងពិធីបុណ្យទន្លេលើកទី៨ ក្រោមប្រធានបទ”ទន្លេដើម្បីសន្ដិភាព និងការអភីវឌ្ឍ” បានចាប់ផ្ដើមហើយ នៅថ្ងៃទី១៥ ខែមីនានេះ។
លោកស្រី ឈុយ វ៉ាន់ថា អនុប្រធានការិយាល័យបឋម នៃមន្ទីរអប់រំយុវជន និងកីឡាខេត្ដសៀមរាប បង្ហាញថា ការប្រឡងប្រជែងអានអត្ដបទ និងស្មូតកំណាព្យនេះ មានសិស្សានុសិស្សចំនួន ៣០នាក់ មកពីតាមកសាលាកម្រងបឋមសិក្សាក្នុងក្រុងសៀមរាប និងធ្វើការបែងចែករយៈពេល ៣ថ្ងៃ ដោយក្នុងមួយថ្ងៃ ត្រូវបានជ្រើសរើសយកជ័យលាភីចំនួន៣នាក់ ក្នុងចំណោម១០នាក់។ ខ្លឹមសារនៃការអានអត្ដបទ ពាក់ព័ន្ធនឹងសក្ដានុពល និងអត្ដប្រយោជន៍នៃបឹងទន្លេសាប ដោយបេក្ខជនម្នាក់ៗ ត្រូវបានគណៈកម្មការវាយតម្លៃដាក់ពិន្ទុទៅលើឥរិយាបថ អក្ខរាវិរុទ្ធ ការលើកដាក់សំឡេង ស្របតាមក្បួនវេយ្យាករណ៍។ លោកស្រីបន្ដថា ការប្រឡងនេះ ការប្រឡងប្រជែងអត្ដបទនេះ ដើម្បីជម្រុញឱ្យសិស្សានុសិស្សាចូលចិត្ដអានសៀវភៅ ព្រោះមួយរយៈនេះ សិស្សានុសិស្សមិនសូវអានសៀវភៅនោះទេ ខណៈដែលបច្ចុប្បន្ននេះ ការអានរបស់សិស្សទៅលើតែប្រពន្ធឌីជីថល ។
សូមបញ្ជាក់ថា ការប្រឡងប្រជែងអានអត្ដបទ និងស្មូតកំណាព្យនេះ ធ្វើឡើងរយៈពេលបីថ្ងៃ ចាប់ពីថ្ងៃទី១៥ដល់ថ្ងៃទី១៧ខែមីនាឆ្នាំ២០២៤នេះ ដែលមានបេក្ខជនចំនួន៣០នាក់ មកពីសាលាកម្រងបឋមសិក្សាវត្ដបូព៌ សាលាកម្រងបឋមសិក្សាវត្ដចក និងសាលាកម្រងបឋមសិក្សាមុខនាគ។ជាមួយគ្នានោះ ក្នុងរយៈពេលបីថ្ងៃ ក៍បានបើកទូលាយដល់អ្នកទេសចរជាតិ និងអន្ដរជាតិ ឱ្យចូលរួមអានអត្ដបទផងដែរ ដោយមានទាំងភាសាខ្មែរ និងភាសាបរទេស ចាប់ពីម៉ោង៨ព្រឹកដល់ម៉ោង៧យប់ ដើម្បីអបអរពិធីបុណ្យទន្លេលើកទី៨។ព្រឹត្ដិការណ៍ដ៍អស្ចារ្យមួយនេះ នឹងចូលរួមចំណែកជំរុញកំណើនភ្ញៀវទេសចរ និងបង្កើនការផ្សព្វផ្សាយសក្ដានុពលខេត្ដសៀមរាប និងខេត្ដនៅតាមបណ្ដាដងទន្លេប្រទេសកម្ពុជា ព្រមទាំងជួយជំរុញផ្សព្វផ្សាយផងដែរនូវភាពសំបូរបែបនៃអនុតំបន់មេគង្គ៕
អត្ថបទ និងរូបភាព៖ បូ សាវី
កែសម្រួល៖ សេង ផល្លី
