ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា តាមការព្យាករណ៍ កម្ពុជានឹងទទួលបានភ្ញៀវទេសចរអន្តរជាតិ ចំនួនប្រមាណ ៦.២ លាននាក់ នៅឆ្នាំ២០១៨ និង ចំនួន៧លាន នាក់នៅឆ្នាំ២០២០ ដែលនាំមកនូវចំណូលប្រមាណ ៥ពាន់លានដុល្លារ ព្រមទាំងបង្កើតនូវឱកាសការងារដល់ពលរដ្ឋចំនួន ១ លាននាក់ ហើយនៅឆ្នាំ២០៣០ កម្ពុជានឹងទទួលបានភ្ញៀវទេសចរណ៍អន្តរជាតិចំនួន ១៥ លាននាក់ ដោយនាំមកនូវចំណូលសរុប ១ម៉ឺនលានដុល្លារ ព្រមទាំងបង្កើតនូវឱកាសការងារដល់ពលរដ្ឋចំនួន ២ លាននាក់ ។
ឯកឧត្តមបណ្ឌិត ថោង ខុន បានមានប្រសាសន៍ទៀតថា ដើម្បីត្រៀមទទួលស្វាគមន៍ភ្ញៀវទេសចរណ៍អន្តរជាតិចំនួន ៧ លាននាក់ នៅឆ្នាំ២០២០នោះ ជាយុទ្ធសាស្ត្រ យើងប្តេជ្ញាចិត្តក្នុងការបន្តអភិវឌ្ឍន៍វិស័យទេសចរណ៍កម្ពុជា ជាគោលដៅទេសចរណ៍ស្អាត និងបៃតង ប្រកបដោយភាពទាក់ទាញ និងផ្តល់ភាពកក់ក្តៅដល់ភ្ញៀវទេសចរ ដោយឈរលើលក្ខណៈពិសេសនៃអច្ឆរិយៈភាព នៃប្រាសាទអង្គរ ប្រាសាទព្រះវិហារ ពិសេសប្រាសាទសំបូរព្រៃគុក ដែលថ្មីៗនេះ ទើបត្រូវបានចុះក្នុងបញ្ជីបេតិកភណ្ឌពិភពលោករបស់អង្គការ UNESCO សម្បត្តិបេតិកភណ្ឌទាំងរូបី និងអរូបី សម្បត្តិធនធានធម្មជាតិ ឆ្នេរសមុទ្រដ៏ស្រស់ស្អាត សម្រស់ទន្លេមេគង្គ ម្ហូបអាហារប្រពៃណី ការរស់នៅប្រកបដោយភាពញញឹមរួសរាយរាក់ទាក់ពីធម្មជាតិរបស់ប្រជាជនខ្មែរ ស្របនឹងការប្រសិទ្ធនាម “ កម្ពុជា ព្រះរាជាណាចក្រអច្ឆរិយៈ ប្រកបដោយភាពកក់ក្តៅ” (Cambodia: Kingdom of Wonder Feel the Warmth)។
ឯកឧត្តមបណ្ឌិត ថោង ខុន មានប្រសាសន៍បែបនេះ ក្នុងឱកាសរៀបចំពិធីទទួលពានរង្វាន់ ប្រាសាទអង្គរវត្តជាសំណង់ប្រវត្តិសាស្ត្រដ៏អស្ចារ្យបំផុតលើពិភពលោក សម្រាប់ឆ្នាំ២០១៨ ពីទីភ្នាក់ងារប្រឹក្សាយោបល់ក្នុងការធ្វើដំណើរ (Trip Advisor) នៅមុខប្រាសាទអង្គរវត្ត កាលពីរសៀលថ្ងៃទី០៩ ខែសីហា ឆ្នាំ២០១៨ម្សិលមិញនេះ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
