ពិធីស្រង់ព្រះច្រើនធ្វើឡើងនៅថ្ងៃទី៣ ថ្ងៃចុងក្រោយ នៃពិធីចូលឆ្នាំខ្មែរ ដែលត្រូវនឹងថ្ងៃឡើងស័ក។ យ៉ាងណាម៉ិញ នៅរសៀលថ្ងៃទី១៦ខែមេសាឆ្នាំ២០២៤ ត្រូវនឹងថ្ងៃឡើងស័កនៃពិធីបុណ្យចូលឆ្នាំប្រពៃណីជាតិខ្មែរឆ្នាំរោងឆស័ក ពុទ្ធសករាជ២៥៦៧ឈានចូល២៥៦៨ រដ្ឋបាលខេត្តសៀមរាប សហការជាមួយសហភាពសហព័ន្ឋយុវជនកម្ពុជាខេត្ត ដឹកនាំដោយ ឯកឧត្តម ប្រាក់ សោភ័ណ អភិបាលនៃគណៈអភិបាលខេត្ត និងជាប្រធានសហភាពសហព័ន្ឋយុវជនកម្ពុជាខេត្តសៀមរាប និងលោកជំទាវ ឯកឧត្តម អ៊ាន ឃុន ប្រធានក្រុមប្រឹក្សាខេត្ត រួមជាមួយសមាជិក សមាជិកាក្រុមប្រឹក្សាខេត្ត គណៈអភិបាលខេត្ត ព្រមទាំងថ្នាក់ដឹកនាំ អង្គភាពមន្ទីរស្ថាប័ន សហភាពសហព័ន្ឋយុវជនកម្ពុជាខេត្ត បាននិមន្តព្រះសង្ឃសូត្រជ័យន្តោធ្វើពិធីស្រង់ព្រះដែលរៀបចំឡើងនៅប៉ែកខាងជើងព្រះវិហារព្រះអង្គចេកព្រះអង្គចម ក្នុងក្រុងសៀមរាប អនុលោមទៅតាមប្រពៃណីទំនៀមទំលាប់ប្រពៃណីខ្មែរដែលមានជាយូរលង់មកហើយ។
តាមប្រសាសន៍លោកតាអាចារ្យក្នុងពិធីថា៖ពិធីនេះប្រជាជនខ្មែរតែងប្រារព្ធធ្វើឡើងមិនដែលដាច់នៅពេលចូលឆ្នាំខ្មែរម្ដងៗ និង មានជំនឿតៗគ្នាមកយូរហើយថា ស្រង់ព្រះទាំងព្រះបដិមាថ្ម និង ព្រះរស់ សុទ្ធតែទទួលបានមកវិញនូវសេចក្ដីសុខចម្រើន ត្រជាក់ត្រជុំ។
លោក អាចារ្យរៀបរាប់ថា៖ ថ្ងៃសង្ក្រាន្តថ្មីជិត មកដល់ព្រះបាទបសេនទិកោសលបាន រៀបចំជាបារាំយ៉ាងល្អវិចិត្រនៅឆ្នេរស្ទឹង មួយ ហើយក៏និមន្តព្រះពុទ្ធ និងព្រះសង្ឃ ស្រង់ទឹករួចសមាទានសីល រួចប្រគេនភត្តាហារចំពោះព្រះពុទ្ធព្រមទាំងភិក្ខុសង្ឃ ដែល គង់នៅទីនោះផង។ អ្នក ដែលបានស្រង់ទឹកព្រះសង្ឃ មាតាបិតា គ្រូ ឧបជ្ឈាយ៍ទទួលបានផលានិសង្សច្រើន ណាស់ ហើយអនាគតជាតិនឹងបានទៅ កើតក្នុងឋានទេវលោកបានសេចក្តីសុខ គ្រប់បែបយ៉ាង។ដោយសារមានជំនឿ និងទំនៀមទម្លាប់ របស់ដូនតាយើង ដូច្នេះហើយទើបបាន ជាប់ជាប្រពៃណីរហូតមកដល់សព្វថ្ងៃនេះ ឲ្យតែដល់ពេលចូលឆ្នាំថ្មីម្តងៗគេតែតែង ធ្វើពិធីស្រង់ទឹកពុទ្ធរូប ព្រះសង្ឃ មាតាបិតា ជីដូនជីតានៅតាមទីអារាម និងភូមិស្រុក នានា។
បើតាមទិដ្ឋភាពជាក់ស្តែង ប្រជាពលរដ្ឋខ្មែរដែលគោរពជឿលើព្រះពុទ្ឋសាសនាទូទៅតែងតែស្រោចទឹកជូនអ្នកមានគុណដែលគេនិយមហៅថា ស្រង់ព្រះរស់ និងស្រង់ព្រះនៅតាមទីអារាមនានា អំឡុងពិធីបុណ្យចូលឆ្នាំថ្មី ដើម្បីជាកិច្ចតបគុណ រំឭកដល់ការលះបង់ដ៏ធំធេងរបស់ឪពុកម្តាយក្នុងការចិញ្ចឹមបីបាច់ថែរក្សាកូនចៅគ្រប់រូបទម្រាំចម្រើនវ័យ មានសម្ថភាពពេញលេញអាចគ្រប់គ្រងជីវិតខ្លួនឯងបាន ជារៀងរាល់ឆ្នាំអំឡុងពិធីបុណ្យចូលឆ្នាំថ្មីឈានចូលមកដល់ ។នេះជាពិធីបែបសាសនាប្រពៃណីទំនៀមទម្លាប់ខ្មែរដ៏មានប្រជាប្រិយភាព និយមធ្វើនៅ ថ្ងៃទី៣នៃបុណ្យចូលឆ្នាំខ្មែរ ដោយអ្នកប្រតិបត្តិតាមពិធីនេះគេគិតដល់គុណប្រយោជន៍នៃទឹកជាធាតុត្រជាក់ ពេលស្រោចទៅលើនរណាម្នាក់អាចធ្វើឲ្យអ្នកទទួលទឹកនោះ ត្រជាក់កាយសប្បាយចិត្ត ស្រស់ស្រាយក្នុងអារម្មណ៍ ហើយក៏ជូនពរត្រលប់មកអ្នកប្រារព្ធរៀបចំពិធីនោះវិញដែរ។ចំណែកឯមាតាបិតា ចាស់ព្រឹទ្ធាចារ្យ ឬអ្នកមានគុណ កូនចៅមកស្រោចទឹក ឬងូតទឹកដុសក្អែលឲ្យ ក៏ដើម្បីបង្ហាញពីការដឹងគុណ និង ឲ្យបានត្រជាក់ ពីឆ្នាំចាស់ផ្លាស់ឆ្នាំថ្មី ទាំងអស់គ្នាផងដែរ៕
អត្ថបទ និងរូបភាព៖ លោក យូ វង្ស
