គម្រោងជុសជុលផ្លូវដីសក្រាលគ្រួសក្រហមចំនួន ២ខ្សែ ស្ថិតនៅក្នុងឃុំត្រាំសសរ ស្រុកស្រីស្នំ ខេត្តសៀមរាប ត្រូវបានប្រកាសបិទបញ្ចប់ការដេញថ្លៃដោយជោគជ័យ នៅព្រឹកថ្ងៃទី១៨ ខែមេសា ឆ្នាំ២០២៤នេះ ដោយមានការចូលរួមពីអ្នកពាក់ព័ន្ធជាច្រើនរូប។
លោក ព្រឿង តាន់រ៉ាវុធ តំណាងទីចាត់ការផែនការវិនិយោគ សាលាខេត្តសៀមរាប បានបញ្ជាក់ថា ចំពោះក្រុមហ៊ុន ឬអ្នកម៉ៅការដែលមានបំណងចង់ដាក់សំណើរដេញថ្លៃ គឺត្រូវភ្ជាប់សំណើដេញថ្លៃរបស់ខ្លួនជាមួយនឹងប័ណ្ណពន្ធប៉ាតង់ដែលមានសុពលភាព និងត្រូវតម្កល់ប្រាក់កក់ធានាការអនុវត្តចំនួន១០ភាគរយ នៃតម្លៃកិច្ចសន្យា ហើយអ្នករដេញថ្លៃទាំងអស់ត្រូវចូលរួមដេញថ្លៃប្រកបដោយការប្រកួតប្រជែង ដោយគ្មានការឃុបឃិត គ្មានការក្លែងបន្លំ ការបង្ខិតបង្ខំ ឬការប្រព្រឹត្តអំពើពុករលួយឡើយ។ បើត្រូវបានរកឃើញថា អ្នកដេញថ្លៃណាមួយមានការពាក់ព័ន្ធនឹងការឃុបឃិត ក្លែងបន្លំ ការបង្ខិតបង្ខំ ឬការប្រព្រឹត្តអំពើពុករលួយណាមួយ នោះអ្នកដេញថ្លៃនោះនឹងត្រូវបានដាក់ក្នុងបញ្ជីខ្មៅជារៀងរហូត និងមិនត្រូវបានអនុញ្ញាតឱ្យដាក់សំណើដេញថ្លៃកិច្ចសន្យាឃុំសង្កាត់ទាំងអស់ នៅទូទាំងប្រទេសកម្ពុជា។
លោក ឡាត ស៊ើប ប្រធានគណៈកម្មការលទ្ធកម្មឃុំត្រាំសសរ បានឲ្យដឹងថា សម្រាប់គម្រោងមូលនិធិឃុំឆ្នាំ២០២៤នេះ ឃុំត្រាំសសរ បានដាក់ដេញថ្លៃគម្រោងជុសជុលផ្លូវដីសក្រាលគ្រួសក្រហមចំនួន ២ខ្សែ ដែលមានប្រវែងសរុប ១.៣៦៥ម៉ែត្រ ដែលនឹងត្រូវជុសជុលនៅក្នុងភូមិនាងស្រោងចំនួន ៥០០ម៉ែត្រ និងភូមិធ្លកចំនួន ៨៦៥ម៉ែត្រ ដែលមាន ៤ទទឹង កម្រាស់ ០.១៥ម៉ែត្រ និងស្លាកសញ្ញាគម្រោងចំនួន២ ។ គម្រោងទាងពីរនេះស្ថិតក្នុងតម្លៃប៉ាន់ស្មាន ១០៥.៤៣៣.៧០៤រៀល ដោយមានក្រុមហ៊ុនម៉ៅការដាក់សំណើរចំនួន ១១ក្រុមហ៊ុន។ ជាលទ្ធផលបានទៅលើក្រុមហ៊ុន គី ពក ក្នុងតម្លៃ ៤៦.៤១០.០០០រៀល។
ក្នុងនោះលោក ឡាត ស៊ើប ក៏បានណែនាំដល់ក្រុមហ៊ុនម៉ៅការដែលទទួលបានគម្រោងនេះ ត្រូវអនុវត្តឲ្យបានត្រឹមត្រូវទៅតាមក្បួនច្បាប់ និងស្តង់ដាបច្ចេកទេសនៃការសាងសង់ ជាពិសេសធ្វើយ៉ាងណាត្រូវពន្លឿនការសាងសង់ឲ្យបានលឿនតាមពេលវេលាដែលបានកំណត់នៅក្នុងកិច្ចសន្យា ដើម្បីឲ្យបងប្អូនប្រជាពលរដ្ឋមានភាពងាយស្រួលក្នុងការធ្វើដំណើរឆ្លងកាត់។ ជាមួយនោះក្រោយការដេញថ្លៃ ក្រុមហ៊ុន គី ពក ដែលទទួលបានការម៉ៅការចំពោះគម្រោងសាងសង់ផ្លូវខាងលើ បានធ្វើការប្ដេជ្ញាចិត្តដោយសន្យាថា នឹងធ្វើឲ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខណ្ឌដូចមានចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុំ គីន
កែសម្រួល៖ លោក អ៊ុន ណារាជ្យ
