កុដិថ្ម១ខ្នង ផ្លូវបេតុងចូលវត្ត១ខ្សែ ប្រវែង ១៥៤ម៉ែត្រ ទទឹង ៥ម៉ែត្រការ៉េ កំរ៉ាស់ ១តឹកកន្លះ និងជើងទង់ ៦ដើម ចំណាយថវិកាអស់ជាង ៧ម៉ឺនដុល្លារ នៅវត្តរតនមុនីរោងគោ ក្នុងភូមិរោងគោ ឃុំរោងគោ ស្រុកក្រឡាញ់ ខេត្តសៀមរាប ត្រូវបានកាត់ខ្សែបូរសម្ពោធឆ្លងដាក់ឲ្យប្រើប្រាស់នៅព្រឹកថ្ងៃទី១៨ ខែមេសា ឆ្នាំ២០២៤ ក្រោមអធិបតីភាព ឯកឧត្ដម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និងលោក ពិន ប្រាកដ អភិបាលរងខេត្ត រួមនឹងថ្នាក់ដឹកនាំខេត្តមួយចំនួនទៀត។
លោក សុខ ណារ៉េត អភិបាលស្រុកក្រឡាញ់ បានឱ្យដឹងថា សមិទ្ធផលថ្មីទាំងនេះ កើតឡើងក្រោមការផ្តួចផ្តើមគំនិត និងចូលរួមជួយឧបត្ថម្ភរបស់គណៈកម្មការ អាចារ្យវត្ត ព្រះចៅអធិការ ពុទ្ធបរិស័ទចំណុះជើងវត្ត ពិសេសព្រះគ្រូចៅអធិការវត្ត បានគៀងគរប្រមូលបច្ឆ័យពីគ្រប់ទិសទីទាំងសប្បុរសជនក្នុងស្រុក និងក្រៅស្រុក។ គិតមកដល់ពេលនេះ គណៈកម្មការសាងសង់នៅជំពាក់ថ្លៃសំភារៈសំណង់កសាងកុដិ និងថ្លៃសាងសង់ផ្លូវបេតុងសរុបចំនួន ៣២លានរៀល។
ឯកឧត្តម អ្នកឧកញ៉ា សៀង ណាំ មានប្រសាសន៍ថា ប្រទេសកម្ពុជា ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន អតីតនាយករដ្ឋមន្រ្តី បច្ចុប្បន្នជាប្រធានព្រឹទ្ឋសភា បានធ្វើឲ្យប្រទេសជាតិទាំងមូលមានសុខសន្តិភាព និងភាពជាម្ចាស់ពេញលេញក្នុងការដឹកនាំជោគវាសនាដ៏ប្រពៃរបស់ខ្លួន ដើម្បីស្វែងរកសន្តិភាព វឌ្ឍនភាព និងសេចក្តីថ្លៃថ្នូរ ជូនប្រជាជនខ្មែរគ្រប់រូបពោល គឺកម្ពុជា មានការបង្រួបបង្រួមជាតិ សន្តិភាពពេញលេញ មានឯករាជ្យភាព មានកំណើនសេដ្ឋកិច្ចខ្ពស់ និងមានប្រជាធិបតេយ្យពិតប្រាកដ។ ដោយឡែកសមិទ្ធផលដែលបានរៀបចំពីធីកាត់ខ្សែបូដាក់ឲ្យប្រើប្រាស់នៅថ្ងៃនេះដែរ វាគឺជាសក្ខីភាពថ្មីមួយបន្ថែមទៀត ដែរជាសម្បត្តិសាធារណៈរបស់វត្តសម្រាប់បងប្អូនប្រជាពលរដ្ឋ លោកយាយលោកតាក្នុងស្រុកក្រឡាញ់ ទាំងមូលប្រើប្រាស់ទាំងអស់គ្នា។
ឯកឧត្តមបានរម្លឹកថា ក្រោយថ្ងៃ ១៧មេសា ឆ្នាំ១៩៧៥ ក្រោមការគ្រប់គ្រងដោយរបបខ្មែរក្រហម ប៉ុល ពត ព្រះសង្ឃដែលគង់ក្នុងវត្តអារាមនេះ ក៏ដូចជាអារាមនានាក្នុងទូទាំងប្រទេស ត្រូវបានពួក ប៉ុល ពត ប្រល័យពូជសាសន៍ជំលៀស និងបង្ខំព្រះសង្ឃឲ្យសឹកទាំងអស់ សំណង់ទាំងឡាយក្នុងវត្តរួមមាន កុដ្តិ សាលាឆាន់ ក៏ត្រូវពួកគេរុះរើ និងបំផ្លិចបំផ្លាញអស់គ្មានសល់ មិនតែប៉ុណ្ណោះពួកគេបានយកទីកន្លែងជាទីគោរពសក្ការៈ ទៅធ្វើជាកន្លែងស្នាក់ការ របស់ក្រុមឃាតករបាតដៃប្រលាក់ឈាម របស់ពួកខ្មែរក្រហម ប៉ុល ពត ផងដែរ។ ក្រោយថ្ងៃរំដោះ ៧មករា ឆ្នាំ១៩៧៩ ក្រោមការដឹកនាំរបស់រណសិរ្យសាមគ្គីអភិវឌ្ឍន៍មាតុភូមិកម្ពុជា បានកសាង អភិវឌ្ឍប្រទេសជាតិពីគំនរផេះផង់ ឲ្យមានការរីកចម្រើនលើគ្រប់វិស័យ ទាំងវិស័យពុទ្ធចក្រ និងអាណាចក្រ។
ក្នុងឱកាសសម្ពោធនោះដែរ ឯកឧត្តម អ្នកឧកញ៉ា សៀង ណាំ បានប្រគេនព្រះចៅអធិការ នូវថវិកាចំនួន ១២លានរៀលសម្រាប់ប្រើប្រាស់តាមការងារជាក់ស្ដែង, ដូនជីតាជី និងប្រជាពលរដ្ឋដែលបានចូលរួមក្នុងម្នាក់ទទួលបានក្រណាត់ស ឬសារុង១ និងថវិកាមួយចំនួន, លោកគ្រូអ្នកគ្រូ៦នាក់ ម្នាក់ៗទទយលបានថវិកា៥ម៉ឺនរៀល និងសិស្សានុសិស្ស៤៥នាក់ម្នាក់ៗទទួលបានសៀវភៅ២ក្បាល ប៊ិក២ដើម និងថវិកា៥ពាន់រៀល៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
