ព្រឹកមិញនេះ សាខាកាកបាទក្រហមកម្ពុជាខេត្តសៀមរាប ប្រគល់ផ្ទះមនុស្សធម៌ទី៥៥ ជូនស្ត្រីមេម៉ាយទីទ័លក្រនៅឃុំល្វា ក្នុងស្រុកពួក
នៅព្រឹកថ្ងៃទី០៧ ខែសីហា ឆ្នាំ២០១៨នេះ លោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការី បានអញ្ជើញចុះប្រគល់ផ្ទះមនុស្សធម៌ទី ៥៥ មានទំហំ ៥ម៉ែត្រគុណនឹង៦ម៉ែត្រ ធ្វើពីឈើ ប្រក់ស័ង្កសីភ្លីធំ ក្រាលក្ដារ ជញ្ជាំងក្ដារ តម្កល់លើជើងតាង កម្ពស់១,៨០ម៉ែត្រ ដែលផ្ដួចផ្ដើមដោយឯកឧត្តមបណ្ឌិត ឃឹម ប៊ុនសុង ប្រធានគណៈកម្មាធិការសាខាកាកបាទក្រហមកម្ពុជាខេត្ត រួមទាំងអំណោយមនុស្សធម៌បន្ថែមទៀត ក្នុងនោះមានមុង១ , ភួយ១ , សារុង១ , ក្រមា១ , កន្ទេល១ , អង្ករ៥០គីឡូក្រាម , មី១កេស , ត្រីខ១យួរ , ទឹកស៊ីអ៊ីវ១យួរ , សម្ភារផ្ទះបាយមួយចំនួន និងថវិកា៣០ម៉ឺនរៀល ជូនដល់គ្រួសារប្អូនស្រី ហូយ ហេង អាយុ ៣៨ឆ្នាំ ជាស្ត្រីមេម៉ាយទីទ័លក្ររស់នៅជាមួយមេរោគអេដស៍ រស់ជាមួយកូនស្រីអាយុ៤ឆ្នាំ នៅភូមិជ្រាស់ ឃុំល្វា ស្រុកពួក ។
ជាមួយគ្នានេះដែរ លោកជំទាវ គួយ ណាលីន ឃឹមប៊ុនសុង និងសហការី បានប្រគល់អណ្ដូងទឹកស្អាតទី ២៥ របស់សាខាកាកបាទក្រហមកម្ពុជាខេត្តសៀមរាប ដែលជាប្រភេទអណ្ដូងទឹកស្អាតអាហ្វ្រីដេសទី៤ ជូនដល់សហគមន៍ភូមិជ្រាស់ ឃុំល្វា ស្រុកពួក ខេត្តសៀមរាប សម្រាប់ប្រើប្រាស់តាមតម្រូវការរបស់ប្រជាពលរដ្ឋ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
