ក្នុងជំនួបជាមួយអ្នកសារព័ត៌មាននៅក្នុងខេត្តសៀមរាប នារសៀលថ្ងៃទី២៩ ខែមេសា ឆ្នាំ២០២៤នេះ ឯកអគ្គរដ្ឋទូតអាមេរិកប្រចាំកម្ពុជា លោក W. Patrick Murphy បានលើកឡើងថា ក្នុងរយៈពេល ៥ឆ្នាំ ក្នុងការបំពេញបេសកកម្មការទូតនៅកម្ពុជា ខេត្តសៀមរាប គឺជាទីកន្លែងដែលលោកពេញចិត្តបំផុត។
លោក W. Patrick Murphy បង្ហាញថា ឆ្នាំនេះជាឆ្នាំចុងក្រោយនៃបេសកកម្មជាឯកអគ្គរដ្ឋទូតសហរដ្ឋអាមេរិកនៅកម្ពុជា ហើយអ្វីដែលលោកចងចាំបំផុតគឺនៅខេត្តសៀមរាប ទីដែលលោកបានចូលរួមសកម្មភាពកម្សាន្តមួយចំនួនដូចជាកម្មវិធីរត់ពាក់កណ្តាលម៉ារ៉ាតុន នៅអង្គរវត្ត ការទស្សនាការសម្តែងសិល្បៈរបស់អង្គការហ្វាពន្លឺសិល្បៈ ទស្សនាសារៈមន្ទីរ ម្ហូបអាហារ និងការទស្សនាសត្វស្លាប ដែលនៅខេត្តសៀមរាប មានសត្វស្លាបជាច្រើនប្រភេទ។ លោកនិយាថា “ខ្ញុំចូលចិត្តខេត្តសៀមរាប នៅទីនេះបានផ្តល់រឿងរ៉ាវជាច្រើន ក៏ដូចជាសកម្មភាពមួយចំនួនដែលខ្ញុំស្រលាញ់និងចូលចិត្ត” ។
លោកបន្តថា លោកក៏ពេញចិត្តនូវការចូលរួមលើកកម្ពស់ និងធ្វើឲ្យប្រសើរឡើងវិញនូវប្រាសាទភ្នំបាខែង នៅខេត្តសៀមរាប រួមជាមួយនឹងប្រាសាទព្រះវិហារ នៅខេត្តព្រះវិហារ ដែលជាផ្នែកមួយនៃការធ្វើឲ្យរមណីយដ្ឋានវប្បធម៌ទាំងនេះ មានអ្នកទេសចរជាតិ និងអន្តរជាតិ ជាច្រើនបានចូលមកទស្សនាកម្សាន្ត។ ហើយនៅក្នុងរយៈពេល៥ឆ្នាំនេះដែរ លោកសង្កេតឃើញថា ប្រទេសកម្ពុជាទទួលបានជោគជ័យក្នុងការប្រយុទ្ធប្រឆាំងនឹងជំងឺកូវីដ១៩ ក៏ដូចជាជោគជ័យនៅក្នុងការធ្វើជាម្ចាស់ផ្ទះនៃកិច្ចប្រជុំអាស៊ានផងដែរ។ ជាមួយគ្នានេះកម្ពុជាក៏មានការរីកចម្រើនលើវិស័យសុខភាពសាធារណៈ ដែលនៅពេលបច្ចុប្បន្ននេះ ពលរដ្ឋកម្ពុជា មានការយល់ដឹងអំពីបញ្ហានេះកាន់តែមានចំនួនច្រើន៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
