នៅសាលាខេត្តសៀមរាប នាព្រឹកថ្ងៃទី៣០ ខែមេសា ឆ្នាំ២០២៤នេះ មានរៀបចំកិច្ចប្រជុំណែនាំ ស្តីពីការប្រមូលតម្រូវការអាទិភាពសម្រាប់ការរៀបចំ និងការកសាងកម្មវិធីវិនិយោគបីឆ្នាំរំកិល ២០២៥ /២០២៧ ដឹកនាំដោយលោកជំទាវ ស៊ិន ណម សមាជិកក្រុមប្រឹក្សាខេត្ត និង លោក សុខ ថុល អភិបាលរងខេត្ត ដោយមានការចូលរួមពីអ្នកពាក់ព័ន្ធជាច្រើនរូប។
លោក សុខ ថុល មានប្រសាសន៍ថា ផែនការកសាងកម្មវិធីវិនិយោគ ជាត្រីវិស័យ ជាគោលដៅមួយដែលយើងផ្អែកលើយុទ្ធសាស្ត្ររបស់រាជរដ្ឋាភិបាល ក៏ដូចជាផែនការអភិវឌ្ឍន៍ប្រកបដោយចិរភាពរបស់រាជរដ្ឋាភិបាល ដើម្បីធ្វើយ៉ាងណាឲ្យស្របតាមគោលដៅរបស់រាជរដ្ឋាភិបាល។ ជាមួយនឹងការអនុវត្តកិច្ចការងារនេះ អាជ្ញាធរខេត្ត ក៏គ្រោងនឹងបង្កើតក្រុមការងារមួយដែលមានមន្ទីរផែនការ និងទីចាត់ការផែនការវិនិយោគ ជាអ្នកដើរតួនាទីសំខាន់មួយក្នុងការពិនិត្យ វាយតម្លៃ នូវការកសាងផែនការវិនិយោគនេះ ថាតើវាមានបញ្ហាអ្វីខ្លះ? ហើយការអភិវឌ្ឍផែនការរបស់យើងបានដល់កម្រិតណា? ព្រោះថា បើមិនដូច្នេះទេយើងមិនដឹងថា គម្រោងផ្សេងៗដែលទទួលបានការសន្យាគាំទ្រតាមបណ្តាឆ្នាំអនុវត្តបាន ឬមិនបានដោយសារអ្វី? ការធ្វើបែបនេះ ជាការពង្រឹងប្រសិទ្ធភាពការងារឲ្យកាន់តែមានគុណភាពខ្ពស់ថែមទៀត។
លោកអភិបាលរងបន្តថា ការប្រមូលតម្រូវការអាទិភាពសម្រាប់ការរៀបចំ និងការកសាងកម្មវិធីវិនិយោគបីឆ្នាំរំកិល ២០២៥ /២០២៧ ក៏មានគោលបំណងផ្សព្វផ្សាយដល់អ្នកពាក់ព័ន្ធទាំងអស់ឲ្យបានយល់អំពីការរៀបចំ ការកសាង កម្មវិធីវិនិយោគបីឆ្នាំរំកិល ក៏ដូចជាប្រតិទិនអនុវត្តការងារបីឆ្នាំរំកិលរបស់រដ្ឋបាលខេត្ត ដែលទទួលបានការអុនម័តពីកិច្ចប្រជុំលើកទី៥៧ របស់ក្រុមប្រឹក្សាខេត្តសៀមរាប។ ជាមួយគ្នានេះ លោកក៏បានជំរុញដល់អាជ្ញាធរមូលដ្ឋានឃុំ/សង្កាត់ ក្រុង/ស្រុក ត្រូវខិតខំធ្វើយ៉ាងណាឲ្យមានការបន្ស៊ីគ្នាជាមួយនឹងបណ្តាដៃគូអភិវឌ្ឍនានានៅក្នុងមូលដ្ឋាន ដើម្បីដាក់បញ្ជូលក្នុងផែនការវិយោគរបស់មូលដ្ឋាននីមួយៗ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
