អាជ្ញាធរក្រុងសៀមរាប បានអំពាវនាវ ដល់ប្រជាពលរដ្ឋអោយមានការប្រុងប្រយ័ត្ន ក្នុងការជ្រើសរើស សេវាកម្មផ្តល់ប្រាក់កម្ចីពីក្រុមហ៊ុនឬអ្នកផ្ដល់កម្ចី ដែលគ្មានច្បាប់អនុញ្ញាតច្បាប់។
លោក សូរ ប្លាតុង អភិបាលក្រុងសៀមរាប បានមានប្រសាសន៍ថា ធនាគារជាតិកម្ពុជា បានព្រួយបារម្ភពីការប្រើប្រាស់ប្រាក់កម្ចីមិនត្រូវ ពីក្រុមហ៊ុនផ្ដល់ប្រាក់កម្ចីមួយចំនួន ដោយសារគ្មានតែច្បាប់អនុញ្ញាត ដែលធ្វើឲ្យពលរដ្ឋបាត់បង់ទ្រព្យសម្បត្ដិ រួមមាន ៖១. អតិថិជនអាចប្រឈម ឮនឹងបំណុលវ័ណ្ឌក ដោយសារអត្រាការប្រាក់ និងកម្រៃសេវាផ្សេងៗខ្ពស់ខ្លាំងជាងគ្រឹះស្ថានស្របច្បាប់ និងការគណនាការប្រាក់មិនត្រឹមត្រូវតាមច្បាប់ និងបទប្បញ្ញត្តិ , ២. អតិថិជនអាចប្រឈមមុខនឹងការគម្រាមកំហែង គៀបសង្កត់ គ្រោះថ្នាក់ ឬរូបភាពផ្សេងៗ ដើម្បីបង្ខំឲ្យសងប្រាក់ដើម ការប្រាក់ និងប្រាក់ពិន័យដែលមិនសមហេតុផល ទៅក្រុមហ៊ុនវិញ និង ៣. ទ្រព្យធានារបស់អតិថិជន អាចត្រូវបានក្រុមហ៊ុន ឬអ្នកផ្ដល់កម្ចីខុសច្បាប់ រឹបអូសដោយពុំឆ្លងការត់ការសម្រេចពីតុលាការជាដើម ហើយធនាគារជាតិ បាននឹងកំពុងសហការជាមួយអាជ្ញាធរពាក់ព័ន្ធ ដើម្បីចាត់វិធានការតាមផ្លូវច្បាប់ ទៅលើក្រុមហ៊ុន ឬអ្នកផ្ដល់កម្ចីខុសច្បាបគ្រប់រូបភាពទាំងអស់នោះ ។
លោក សូរ ប្លាតុង បានមានប្រសាសន៍ទៀតថា ដើម្បីរក្សាសណ្តាប់ធ្នាប់សាធារណៈនេះ កាលពីថ្ងៃទី០៦ ខែសីហា ឆ្នាំ២០១៨ម្សិលមិញនេះ ក្រុមការងារ នៃគណៈបញ្ជាការឯកភាពក្រុងសៀមរាប បានកាត់និងដកហូតផ្ទាំងបដាក្រុមហ៊ុនឥណទានកម្ពុជា សរុបចំនួន៣៥ផ្ទាំង ដែលបានចងតាមសសរបង្គោលភ្លើង ពីរង្វង់មូលផ្សារចាស់ រហូតដល់សាលាសង្កាត់សៀមរាប ផ្លូវកូម៉ៃ និងផ្លូវជាតិលេខ៦ ផ្លូវស៊ីវុត្ថា ដោយសារខិតប័ណ្ឌទាំងនោះ បានធ្វើពាណិជ្ជកម្មខុសច្បាស់ ដែលធ្វើឲ្យពលរដ្ឋងាយចាញ់បោក ដែលក្រុមហ៊ុនទាំងនោះរួមមាន៖ ក្រុមហ៊ុនឥណទាន សុចរិតភ្នំពេញ , ក្រុមហ៊ុនឥណទានអន្ដរជាតិ , ក្រុមហ៊ុនឥណទានកម្ពុជា និង ក្រុមហ៊ុនឥណទានភ្នំពេញជាដើម ។
សូមរំលឹកថា យោងតាមសេចក្តីប្រកាស របស់ធនាគារជាតិនៃកម្ពុជា កាលពីរសៀលថ្ងៃទី២៩ ខែមិថុនា ឆ្នាំ២០១៨កន្លងទៅ បានចេញសេចក្ដីប្រកាសព័ត៌មានឲ្យសាធារណៈជន មានការប្រុងប្រយ័ត្នចំពោះក្រុមហ៊ុនមួយចំនួន ដែលកំពុងប្រតិបត្តិការផ្ដល់កម្ចីក្នុងប្រទេសកម្ពុជា ដោយមិនមានច្បាប់អនុញ្ញាត ពីធនាគារជាតិនៃកម្ពុជា ហើយការចេញសេចក្ដីប្រកាសព័ត៌មាននេះ ធ្វើឡើងបន្ទាប់ពីធនាគារជាតិនៃកម្ពុជា បានសង្កេតឃើញថា ថ្មីៗនេះមានក្រុមហ៊ុនឯកជនមួយចំនួន បានផ្សព្វផ្សាយពីការផ្តល់កម្ចី យ៉ាងសកម្មតាមរយៈបណ្ដាញសង្គម ការចែកនាមប័ណ្ណ និងផ្ញើសារតាមទូរស័ព្ទជាដើម ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
