ឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធជាង ៤ពាន់ក្បាលដី ក្នុងសង្កាត់ក្របីរៀល ក្រុងសៀមរាប ត្រូវបានមន្ទីរជំនាញ សហការជាមួយអាជ្ញាធរមូលដ្ឋាន បិទផ្សាយជាសាធារណៈ ដើម្បីឲ្យប្រជាពលរដ្ឋ និងអ្នកកាន់កាប់ ឬម្ចាស់ក្បាលដី ធ្វើការពិនិត្យ ផ្ទៀងផ្ទាត់មុននឹងឈានទទួលបានប័ណ្ណកម្មសិទ្ឋសម្គាល់ម្ចាស់អចលនទ្រព្យ ដែលពិធីនេះធ្វើឡើងក្នុងបរិវេនវត្តព្រៃផ្តៅ ក្នុងភូមិក្រសាំង សង្កាត់ក្របីរៀល នៅព្រឹកថ្ងៃទី០៣ ខែកក្កដា ឆ្នាំ២០២៤នេះ។
លោក ចៅ ឡង់ឌី អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានបញ្ជាក់ថា ការបិទផ្សាយនាពេលនេះមានចំនួន ៤.៣១១ក្បាលដី ស្ថិតក្នុងភូមិចំនួន៥ រួមមាន៖ ភូមិតារស់ ភូមិព្រៃពោធិ៍ ភូមិទទា ភូមិត្រពាំងវែង និងភូមិព្រៃក្រូច មានរយៈពេល១៥ថ្ងៃ គឺចាប់ពីថ្ងៃទី០៣ ដល់ទី១៧ ខែកក្កដា ឆ្នាំ២០២៤ នៅក្នុងបរិវេនវត្តព្រៃផ្តៅ។ ក្រោយបញ្ចប់ការបិទផ្សាយរយៈពេល១៥ថ្ងៃនេះទៅ គណៈកម្មការរដ្ឋបាលនឹងលើកសំណើជូនទៅ ឯកឧត្តមអភិបាលខេត្ត ដើម្បីសម្រេចចេញវិញ្ញាបនបត្រ សម្គាល់ម្ចាស់អចលនវត្ថុជូនប្រជាពលរដ្ឋដែលជាម្ចាស់ដី និងអ្នកកាន់កាប់ដីរូបណា ដែលបានបំពេញ លក្ខខណ្ឌគ្រប់គ្រាន់តាមនីតិវិធីច្បាប់ និងជាក្បាលដីមិនមានទំនាស់។
លោកអនុប្រធានមន្ទីរ ក៏បានអំពាវនាវដល់ម្ចាស់ និងអ្នកកាន់កាប់ដី ព្រមទាំងស្ថាប័ននិងអង្គភាពពាក់ព័ន្ឋទាំងអស់ សូមមកពិនិត្យផ្ទៀងផ្ទាត់មើលទិន្នន័យក្បាលដីខ្លួនឲ្យបានគ្រប់ៗគ្នាទៅលើឈ្មោះម្ចាស់ដី សាវតា ទំហំដី ប្រភេទទ្រព្យ និងត្រូវពិនិត្យផងដែរនៅលើប្លង់សុរិយោដីនូវទីតាំងដី និងរូបរាងដី ព្រោះនេះជាឱកាសចុងក្រោយដែលអ្នកពាក់ព័ន្ឋទាំងអស់ មានសិទ្ឋិធ្វើការកែតម្រូវ ឬជំទាស់តវ៉ា ក្នុងករណីដែលពិនិត្យទៅឃើញថាមានកំហុសឆ្គង ដើម្បីជំនាញធ្វើការពិនិត្យ និងកែតម្រូវជូន ដើម្បីធានាបានភាពសុក្រឹត្យ ត្រឹមត្រូវ ក្នុងការចេញវិញ្ញាបនបត្រសម្គាល់ម្ចាស់អចលនវត្ថុ ហើយកុំឲ្យមានបញ្ហានៅពេលក្រោយ។
លោក ខឿន រដ្ឋា អភិបាលរងក្រុងសៀមរាប មានប្រសាសន៍ថា ការចុះបញ្ជីដីធ្លីមានលក្ខណៈជាប្រព័ន្ឋ ជាប្រការសមស្របបំផុតដែលបានកំណត់នៅក្នុងគោលនយោបាយដីធ្លីរបស់រាជរដ្ឋាភិបាល ដើម្បីកាត់បន្ថយភាពក្រីក្រ និងទំនាស់ដីធ្លីក្នុងសង្គមជាតិយើង។ ដូច្នេះសូមសំណូមពរដល់បងប្អូនប្រជាពលរដ្ឋដែលជាម្ចាស់ក្បាលដី សូមមកចូលរួមពិនិត្យ ផ្ទៀងផ្ទាត់ឱ្យបានគ្រប់គ្នា ដើម្បីធានាបាននូវភាពត្រឹមត្រូវ ច្បាស់លាស់ គ្មានកំហុសឆ្គង ព្រោះវាជាឱកាសចុងក្រោយ ដែលម្ចាស់ក្បាលដីអាចមានសិទ្ធពិនិត្យតវ៉ា បើអាក់ខាន ឬយឺតយ៉ាវ វានឹងនាំឲ្យបាត់បង់ផលប្រយោជន៍របស់បងប្អូននៅពេលមានការខុសឆ្គងនៅពេលចេញប័ណ្ណកម្មសិទ្ធ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
