ដោយមើលឃើញពីភាពចាំបាច់ក្នុងការធ្វើដំណើរប្រចាំថ្ងៃរបស់ប្រជាពលរដ្ឋក្នុងមូលដ្ឋានដែលតែធ្វើដំណើរឆ្លងកាត់ក្នុងវត្តទាំងថ្ងៃទាំងយប់ និងដើម្បីរក្សាបានសណ្តាប់ធ្នាប់ សុខសុវត្ថិភាពក្នុងទីអារាម បញ្ចៀសការរំខាន និងបញ្ហាផ្សេងៗដល់វត្ត ព្រះចៅអធិការវត្តកេសរារាម ក្រុងសៀមរាប គណៈកម្មការអាចារ្យវត្ត បានការសហការគាំទ្រពីអាជ្ញាធរមូលដ្ឋាន និងសប្បុរសជន នៅថ្ងៃទី៣១ ខែកក្កដា ឆ្នាំ២០២៤នេះ បានសម្រេចចាប់ផ្តើមដំណើរឈូសឆាយដំណើរ និងស្ថាបនាជាផ្លូវបេតុងមួយខ្សែប្រវែង១៦០ម៉ែត្រ ទន្ទឹង៦ម៉ែត្រ ជាប់របងវត្តក្នុងភូមិតាភុល សង្កាត់ស្វាយដង្គំ ក្រុងសៀមរាប។
ព្រះវិបុលសត្ថា រី សាត មានសង្ឃដីកាថា កន្លងមកនេះប្រជាពលរដ្ឋដែលរស់នៅខាងជើងវត្ត ជួបការលំបាកក្នុងការធ្វើដំណើរ ពុំទាន់មានផ្លូវចេញចូល ហើយពួកគាត់ត្រូវចេញតាមផ្លូវក្នុងវត្ត ដែលបានធ្វើឱ្យមានការរំខានខ្លះៗដល់ព្រះសង្ឃដែលកំពុងសឹង និងកំពុងសិក្សាធម៌វិន័យផងដែរ។ ហេតុនេះទើបព្រះអង្គផ្តួចផ្តើមនិងពិគ្រោះជាមួយចៅសង្កាត់ស្វាយដង្គំ មានការព្រមព្រៀងពីប្រជាពលរដ្ឋបានសម្រេចបើកផ្លូវចាក់បេតុងផ្លូវមួយខ្សែនេះឡើង។ នៅពេលសាងសង់រួចប្រជាពលរដ្ឋនៅតាមបណ្តោយផ្លូវនេះ អាចចរាចរទៅមកបានស្រួល ហើយពួកគាត់នឹងមិនប្រើប្រាស់ផ្លូវក្នុងវត្តទៀតទេ។
ព្រះតេជគុណ រី សាត មានសង្ឃដីកាបន្តថា សម្រាប់បច្ច័យសាងសង់ផ្លូវនេះពុំទាន់មានគ្រប់គ្រាន់នោះទេ ដូច្នេះសូមអំពាវនាវដល់សប្បុរសជន ពុទ្ធបរិស័ទជិតឆ្ងាយទាំងអស់ ដែលមានសទ្ធាជ្រះថ្លា ចូលរួមទាំងអស់គ្នា ដោយការចាក់បេតុងផ្លូវនេះគិត១ម៉ែត្រក្រឡា តម្លៃ១៦ដុល្លារ លូ១កង់ តម្លៃ១៦ដុល្លារ។
លោក ហ៊ា ហាវ ចៅសង្កាត់ស្វាយដង្គំ បានឱ្យដឹងថា ការស្ថាបនាផ្លូវមួយខ្សែនេះ គឺធ្វើជាពីរដំណាក់កាល ដោយដំណាក់កាលដំបូង រៀបចំប្រព័ន្ធលូឱ្យរួចរាល់ តាមស្តង់ដារបន្ទាប់មកបានចាប់ផ្តើមចាក់បេតុងធ្វើផ្លូវ។ លោកថាផ្លូវនេះពិតជាមានសារៈសំខាន់ណាស់សម្រាប់ប្រជាពលរដ្ឋ និងសិស្សានុសិស្សធ្វើដំណើរ ព្រោះផ្លូវនេះនៅជាប់សាលារៀន និងវត្ត។ ហើយនៅពេលផ្លូវនេះស្ថាបនារួច វានឹងផ្តល់ប្រយោជន៍ជាច្រើន ដូចជាបង្កភាពងាយស្រួលក្នុងការធ្វើដំណើរ ក្នុងករណីមានអគ្គីភ័យ រថយន្តពន្លត់អគ្គីភ័យចេញចូលជួយសង្គ្រោះបានទាន់ពេលជាដើម៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
