នៅព្រឹកថ្ងៃទី០១ ខែសីហា ឆ្នាំ២០២៤នេះ គណៈកម្មាធិការពិគ្រោះយោបល់កិច្ចការស្ត្រី និងកុមារខេត្តសៀមរាប (គកសក) អាណត្តិទី៤ បានបើកកិច្ចប្រជុំសាមញ្ញលើកទី១ ប្រចាំខែកក្កដា ឆ្នាំ២០២៤ របស់ខ្លួន ដើម្បីធ្វើការពិនិត្យលើលទ្ធផលនៃការអនុវត្តការងារកន្លងមក របស់ក្រុមការងារ ក្នុងការលើកកម្ពស់ការយល់ដឹង និងការប្រើប្រាស់បទដ្ឋានគតិយុត្តជាតិ និងអន្តរជាតិដែលមានស្រាប់ សំដៅការពារកុមារពីការរំលោភបំពាន និងកេងប្រវ័ញ្ចផ្លូវភេទ ដឹកនាំដោយលោកជំទាវ ស៊ិន ណម សមាជិកាក្រុមប្រឹក្សាខេត្ត និងជាប្រធាន គកសក ខេត្តសៀមរាប ដោយមានការចូលរួមពីសមាជិក និងបណ្តាអង្គការដៃគូជាច្រើនរូប។
មានប្រសាសន៍ក្នុងឱកាស លោកជំទាវ ស៊ិន ណម បានជំរុញដល់សមាជិកទាំងអស់ ត្រូវបន្តយកចិត្តទុកដាក់ បន្តការអប់រំផ្សព្វផ្សាយអំពីច្បាប់ ទាក់ទងទៅនឹងស្ត្រី និងកុមារ ការលើកកម្ពស់សីលធម៌សង្គម ពង្រឹងភាពអង់អាចដល់ស្ត្រី ជួយអន្តរាគមន៍ជនរងគ្រោះ និងងាយរងគ្រោះដោយអំពើហិង្សាក្នុងគ្រួសារ និងជំរុញការអប់រំកុមារតូចៗដែលគ្រប់អាយុបានទៅចូលរៀន ព្រមទាំងលើកកម្ពស់សុខមាលភាពមាតា និងទារក មុនពេលសំរាល និងក្រោយពេលសម្រាលឱ្យបានល្អប្រសើរបន្ថែមទៀត។ ជាមួយនោះក៏សូមឱ្យអ្នកពាក់ព័ន្ធ អនុវត្តតាមគោលដៅរបស់ក្រសួងដោយផ្តោតសំខាន់ចំពោះការកសាងផែនការ ក្នុងការគាំទ្រលើកុមារតូចៗ ចំពោះការងារអប់រំសិក្សា។
ព័ត៌មានជាតិ ថ្មីៗ
លោកជំទាវប្រធានគណៈកម្មាធិការ បានគូសបញ្ជាក់ថា ដើម្បីអនុវត្តឱ្យសម្រេចបានជោគជ័យ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា គឺត្រូវធ្វើការចូលរួមកាត់បន្ថយភាពក្រីក្រ ក្នុងការអភិវឌ្ឍប្រទេសកម្ពុជា សម្រេចឱ្យបាននូវចក្ខុវិស័យនាឆ្នាំ២០៣០ ប្រែក្លាយជាប្រទេសដែលមានចំណូលមធ្យមកម្រិតខ្ពស់ និងបន្តឈានទៅជាប្រទេសមានចំណូលកម្រិតខ្ពស់នៅឆ្នាំ២០៥០។ ដើម្បីប្រទេសជាតិមានការអភិវឌ្ឍទៅបែបនេះបាន ក៏ទាមទារក្នុងការពង្រឹងនូវមូលដ្ឋានគ្រឹះពីកុមារតូចៗទៅ។
ក្នុងនោះក៏សូមឱ្យសមាជិកទាំងអស់ត្រូវបង្កើននូវកិច្ចទំនាក់ទំនងល្អនៅក្នុងមូលដ្ឋាន លើការពង្រីកនូវមត្តេយ្យសហគមន៍ សុខភាព អនាម័យ និងសូមឱ្យអង្គការដៃគូចូលរួមជាសំខាន់លើការងារប្រមូលក្រុមជនអនាថា ដែលបង្កភាពអាណាធិបតេយ្យនៅក្នុងក្រុង ធ្វើឱ្យប៉ះពាល់ដល់សណ្តាប់ធ្នាប់សាធារណៈ និងភ្ញៀវទេសចរ។ ម៉្យាងទៀតសូមឱ្យអង្គការដៃគូជំរុញដល់ប្រជាពលរដ្ឋរងគ្រោះ និងងាយរងគ្រោះ ក្នុងការដាំដុះដំណាំរួមផ្សំ ដើម្បីបង្កើន និងគ្រប់គ្រងជីវភាពក្នុងក្រុមគ្រួសារ និងរកបានកម្រៃបន្ថែមពីការងារដាំដុះនេះ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
