មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយរដ្ឋបាលស្រុកពួក នាថ្ងៃ០១ ខែសីហា ឆ្នាំ២០២៤នេះ បានធ្វើការផ្សព្វផ្សាយជាសាធារណៈនូវឯកសារនៃការវិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធ សម្រាប់ភូមិចំនួន៧ គឺភូមិគោកព្នៅ ភូមិអន្តង្គន់ ភូមិតាកាំ ភូមិត្នោតជ្រុំ ភូមិតាស្នេហ៍ ភូមិរហាល និងភូមិដូនអុន ក្នុងឃុំដូនកែវ ស្រុកពួក ខេត្តសៀមរាប ដើម្បីឱ្យបងប្អូនជាម្ចាស់ក្បាលដីធ្វើការពិនិត្យ និងកែតម្រូវ។
លោក ស៊ីន ចាន់ថុល អភិបាលស្រុកពួក បានបញ្ជាក់ថា ការចុះបញ្ជីដីធ្លីលក្ខណៈជាប្រព័ន្ធពិតជាមានសារៈសំខាន់ណាស់សម្រាប់បងប្អូនជាម្ចាស់ដី គឺដើម្បីឱ្យមានបណ្ណកម្មសិទ្ធិស្របច្បាប់។ ចំពោះការបិទផ្សាយនាពេលនេះ មានរយៈពេល១៥ថ្ងៃ ចាប់ពីថ្ងៃទី១-១៥ ខែសីហា ឆ្នាំ២០២៤ ក្នុងបរិវេណវត្តនាមរូប ឃុំដូនកែវ ស្រុកពួក។ ដើម្បីឱ្យការចុះបញ្ជីដីធ្លីសម្រេចបានជោគជ័យបានលឿន ទាមទារឱ្យមានកិច្ចសហការពីបងប្អូនម្ចាស់ដីផ្ទាល់ ក្នុងការចង្អុលបង្ហាញទីតាំងដី ព្រំដី ផ្ដល់ព័ត៌មានផ្ទាល់មាត់ និងផ្តល់ឯកសារពាក់ព័ន្ធ ដែលជាតម្រូវការចាំបាច់បំផុត។
លោក ហ៊ី សាយ ប្រធានមន្ទីររៀបចំដែនដីខេត្ត មានប្រសាសន៍ថា ការចុះបញ្ជីដីធ្លីមានលក្ខណៈជាប្រព័ន្ធ គឺជាការចុះកំណត់ព្រំដី វាស់វែង និងវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដីហើយធ្វើការផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដី ហើយផ្តល់សិទ្ធិចំពោះតែក្បាលដីណាដែលមិនមានទំនាស់ ឬមិនពាក់ព័ន្ធនឹងដីរដ្ឋតែប៉ុណ្ណោះ។ ដូច្នេះសូមស្នើឱ្យបងប្អូនជាម្ចាស់កម្មសិទ្ធិទាំងអស់ ត្រូវបោះបង្គោលព្រំដីដោយបានឯកភាពព្រំរវាងអ្នកជាប់ព្រំ និងត្រៀមរៀបចំឯកសារដែលពាក់ព័ន្ធឱ្យបានរួចរាល់ ដើម្បីងាយស្រួលដល់ក្រុមការងារងាយស្រួលក្នុងការវាស់ជូន។
លោកប្រធានមន្ទីរ ក៏បានអំពាវនាវដល់បងប្អូនប្រជាពលរដ្ឋដែលបានមកចូលទាំងអស់ និងអាជ្ញាធរមូលដ្ឋានសូមជួយធ្វើការជួយផ្សព្វផ្សាយបន្តដល់បងប្អូនប្រជាពលរដ្ឋដែលជាម្ចាស់ដីដែលពុំបានចួលរួមឱ្យបានដឹង និងចូលរួមបោះបង្គោលព្រំដីដោយបានឯកភាពព្រំរវាងអ្នកជាប់ព្រំ និងត្រៀមរៀបចំឯកសារពាក់ព័ន្ធឱ្យបានគ្រប់ៗគ្នា៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
