រដ្ឋបាលព្រៃឈើ នៃក្រសួងកសិកម្មរុក្ខាប្រម៉ាញ់ និងនេសាទ បានបើកកិច្ចប្រជុំជាមួយអាជ្ញាធរខេត្ត និងមន្ទីរអង្គភាពពាក់ព័ន្ធនៅក្នុងខេត្តសៀមរាប ដើម្បីធ្វើជំរឿនសត្វស្វានៅតាមទីសាធារណៈ និងពិនិត្យការអនុវត្តតាមបណ្ដាកសិដ្ឋានចិញ្ចឹម និងបង្កាត់ពូជស្វាក្ដាម ក្នុងខេត្តសៀមរាប។ កិច្ចប្រជុំនេះ ដឹកនាំដោយ ឯកឧត្តម អ៊ុង សំអាត រដ្ឋលេខាធិក្រសួងកសិកម្ម រុក្ខាប្រម៉ាញ់ និងនេសាទ និងលោក ឌី រ៉ាដូ អភិបាលរងខេត្តសៀមរាប ដែលបានធ្វើឡើងនៅរសៀលថ្ងៃទី០៩ ខែកញ្ញា ឆ្នាំ២០២៤ នៅសាលប្រជុំលេខ១ សាលាខេត្តសៀមរាប ។
លោក ឌី រ៉ាដូ អភិបាលរងខេត្តបានមានប្រសាសន៍ថា នៅក្នុងខេត្តសៀមរាប មានសត្វស្វាកំពុងរស់នៅ ក្នុងក្រុងសៀមរាប និងស្រុកប្រាសាទបាគង ដោយសត្វប្រភេទនេះ វារស់នៅក្នុងព្រៃជុំវិញប្រាសាទបុរាណ ជាការបង្ការហានិភ័យនានាដែលបង្កឡើងដោយសត្វព្រៃ ដែលវាសាំជាមួយមនុស្ស លោក ក៏បានគាំទ្រនូវសកម្មភាពនេះ ដែលផ្ដល់នៅភាពវិជ្ជមានល្អ ដល់ភ្លៀវទេសចរណ៍ផងដែរ។
ឯកឧត្តម អ៊ុង សំអាត រដ្ឋលេខាធិក្រសួងកសិកម្ម រុក្ខាប្រម៉ាញ់ និងនេសាទ បានមានប្រសាសន៍ថា ការងារជំរឿនសត្វស្វានេះ មន្ត្រីជំនាញរបស់រដ្ឋបាលព្រៃឈើ និងធ្វើនៅក្នុងក្របខណ្ឌទូទាំប្រទេស ជាពិសេសនៅតាមតំបន់រមណីយដ្ឋាននានាដែលមានសត្វស្វារស់នៅ។ ឯកឧត្តមបន្តថា ការធ្វើជំរឿននេះ មន្ត្រីជំនាញអាចនឹងដឹងថា សត្វស្វាទាំងអស់នោះតើមួយណាជាសត្វកាចដែលអាចបង្កគ្រោះថ្នាក់ដល់មនុស្ស ដើម្បីងាយស្រួល យកពួកវាទៅកន្លែងផ្សេង ឬទៅកសិដ្ឋានស្របច្បាប់សម្រាប់ជាពូជមេបានៅក្នុងការបង្កាត់។
កន្លងមក សត្វស្វាមួយចំនួននៅក្នុងតំបន់ប្រាសាទក្នុងរមណីយដ្ឋានអង្គរ ត្រូវបានអាជ្ញាធរជាតិអប្សរារាយការណ៍ថា បានធ្វើឲ្យប៉ះពាល់ដល់អ្នកទេសចរ និងប្រាសាទនានា ដោយពួកវាបានសាំ និងប្តូរចរិតលក្ខណៈពីសត្វព្រៃ ដោយសារមនុស្សចេះតែទៅលេងជាមួយវា និងផ្តល់ចំណីអាហារដល់ពួកវា៕
អត្ថបទ និងរូបភាព ៖ជា ស្រស់
កែសម្រួល ហាំ ម៉េងហួត
