ថ្ងៃទី១០ ខែកញ្ញា ឆ្នាំ២០២៤ ក្រសួងទេសចរណ៍ រួមជាមួយ គណៈកម្មការអន្ដរក្រសួង ដើម្បីសម្របសម្រួលការធ្វើដំណើរ និងដឹកជញ្ជូនភ្ញៀវទេសចរ និងអ្នកធ្វើដំណើរចក្រទ្វារព្រំដែនអន្ដរជាតិទូទាំងប្រទេស ហៅកាត់ថា “គ អ ច ទ” បានបើកវគ្គបណ្ដុះបណ្ដាលស្ដីពីបដិសណ្ឋារកិច្ចល្អ ទេសចរណ៍មានសុវត្ថិភាព ជូនដល់មន្ដ្រីកម្លាំងសមត្ថកិច្ច បុគ្គលិក និងអ្នកពាក់ព័ន្ធតាមច្រកទ្វារអាកាសយាន្ដដ្ឋានអន្ដរជាតិសៀមរាប- អង្គរ។ វគ្គបណ្តុះបណ្តាល ប្រព្រឹត្តិទៅក្រោមអធិបតីភាព ឯកឧត្ដម ហោ សារុន រដ្ឋលេខាធិការក្រសួងទេសចរណ៍ និងជាអនុប្រធាន “គ អ ច ទ” តំណាងដ៏ខ្ពង់ខ្ពស់ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ និងលោកឌី រ៉ាដូ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ព្រមទាំង លោក លោកស្រីថ្នាក់ដឹកនាំអង្គភាពមន្ទីរស្ថាប័នពាក់ព័ន្ឋរួមជាមួយសិក្ខាកាម សរុបប្រមាណជាង១០០នាក់។
លោក ឌី រ៉ាដូ អភិបាលរងខេត្តសៀមរាប មានប្រសាសន៍ថា៖ការរៀបចំសិក្ខាសាលា នាពេលនេះ គឺក្នុងន័យគាំទ្រ ដល់វិស័យទេសចរណ៍ ប្រកបដោយអាកប្បកិរិយាទន់ភ្លន់ សុភាពរាបសារ គឺជាការទាក់ទាញចំណាប់អារម្មណ៍របស់ភ្ញៀវទេសចរ ដែលទើបមកដល់ខេត្តសៀមរាប និងដើម្បីឱ្យភ្ញៀវទេសចរគិតថា ប្រជាពលរដ្ឋខ្មែរយើង មានស្នាមញញឹម រួសរាក់ទាក់ មានសុជីវធម៌ និងជាជនជាតិមួយដែលគួរឱ្យចង់រាប់អាន។ នៅដើមឆ្នាំ២០២៤កន្លងទៅខេត្តសៀមរាប ក៏បានសហការជាមួយកម្មវិធីអភិវឌ្ឍន៍ជំនាញទទួលបន្ទុកបណ្តុះបណ្តាលការងារបដិសណ្ឋារកិច្ច(HoKa) ក្រោមការគាំទ្ររបស់ “មូលនិធិអភិវឌ្ឍន៍ជំនាញ(SDF)” ដល់សិក្ខាកាមក្នុងខេត្ត ហើយបានធ្វើការបណ្តុះបណ្តាលលើជំនាញបដិសណ្ឋារកិច្ច ចំពោះបុគ្គលិកជួរមុខ ដែលធ្វើការងារក្នុងភោជនីយដ្ឋាន ផ្ទះសំណាក់ និងសណ្ឋាគារក្នុងខេត្តផងដែរ។
ថ្លែងបើកសិក្ខាសាលា ឯកឧត្តម ហោ សារុន រដ្ឋលេខាធិការក្រសួងទេសចរណ៍ មានប្រសាសន៍ថា៖ពិតណាស់ ការធ្វើបដិសណ្ឋារកិច្ចចំពោះភ្ញៀវទេសចរគឺជាកាតព្វកិច្ចរបស់ប្រជាពលរដ្ឋខ្មែរគ្រប់រូបជាម្ចាស់ផ្ទះ ដែលមិនត្រឹមតែផ្តល់ភាពកក់ក្តៅជូនភ្ញៀវទេសចរប៉ុណ្ណោះទេ ប៉ុន្តែថែមទាំងបានឆ្លុះបញ្ចាំងពីវប្បធម៌ដ៏ល្អផូរផង់ និងប្រពៃណីរបស់ខ្មែរយើងផងដែរ។នេះគឺជាធាតុផ្សំដ៏សំខាន់នៃការទាក់ទាញរបស់កម្ពុជានិងជាការបង្កើតអនុស្សាវរីយ៍គួរជាទីចងចាំសម្រាប់ភ្ញៀវទេសចរ។
ឯកឧត្តម បញ្ជាក់ថា៖ការធ្វើបដិសណ្ឋារកិច្ចល្អ និងការសម្រួលការធ្វើដំណើរនៅតាមច្រកទ្វារគឺជាការចូលរួមចំណែកមួយមិនអាចខ្វះបាន ក្នុងការផ្តល់បទពិសោធល្អដល់ភ្ញៀវទេសចរក៏ដូចជារក្សាបានមុខមាត់ប្រទេសជាតិ និងបង្កើនភាពទាក់ទាញថែមមួយកម្រិតទៀត។ លើសពីនេះក្រសួងក៏បានដាក់ចេញនូវយុទ្ឋនាការជាច្រើនដើម្បីជួយឱ្យវិស័យទេសចរណ៍សម្រេចបានលទ្ឋផលល្អដូចមុនពេលមានវិបត្តិកូវីដ-១៩ជាពិសេសការគិតគូរពីវិស័យទេសចរណ៍នៅខេត្តសៀមរាបផ្ទាល់តែម្តង។ តួយ៉ាង ក្នុងឆ្នាំ២០២៤នេះ រាជរដ្ឋាភិបាលកម្ពុជាបានដាក់ចេញ ឆ្នាំទស្សនាសៀមរាប ដែលជាការគាំទ្រនិងលើកស្ទួយដល់វិស័យទេសចរណ៍នៅសៀមរាប ការរៀបចំព្រឹត្តិការណ៍ និងសកម្មភាពនានាត្រូវបានផ្តោតមកលើគោលដៅខេត្តសៀមរាប។
អត្ថបទ និងរូបភាព ៖ យូ វង្ស
កែសម្រួល ហាំ ម៉េងហួត
