ប្រធានមន្ទីរវប្បធម៌ និងវិចិត្រខេត្តសៀមរាប លោក មួន សុភាព បានឱ្យដឹងថា ជាទូទៅសាធារណជនក្នុងខេត្តសៀមរាប មិនសូវស្គាល់ និងចាប់អារម្មណ៍ពីល្ខោននិយាយឡើយ ដែលជាសិល្បៈមួយប្រភេទកំពុងប្រឈមនឹងការបាត់បង់បន្តិចម្ដងៗ ព្រោះមិនសូវមានក្រុមសម្ដែង និងមិនសូវមានសិស្សរៀន ជាពិសេសនោះមិនសូវមានអ្នកគាំទ្រ។
លោក មួន សុភាព បញ្ជាក់ថា ដើម្បីការជំរុញ និងផ្សព្វផ្សាយពីសិល្បៈខ្មែរមួយនេះ មន្ទីរវប្បធម៌ខេត្ត សហការជាមួយនាយកដ្ឋានសិល្បៈទស្សនីយភាព និងសិល្បករល្ខោនមហាជនខេត្តសៀមរាប ស.ស.យ.កខេត្ត នឹងរៀបចំទស្សនីយភាពខ្មែរទម្រង់សិល្បៈល្ខោននិយាយ រឿង “ផ្កាស្រពោន” ដែលនឹងសម្តែងជូននាថ្ងៃទី២៨-២៩ ខែកញ្ញា ឆ្នាំ២០២៤ វេលាម៉ោង ៥នឹង០០នាទីល្ងាច នៅផ្សារហេរីថេក វ៉ក ក្រុងសៀមរាប ជាមួយនឹងការចូលរួមទស្សនាដោយសេរី។ ការសម្ដែងនេះដែរ ដើម្បីផ្សព្វផ្សាយធ្វើយ៉ាងឱ្យសាធារណជនបានយល់ដឹង និងចូលរួមក្នុងការថែរក្សាសិល្បៈល្ខោននិយាយ ហើយក៏ជាការលើកទឹកចិត្តទៅកាន់សិល្បករដែលមានឆន្ទះខ្ពស់ក្នុងការខិតខំហាត់ និងជាផ្នែកមួយក្នុងការទាក់ទាញភ្ញៀវទេសចរបានស្វែងយល់ពីវប្បធម៌ខ្មែរផងដែរ។
សូមជម្រាបថា លោក មួន សុភាព លើកឡើងបែបនេះ ក្នុងកម្មវិធីសន្ទនាមតិ របស់វិទ្យុ និងទូរទស្សន៍ជាតិខេត្ត កាលពីថ្ងៃទី០៩ ខែកញ្ញា ឆ្នាំ២០២៤ថ្មីៗនេះ។
បើតាមលោកប្រធានមន្ទីរក៏បានឱ្យដឹងទៀតថា កាលពីថ្ងៃទី១៣-១៦ ខែសីហាកន្លងទៅ មន្ទីរវប្បធម៌ខេត្តសៀមរាប បានបើកវគ្គបណ្តុះបណ្តាលល្ខោននិយាយដែលមានគ្រូបង្រៀនមកពីនាយកដ្ឋានសិល្បៈទស្សនីយភាពភ្នំពេញ ក្នុងគោលបំណងបង្ហាត់បង្រៀន បណ្តុះបណ្តាលទៅដល់ក្រុមសិល្បៈល្ខោនបាសាក់ខេត្តសៀមរាប ឱ្យចេះក្នុងការសម្តែងនូវសិល្បៈល្ខោននិយាយមួយកម្រិតទៀត។ ជាមួយគ្នានេះ លោកក៏សូមអំពាវនាវដល់សាធារណជនទូទៅចូលរួមគាំទ្រ និងផ្សព្វផ្សាយពីសិល្បៈល្ខោនខ្មែរឱ្យបានផុសផុល ព្រោះវាជាចំណែកមួយក្នុងការផ្សព្វផ្សាយអំពីវប្បធម៌ខ្មែរដែលមានតាំងពីដូនតា ទៅកាន់ភ្ញៀវទេសចរអន្តរជាតិផងដែរ៕
អត្ថបទ៖ មន្ត្រីវិទ្យុ
កែសម្រួល៖ លោក អ៊ុន ណារាជ្យ
