យុវចុងភៅខ្មែរ ក្នុងខេត្តសៀមរាប ចំនួនបីនាក់ បាននាំយកមុខម្ហូប ហហ្មុក ដ៏ល្បីល្បាញរបស់ខ្មែរ ដែលធ្វើដោយត្រីស្រស់ ផ្សំគ្រឿងមានកាពិបុក ខ្ទិះដូង និងយកមកចំហុយ ទៅប្រកួតក្នុងកម្មវិធីប្រកួតចម្អិនម្ហូបដ៏ធំ សម្រាប់ចុងភៅវ័យក្មេងក្រោមអាយុ ២៤ឆ្នាំ “Thailand World Junior Chef Battle 2024” រៀបចំឡើងដោយសមាគមចុងភៅថៃ និងសមាគមចុងភៅពិភពលោក(WAC) បានធ្វើឡើងនៅប្រទេសថៃ កាលពីថ្ងៃទី២៨ ដល់ទី៣១ ខែសីហា ឆ្នាំ២០២៤ កន្លងទៅថ្មីៗនេះ។
តំណាងក្រុមយុវចុងភៅរបស់កម្ពុជា លោក ឈុន ប៊ុនឈូ នារសៀលថ្ងៃទី១០ ខែកញ្ញា ឆ្នាំ២០២៤នេះ បានឲ្យដឹងថា កាលពីពេលថ្មីៗនេះ រូបលោក និងរួមជាមួយចុងភៅចំនួន២រូបផ្សេងទៀត គឺកញ្ញា អាត វ៉ាន់ លីដា និងលោកម៉ាន សុជាតិ បាននាំយកមុខម្ហូបតំណាងជាតិ គឺហហ្មុក ទៅចូលរួមប្រកួតប្រជែងក្នុងកម្មវិធីលំដាប់ពិភពលោក Thailand World Junior Chef Battle 2024 ដោយទទួលបានចំណាត់ថ្នាក់លេខ១ ផ្នែកម្ហូបតំណាងជាតិ។ លោកបន្តថា កម្មវិធីនេះ មានចុងភៅ១៦ក្រុម មកពីប្រទេសចំនួន១៣ ចូលរួមមានប្រទេសកម្ពុជា អូស្ត្រាលី ចិន ក្រិច ឥណ្ឌូនេស៊ី ម៉ាឡេស៊ី ម៉ាឌីវ ម៉ុងហ្គោលី សិង្ហបុរី កូរ៉េខាងត្បូង សហរដ្ឋអាមេរិក វៀតណាម និងថៃ ។
ប្រធានសមាគចុងភៅកម្ពុជា អ្នកនាង ប៉ុល គឹមសាន បានថ្លែងនូវការអបអរសាទរចំពោះយុវចុងភៅកម្ពុជា ទាំងបីនាក់ទទួលបានជ័យលាបភី។ កន្លងទៅសមាគមតែងតែបាននាំយកមុខម្ហូបរបស់ខ្មែរជាច្រើនមុខទៅបង្ហាញដល់បណ្តាប្រទេសនានានៅលើពិភពលោកដូចជា ហហ្មុក នំបញ្ចុក សម្លរការី ជាពិសេសគឺសម្លរកកូរ ៕
អត្ថបទ និងរូបភាព ជា ស្រស់
កែសម្រួល ហាំ ម៉េងហួត
