ឯកឧត្ដមនាយឧត្ដមសេនីយ៍ ទៀ សីហា ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ បានអញ្ជើញចូលរួមនិងសំណេះសំណាល ក្នុងពិធីអបអរសាទរខួប២០ឆ្នាំ នៃការអនុវត្ដគម្រោងសហគមន៍ដាអ៊ីលកម្ពុជា។ ក្នុងពិធីសំណេះសំណាលនេះ ធ្វើឡើងនៅខេត្ដសៀមរាប នាល្ងាចថ្ងៃទី៩ ខែកញ្ញា ឆ្នាំ២០២៤ ដោយមានការចូលរួមពីសំណាក់ ក្រសួងស្ថាប័នរាជរដ្ឋាភិបាល អាជ្ញាធរមានសមត្ថកិច្ចខេត្តសៀមរាប ស្ថាបនិកអង្គការ ជា អ៊ុល និងគណៈប្រតិភូសហគមន៍ដាអ៊ីល ប្រចាំសហរដ្ឋអាមេរិក រួមជាមួយសហគមន៍ និងវិស័យឯកជនកូរ៉េនៅកម្ពុជាផងដែរ។
ឯកឧត្ដមនាយឧត្ដមសេនីយ៍ ទៀ សីហា បានសម្ដែងការកោតសរសើរសម្រាប់ការកិច្ចខិតខំប្រឹងប្រែងក្នុងការលើកកម្ពស់សកម្មភាពមនុស្សធម៌នៅកម្ពុជា ចំពោះអង្គការដាអ៊ីលកម្ពុជា និងមានការរីកចម្រើនគួរឱ្យកត់សម្គាល់ក្នុងរយៈពេល២០ឆ្នាំកន្លងមកនេះ និងបានរួមចំណែកយ៉ាងសំខាន់ក្នុងការលើកកម្ពស់ជីវភាពប្រជាជន និងគ្រួសារ ក្រីក្រនៅក្នុងសហគមន៍ខេត្តសៀមរាប។ ឯកឧត្ដម មានប្រសាសន៍បន្ដថា រាជរដ្ឋាភិបាលកម្ពុជា បានបន្តកិច្ចសហប្រតិបត្តិការយ៉ាងជិតស្និទ្ធជាមួយអង្គការមិនមែនរដ្ឋាភិបាល លើវិស័យជាច្រើន ក្នុងគោលបំណងលើកកម្ពស់ចំណេះដឹង និងពង្រឹងការអនុវត្តច្បាប់ រួមជាមួយបញ្ហាប្រឈមនានា ដើម្បីស្វែងរកដំណោះស្រាយពាក់ព័ន្ធនឹងការអនុវត្តសកម្មភាពរបស់អង្គការដៃគូ។
ព័ត៌មានជាតិ ថ្មីៗ
ឯកឧត្ដម បានសម្តែងការគាំទ្រ និងលើកទឹកចិត្តចំពោះអង្គការដាអ៊ីលកម្ពុជា ឱ្យបន្តខិតខំបំពេញភារកិច្ចរបស់ខ្លួនឱ្យកាន់តែខ្លាំងក្លាថែមទៀត ដើម្បីឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ដែលបានដាក់ចេញនាពេលកន្លងមក។ ទន្ទឹមនឹងនេះស្ថាបនិកអង្គការដាអ៊ីល អន្ដរជាតិ នឹងនៅតែជួយផ្សព្វផ្សាយពីភាពរីកចម្រើនពិតនៅកម្ពុជា និងកៀរគរ ភ្ញៀវទេសចរមកកម្សាន្តនៅខេត្តសៀមរាបឱ្យបានច្រើនកុះករថែមទៀត។
តាមរយៈរបាយការណ៍របស់លោកស្រី សុខ មីចា ប្រធានអង្គការ ដាអ៊ីលកម្ពុជាប្រចាំខេត្តសៀមរាប បានបង្ហាញថា ក្នុងរយៈពេល២០ឆ្នាំកន្លងមកនេះ អង្គការដាអ៊ីល បានរួមចំណែកយ៉ាងសកម្មក្នុងសកម្មភាពមនុស្សធម៌ នៅខេត្តសៀមរាប មានជាអាទិ៍ ការសាងសង់សាលារៀន សហគមន៍ ការផ្គត់ផ្គង់អាហារូបត្ថម្ភ ការអប់រំ “ការផ្តល់ អាហារូបករណ៍ ការឧបត្ថម្ភសិស្សបន្តការសិក្សានៅសាកលវិទ្យាល័យ ការសិក្សាភាសាកូរ៉េ ភាសាអង់គ្លេស ការរៀបចំបណ្ណាល័យ ការបង្ហាត់តៃក្វាន់ដូ”ជាដើម ។ ទន្ទឹមនេះ អង្គការដាអ៊ុល ក៏បានផ្តល់ទូកនេសាទ ផ្តល់ធុងចម្រោះទឹកស្អាត បណ្តុះបណ្តាលជំនាញវិជ្ជាជីវៈ ដូចជា “ជំនាញធ្វើនំប៉័ង ផ្នែកសម្ផស្ស កាត់ដេរ ជួសជុលម៉ូតូ” និងបានផ្តល់ថវិកាអភិវឌ្ឍសហគមន៍ ផ្ដល់ពូជគោ សាងសង់ផ្លូវបេតុង ទាំងអស់នេះ សុទ្ធតែការរួមចំណែកក្នុងការកាត់បន្ថយ ភាពក្រីក្ររបស់ប្រជាពលរដ្ឋនៅក្នុងសហគមន៍ ៕
អត្ថបទ៖លោក ឈិត សាវី
កែសម្រួល៖ លោកស្រី សូ ស៊ីមាន
