យោងតាមរបាយការណ៍របស់មន្ទីរទេសចរណ៍ខេត្តសៀមរាប បានឱ្យដឹងថា រយៈពេល ១១ខែ ឆ្នាំ២០២៤នេះ ខេត្តសៀមរាប ទទួលបានភ្ញៀវទេសចរជាតិ និងអន្តរជាតិចំនួន ២.៨៦៥.៤៨៨នាក់ មានការកើនឡើងប្រមាណ ៣០ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំ២០២៣ ដែលមានចំនួន ២.២០៤.២៤១នាក់។
របាយការណ៍ដដែលបានឱ្យដឹងទៀតថា ក្នុងចំណោមតួលេខខាងលើ អ្នកទេសចរជាតិមានចំនួន ១.៩៦៧.១៥០នាក់ កើនឡើងប្រមាណ ៣០.៧៧ភាគរយ ធៀបនឹងឆ្នាំ២០២៣ ដែលមានចំនួនត្រឹមតែ ១.៥០៤.២៤៥នាក់។ ចំណែកភ្ញៀវទេសចរអន្តជាតិមានចំនួន ៨៩៨.៣៣៩នាក់ កើនឡើង ២៨.៣៣ភាគរយ បើធៀបនិងរយៈពេលដូចគ្នាឆ្នាំ២០២៣ ដែលមានចំនួន ៦៩៩.៩៩៦នាក់។
ស្របពេលជាមួយគ្នានោះ បច្ចុប្បន្នព្រលានយន្តហោះអន្តរជាតិសៀមរាបអង្គរ ទទួលបានជើងហោះហើរចូលមកចំនួនប្រមាណពី ២២-២៦ជើងហោះហើរ ក្នុងមួយថ្ងៃ ដែលមានអ្នកដំណើរចន្លោះពី ២.៥០០នាក់ ទៅ២.៨០០នាក់ក្នុងមួយថ្ងៃ ដោយក្នុងនោះជើងហោះហើរអន្តរជាតិរួមមាន មកពីប្រទេសថៃ មកពីប្រទេសវៀតណាម មកពីប្រទេសឡាវ និងមកពីប្រទេសសិង្ហបុរី។ ចំពោះជើងហោះហើរក្នុងស្រុក ក៏មានពីព្រលានយន្តហោះអន្តរជាតិភ្នំពេញ មកសៀមរាប និងពីខេត្តព្រះសីហនុ មកខេត្តសៀមរាបផងដែរ។
របាយការណ៍ខាងលើបានឱ្យដឹងទៀតថា ក្នុងរយៈពេល១១ខែ ឆ្នាំ២០២៤នេះ ចំណូលពីការលក់សំបុត្រចូលទស្សនារមណីយដ្ឋានអង្គរ គិតជាសាច់ប្រាក់បានចំនួន ៤១.៩០៨.៨៣៣ដុល្លារអាម៉េរិក និងការលក់សំបុត្រឱ្យភ្ញៀវចូលទៅកម្សាន្តតំបន់ចុងឃ្នៀស បានចំនួន ១៩៥.៦៤២នាក់ គិតជាសាច់ប្រាក់ស្មើនឹង ៧០០.០០៤ដុល្លារអាមេរិក៕
អត្ថបទ៖ លោក ជា ស្រស់
កែសម្រួល៖ លោក អ៊ុន ណារាជ្យ
