ថ្លែងក្នុងវេទិកាពិគ្រោះយោបល់ ស្តីពីភាពជាដៃគូរវាងរដ្ឋបាលខេត្តសៀមរាប និងអង្គការសង្គមស៊ីវិល នៅថ្ងៃទី០៥ ខែធ្នូ ឆ្នាំ២០២៤នេះ លោក អុឹង គឹមលាង អភិបាលរងខេត្ត បានបង្ហាញថា ក្នុងនាមជាសេនាធិការក្រសួងមហាផ្ទៃ សូមថ្លែងនូវការស្វាគមន៍ និងស្នើឱ្យដៃគូអភិវឌ្ឍទាំងអស់បន្តការគាំទ្រ និងចូលរួមដោយស្មោះត្រង់បំផុតជាមួយរាជរដ្ឋាភិបាលកម្ពុជា អាជ្ញាធរខេត្ត ក្នុងការលើកកម្ពស់លទ្ធិប្រជាធិបតេយ្យ សេរីពហុបក្ស និងការគោរពសិទ្ធិមនុស្ស គាំទ្រកិច្ចដំណើរការវិស័យកំណែទម្រង់នានា របស់រាជរដ្ឋាភិបាល ជាពិសេសកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ។
លោក អុឹង គឹមលាង បានបញ្ជាក់ថា គ្រប់សមាគម និងអង្គការសង្គមសុីវិលទាំងអស់ ត្រូវចៀសវាងឱ្យបានដាច់ខាតនូវសកម្មភាពទាំងឡាយណា ដែលអាចជាប់ពាក់ព័ន្ធ ឬគាំទ្រដល់ការលាងសម្អាតប្រាក់ ហិរញ្ញប្បទាន ភេរវកម្ម និងហិរញ្ញប្បទានអាវុធប្រល័យលោកជាដើម ដើម្បីចៀសផុតពីការធ្វើឱ្យកម្ពុជាធ្លាក់ចូលទៅក្នុងបញ្ជីប្រផេះ និងទទួលបច្ច័យជាអវិជ្ជមានលើផ្នែកប្រព័ន្ធហិរញ្ញវត្ថុ លំហូរវិនិយោគ និងនយោបាយ។
លោកអភិបាលរងខេត្ត ក៏បានថ្លែងកោតសរសើរ ចំពោះអង្គការសមាគមស៊ីវិលក្នុងខេត្ត ដែលបានដើរតួនាទីយ៉ាងសំខាន់ ក្រោមកិច្ចសហការជាមួយស្ថាប័នរដ្ឋ ចូលរួមក្នុងការងារអភិវឌ្ឍសង្គម ពាក់ព័ន្ធលើវិស័យអប់រំ កសិកម្ម សិប្បកម្ម សុខាភិបាល សង្គមកិច្ច បណ្តុះបណ្តាលវិជ្ជាជីវៈ សិល្បៈ កិច្ចការបរិស្ថាន និងអភិរក្សធនធានធម្មជាតិ ព្រៃឈើ ទេសចរណ៍ គ្រឿងញៀន សាសនា លើកកម្ពស់សិទ្ធិស្ត្រី កុមារ និងការពារជនងាយរងគ្រោះ ច្បាប់ និងសិទ្ធិមនុស្សជាដើម។
បើតាមលោកស្រី ញាណ ភួងម៉ាលី ប្រធានបណ្ដាញសមាគមអង្គការមិនមែនរដ្ឋាភិបាលប្រចាំខេត្តសៀមរាប បានបង្ហាញថា កន្លងមកសមាគម និងអង្គការមិនមែនរដ្ឋាភិបាលមួយចំនួនក្នុងខេត្ត បានសហការ និងអនុវត្តការងារប្រកបដោយការទទួលខុសត្រូវខ្ពស់។ ប៉ុន្តែយ៉ាងណាក៏នៅមានអង្គការមួយចំនួនតូច និងអាជ្ញាធរពាក់ព័ន្ធមួយចំនួន ហាក់នៅមានភាពចន្លោះប្រហោងក្នុងការសហការគ្នា ដែលការនេះសូមជំរុញឱ្យអ្នកទាំងនោះ ពង្រឹងឡើងវិញនូវកិច្ចការទាំងអស់នេះ ធ្វើយ៉ាងណាជំរុញឱ្យកម្ពុជាមានការរីកចម្រើនបន្ថែមទៀត៕
អត្ថបទ និងរូបភាព៖ លោក អ៊ុន ណារាជ្យ
