នៅវេលាម៉ោងប្រមាណ១រំលងអាធ្រាត្រ រហូតដល់ម៉ោង៤ទាបភ្លឺ ថ្ងៃទី១៥ ខែសីហា ឆ្នាំ២០១៨នេះ កំលាំងនគរបាលរបស់អធិការដ្ឋានស្រុកពួក បានល្បាតតាមរកចាប់ខ្លួនជនសង្ស័យជនជាតិចិនចំនួន ៣នាក់ ពាក់ព័ន្ធនឹងករណីបានធ្វើសកម្មភាពលួចមានស្ថានទំងន់ទោស(ប្លន់)ស្ថិតនៅភូមិអូរតាប្រាក់ ឃុំពួក ស្រុកពួក ខេត្តសៀមរាប។ជាលទ្ធផលកំលាំងនគរបាល បានឃាត់ខ្លួនជនសង្ស័យបានទាំងអស់សរុប ៣នាក់ ជនសង្ស័យដែលសមត្ថកិច្ចឃាត់ខ្លួនបានមានឈ្មោះ៖
១-ឈ្មោះ ហូ មីង ឆាវ (Hu Ming Chao) ភេទប្រុស អាយុ៤៣ឆ្នាំ ជនជាតិចិន មកពីខេត្តហឹណាន (Hernan) ស្នាក់នៅក្រុងសៀមរាប។
២-ឈ្មោះ លី សៅស៊ី (Ly Xiao Si) ភេទប្រុស អាយុ៣៨ឆ្នាំ ជនជាតិចិន មកពីខេត្តហឹណាន (Hernan) ស្នាក់នៅក្រុងសៀមរាប។
៣-ឈ្មោះ ចាង យ៉ុង ស៊ីង (ZHANG YONG SHENG) ភេទ ប្រុស អាយុ ៤៨ឆ្នាំ ជនជាតិចិន។
ចំណែកឯជនរងគ្រោះឈ្មោះ តៅ សុភា ភេទ ស្រី អាយុ ៤៤ឆ្នាំ មុខរបរ លក់មាស និងប្តូរប្រាក់នៅផ្សារលើ ក្រុងសៀមរាប មានទីលំនៅភូមិអូរតាប្រាក់ ឃុំពួក ស្រុកពួក ខេត្តសៀមរាប។
បើតាមការសួរចំលើយបឋមរបស់សមត្ថកិច្ច ពួកគេបានឆ្លើយថាគេបានទៅកន្លែងកើតហេតុមែន តែមិនឆ្លើយពីសកម្មពួកគេឡើយ។ បច្ចុប្បន្ន ជនសង្ស័យទាំងបីនាក់ នឹងត្រូវបញ្ជូនខ្លួនមកសាកសួរបន្ត នៅស្នងការដ្ឋាននគរបាលខេត្តសៀមរាប។
ព័ត៌មានជាតិ ថ្មីៗ
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក សេង ផល្លី
