ប៉ូលិសប៉ុស្តិ៍សង្កាត់គោចកម្នាក់ ត្រូវឃាតករចាក់សម្លាប់ ពេលជិតមកដល់ផ្ទះ ចម្ងាយប្រហែល២០០ម៉ែត្រ ដោយប្រើកូនកាំបិតចិតបន្លែចុងស្រួច សង្ស័យជារឿងគំនុំ។ហេតុការនេះបានកើតឡើង នៅព្រឹកព្រលឹមថ្ងៃទី១៥ខែសីហាឆ្នាំ២០១៨ ស្ថិតនៅតាមបណ្តោយផ្លូវគ្រួសក្រហម ពីថ្នល់ជាតិចម្ងាយប្រហែល៤០០ម៉ែត្រ ស្ថិតនៅក្រុមទី១១ ភូមិធ្លកអណ្តូង សង្កាត់ស្លក្រាម ក្រុងខេត្តសៀមរាប។តាមសាក្សីនៅកន្លែងកើតហេតុ បានប្រាប់ឲ្យដឹងថាមុនពេលកើតហេតុ ពួកគេកំពុងដេកនៅក្នុងផ្ទះ ស្រាប់តែមានម៉ូតូ២ទៅ៣គ្រឿង ជិះដេញចាក់គ្នា ដូចក្នុងរឿងហុងកុងអញ្ចឹង ស្រាប់តែមួយសន្ទុះ ក៏ស្ងាត់ ឆឹង ។
ប្រភពដដែល បានបន្តថាបន្ទាប់ពីស្ងាត់ស្រែកហើយ ពួកគាត់ក៏ដាស់គ្នាចេញមកក្រៅមើល ស្រាប់តែមានមនុស្សដេកស្លាប់នៅតាមផ្លូវគ្រួសក្រហម ចម្ងាយពីផ្ទះសាក្សីប្រហែល៣០ម៉ែត្រ រួចឃើញមានអ្នកជិតខាងគាត់ បានខលទៅប៉ូលីសមូលដ្ឋាន ដើម្បីរាយការណ៍អំពីករណីមនុស្សស្លាប់ ខណៈពេលនោះ ក៏ឃើញមានប៉ូលីសប៉ុស្តិ៍សង្កាត់ស្លក្រាម និង ប៉ូលីសក្រុងខេត្ត មកដល់កន្លែងកើតហេតុភ្លាមៗផងដែរ។
តាមប្រភពពីសមត្ថកិច្ច ដែលបានចុះមកដល់កន្លែងកើតហេតុបានឲ្យដឹងថា ជនរងគ្រោះដែលស្លាប់នោះមានឈ្មោះ ហ៊ឹម វណ្ណរ៉ូ ភេទប្រុសអាយុ២៧ឆ្នាំ មុខងារព្រិន្ទបាលឯក ជាមន្ត្រីប៉ូលីសប៉ុស្តិ៍សង្កាត់គោកចក ក្រុងសៀមរាប មានទីលំនៅក្រុមទី១១ ភូមិធ្លកអណ្តូង សង្កាត់ស្លក្រាមក្រុងខេត្តសៀមរាប។
ប្រភពសមត្ថកិច្ចដដែល បានបន្តថានៅយប់ថ្ងៃទី១៤ខែសីហា ឆ្នាំ២០១៨ ជនរងគ្រោះបានជិះម៉ូតូ ទៅលេងផ្ទះបងធម៌ ដូចសព្វដង នៅកសិណអង្គរ ហើយធ្លាប់ដេកនៅទីនោះផងដែរ លុះដល់យប់កើតហេតុ ជនរងគ្រោះបានសម្រាកពីការងារ(មិនត្រូវចំវេនប្រចាំការ) ក៏បានជិះម៉ូតូមកផ្ទះទាំងយប់ តាមផ្លូវគ្រួសក្រហម ជិតដល់ផ្ទះហើយ ក៏ត្រូវមានជនសង្ស័យ ដេញតាមពីក្រោយ ចាក់សម្លាប់ទាំងអាធ្រាតឈានចូលថ្ងៃទី១៥ខែសីហា ដោយប្រើកូនកំាបិតចុងស្រួចចំនួន២ដើម ១ដើមដងខ្មៅ ប្រវែង៣តឹក និង១ដើមទៀតដងខៀវលាយសប្រវែង៣តឹក ចាក់ជនរងគ្រោះ ត្រូវចំដងខ្លួនខាងមុខចំនួន៩កាំបិត និង ខាងខ្នងចំនួន១កាំបិត បណ្តាលឱ្យស្លាប់ភ្លាមៗ រួចជនសង្ស័យក៏ទំលាក់កាំបិត ២ដើមនោះចោល ក្បែរសាកសព។
ក្រោយពេលកើតហេតុ កំលាំងជំនាញ ដែលបានចុះមកដល់កន្លែងកើតហេតុ និងបានធ្វើកោសល្យវិនិច្ឆ័យរួច បានសន្និដា្ឋនថាជនរងគ្រោះពិតជាត្រូវឃាតករ(ជនដៃដល់)ចាក់សម្លាប់ ហើយជនសង្ស័យមានគ្នាចាប់២ ទៅ៣នាក់ ប្រហែលជារឿងគំនុំ ព្រោះទ្រព្យសម្បត្តិ ឃើញនៅទាំងអស់ កន្លែងកើតហេតុ។
បច្ចុប្បន្ន សាកសពជនរងគ្រោះ ត្រូវបានកំលាំងជំនាញប្រគល់ឱ្យក្រុមគ្រួសារយកទៅបូជានៅវត្តត្រាំនាគ ស្ថិតនៅក្នុងភូមិធ្លកអណ្តូង សង្កាត់ស្លក្រាម ក្រុងសៀមរាបនៅព្រឹកថ្ងៃដដែល ចំណែកជនសង្ស័យកម្លាំងជំនាញកំពុងធ្វើការស្រាវជ្រាវ ដើម្បីចាប់ខ្លួនយកផ្តន្ទាទោសទៅតាមផ្លូវច្បាប់ឱ្យខានតែបាន៕
អត្ថបទ និង រូបថត ៖ លោក ថាច់ ពិសុទ្ធ និង លោក ជា ស្រស់
កែសម្រួលអត្ថបទ ៖ លោក សេង ផល្លី
