សិស្សានុសិស្សនិទ្ទេស A ក្នុងខេត្តសៀមរាប បានលើកឡើងថា ដើម្បីជួយឱ្យការសិក្សារបស់សិស្សានុសិស្សទទួលបានជោគជ័យ គឺមានកត្តាជាច្រើនរួមសមគ្នា ដូចជា៖ ខ្លួនឯង គ្រួសារ សាលារៀន និងសង្គមជាតិ។ ប៉ុន្តែក្នុងនោះ “កត្តាខ្លួនឯង” គឺជាកត្តាធំជាងគេដែលអាចធ្វើឱ្យសិស្សានុសិស្សទទួលបានជោគជ័យក្នុងការសិក្សានាពេលបច្ចុប្បន្ន និងទៅថ្ងៃអនាគត។
យុវតី ហោ ឆិឆាណាន និងយុវជនថោង និស្ស័យ បានលើកឡើងថា ដើម្បីឲ្យការសិក្សាទទួលបានជោគជ័យ ទាមទារឲ្យសិស្សានុសិស្សគ្រប់រូបមានគោលដៅឱ្យច្បាស់លាស់ តាមរយៈការប្រើប្រាស់ពេលវេលា រៀបចំកាលវិភាគនៃការសិក្សាទាំងនៅសាលារៀន និងនៅផ្ទះ ដោយការខិតខំមើលមេរៀន ដោះស្រាយលំហាត់ឲ្យបានច្រើន។ ក្នុងនោះដែរ ដើម្បីទទួលបានលទ្ធផលល្អ មានកត្តារួមជាច្រើន តែ “កត្តាខ្លួនឯង” គឺជាកត្តាមួយដែលចាំបាច់បំផុតសម្រាប់សិស្សានុសិស្សទទួលបានជោគជ័យក្នុងការសិក្សា។
ក្នុងនោះផងដែរ យុវតី២រូបដែលមកពីស្រុកជីក្រែង និងស្រុកក្រឡាញ់ បានលើកឡើងថា ទោះជាសាលានៅតាមជនបទ ឬនៅតាមទីក្រុងក៏ដោយ ការខិតខំសិក្សាស្ដាប់គ្រូពន្យល់ និងសិក្សាបន្ថែមដោយខ្លួនឯង តាមរយៈការសិក្សាស្រាវជ្រាវ និងចេះសួរមិត្តភក្តិបន្ថែមទើបទទួលបានលទ្ធផលល្អ ។
ជាមួយគ្នានេះដែល យុវតី ម៉ីហ្វាង ដែលទទួលបាននិទ្ទេស អេ(A) ក៏បានលើកឡើងដែលថា កាសិក្សា ទទួលលទ្ធផលល្អនេះ ខ្លួនពិតជាសប្បាយចិត្ត និងថ្លែងអំណរគុណដល់រាជរដ្ឋាភិបាល ដែលដឹកដោយសម្តេចបវរធិបតី ហ៊ុន ម៉ាណែត ដែលដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីកំណត់ចក្ខុវិស័យនៅក្នុងការដឹកនាំកម្ពុជា ឆ្ពោះទៅរការរីកចំម្រើន ក្នុងនោះការអប់រំ និងការកសាងធនធានមនុស្សក៏នៅតែជាវិស័យអាទិភាពរបស់រាជរដ្ឋាភិបាល។
(កិច្ចសម្ភាសន៍៣)
សូមបញ្ជាក់ដែរថា៖ សម្រាប់ឆ្នាំសិក្សា២០២៣-២០២៤នេះ នៅខេត្តសៀមរាប មានបេក្ខជនដែលបានមកប្រឡងចំនួន១០.៧៣៦នាក់ ស្រី៦.២៥៧នាក់ ក្នុងនោះសិស្សដែលបានប្រឡងជាប់សញ្ញាបត្រមធ្យមសិក្សាទុតិយភូមិ មានចំនួន៩.១២៥នាក់ ស្រី៥.៥០៤នាក់ ។ ក្នុងនោះ សិស្សទទួលបាននិទ្ទេស Aចំនួន២២១នាក់ ស្រី១២២នាក់ , និទ្ទេស B ចំនួន៨៦៤នាក់, និទ្ទេស Cចំនួន២០៧១នាក់, និទ្ទេស D មានចំនួន៣.២៩៨នាក់ និង និទ្ទេស E មានចំនួន២.៦៧១នាក់៕
អត្ថបទ និងរូបភាព ៖លោក ហាំ ម៉េងហួត
