អគារសិក្សាចំនួន៨ខ្នង ស្មើនឹង៣៤បន្ទប់ និងសមិទ្ធផលជាច្រើនទៀត ស្ថិតក្នុងសាលាបឋមសិក្សាខ្នារ ក្នុងសង្កាត់ជ្រាវ ក្រុងសៀមរាប ខេត្ដសៀមរាប ត្រូវបានសម្ពោធដាក់ឱ្យប្រើប្រាស់ជាផ្លូវការ កាលពីរសៀលថ្ងៃទី២១ ខែមករា ឆ្នាំ២០២៥នេះ ក្រោមវត្តមាន ឯកឧត្ដម អ្នកឧកញ៉ា សៀង ណាំ តំណាងរាស្ដ្រខេត្ដសៀមរាប ដោយមានការចូលរួមពី លោកស្រី ម៉មនី រង្សី អភិបាលរងខេត្ត រួមនឹងវត្តមានឯកឧត្តម លោកជំទាវសមាជិកក្រុមប្រឹក្សាខេត្ត តំណាងមន្ទីរអង្គភាព អាជ្ញាធរមូលដ្ឋាន តំណាងសប្បុរសជន អង្គការក្រៅរដ្ឋាភិបាល និងសិស្សានុសិស្សជាច្រើនរូប។
ឯកឧត្ដម អ្នកឧកញ៉ា សៀង ណាំ មានប្រសាសន៍ថា រយៈពេល៤៦ឆ្នាំ បន្ទាប់ពីបានបញ្ចប់សង្គ្រាម កម្ពុជាទទួលបានការអភិវឌ្ឍលើគ្រប់វិស័យ ដែលនេះជាផ្លែផ្កាកើតចេញពីសន្តិភាព បើគ្មានសន្ដិភាពទេ វិស័យអប់រំក៏ដូចជាវិស័យផ្សេងៗទៀត មិនមានដូចបច្ចុប្បន្ននេះដែរ។ របបប្រល័យពូជសាសន៍ខ្មែរក្រហម បានបំផ្លាញនូវអ្វីៗទាំងអស់ ប៉ុន្ដែដើម្បីដឹកនាំកម្ពុជាចេញពីទ្វារនរកនេះ សម្តេចតេជោ ហ៊ុន សែន និងឥស្សរជននានា បានធ្វើពលិកម្មគ្រប់បែបយ៉ាងរំដោះប្រទេសចេញពីរបបអាវខ្មៅ នៅថ្ងៃ ៧មករា ១៩៧៩។ ជាមួយគ្នានយោបាយឈ្នះឈ្នះ ដែលដាក់ចេញដោយសម្តេចតេជោ បានបញ្ចប់សង្គ្រាម និងនាំសន្តិភាពមកជូនជាតិមាតុភូមិកម្ពុជាពេញលេញនៅខែធ្នូ ឆ្នាំ១៩៩៨។
ឯកឧត្តម មានប្រសាសន៍ថា ធាតុពិតជាក់ស្តែងដែលកម្ពុជា ធ្លាប់ឆ្លងកាត់នោះ គឺការបែកបាក់សាមគ្គីជាតិយើង បានធ្វើឱ្យប្រទេសយើងខ្ទេចខ្ទាំអស់ ទម្រាំកសាងបានដូចសព្វថ្ងៃ។ បណ្តាប្រទេសមួយចំនួនដែលបាននឹងកំពុងមានសង្គ្រាម តើប្រទេសទាំងនោះ អាចមានឱកាសកសាងប្រទេសបានដែរ ឬទេ ដូច្នេះសន្តិភាពនេះមានតម្លៃណាស់ បើមិនមានសន្តិភាពទេ យើងគ្មានឱកាសណាដើម្បីអភិវឌ្ឍន៍ប្រទេសដូចសព្វថ្ងៃនេះទេ។ ចាប់តាំងពីមានសន្តិភាព កម្ពុជាមានការអភិវឌ្ឍរីកចម្រើនគ្រប់វិស័យ ដូចដែលយើងបានឃើញនៅចំពោះមុខ គឺអគារសិក្សាទាំង៨ខ្នង និងសមិទ្ធផលនានា នៅសាលាបឋមសិក្សាខ្នារ ដែលសម្ពោធដាក់ឱ្យប្រើប្រាស់នាពេលនេះជាឧទាហរណ៍ស្រាប់ ដែលត្រូវបានជួយឧបត្ថម្ភគាំទ្រពីសប្បុរសជន និងអង្គការក្រៅរដ្ឋាភិបាល ដូចជាអង្គការអេដអាក់ស្យុង ព្រមទាំងពីការធ្វើបុណ្យកឋិនទានសាមគ្គីផងដែរ។
ឯកឧត្តម ក៏បានស្នើដល់ប្អូនៗ ក្មួយៗ ចៅៗ និងលោកគ្រូអ្នកគ្រូ មាតាបិតាអ្នកអាណាព្យាបាលសិស្សទាំងអស់ ត្រូវជំរុញលើកទឹកចិត្តកូនចៅឱ្យបានរៀនសូត្រចប់ចុង ចប់ដើម លោកគ្រូអ្នកគ្រូត្រូវបន្តចែករំលែកចំណេះដឹងដល់សិស្សឱ្យអស់ពីសមត្ថភាពទៅតាមនិយាមគរុកោសល្យ ហើយក្មួយៗចៅៗត្រូវខិតខំសិក្សារៀនសូត្រ ដើម្បីទទួលបានចំណេះដឹងពិតប្រាកដ ឱ្យក្លាយជាធនធានមនុស្សប្រកបដោយសក្តានុពល មានគុណធម៌ ចរិយាធម៌ល្អប្រពៃ ដែលឆ្លើយតបទៅនឹងសំណូមពរនៃការអភិវឌ្ឍសង្គមសេដ្ឋកិច្ច ដើម្បីកសាងកម្ពុជាបានរីកចម្រើនជឿនលឿនបន្ថែមទៀត៕
អត្ថបទ និងរូបភាព៖ លោក ឈិត សាវី, យូ វង្ស
កែសម្រួល៖ លោក អ៊ុន ណារាជ្យ
