កាលពីរសៀលថ្ងៃទី២៣ ខែមករាម្សិលមិញនេះ ក្រុមការងារអនុគណៈកម្មាធិការដោះស្រាយបញ្ហាជនអនាថា អ្នកសុំទាន និងជនវិបល្លាសស្មារតី ខេត្តសៀមរាប សហការជាមួយរដ្ឋបាលក្រុងសៀមរាប បាននាំយកស្រ្តីម្នាក់ និងបុរសម្នាក់ ជាជនមានវិបល្លាសស្មារតី ដែលតែងបង្កការរំខានដល់ប្រជាពលរដ្ឋ ទៅពិនិត្យសុខភាពនៅមន្ទីរបង្អែកខេត្តសៀមរាប និងបញ្ជូនបន្ត ដើម្បីទទួលការព្យាបាលនៅមជ្ឈមណ្ឌលស្ដារនីតិសម្បទាជនវិបល្លាសស្មារតីនៅភូមិបារគូ ឃុំបារគូ ស្រុកកណ្ដាលស្ទឹង ខេត្តកណ្ដាល។
តាមការឱ្យដឹងពីមន្ត្រីជំនាញ នៃ មន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប បង្ហាញថាជនវិបល្លាសទាំងពីររូបនេះ ត្រូវបានទទួលការព្យាបាល ដែលចំណាត់ការនេះ គឺជាការយកចិត្តទុកដាក់ពីអាជ្ញាធរខេត្ត ដើម្បីរក្សាបាននូវសន្តិសុខ សណ្តាប់ធ្នាប់របៀបរៀបរយសាធារណៈ ជាពិសេសជនរងគ្រោះ និងងាយរងគ្រោះ ដោយមិនទុកឱ្យប្រជាជនរស់នៅដោយគ្មានសុវត្តិភាពនោះឡើយ។
តាមលិខិតបញ្ជាក់ សុខភាពផ្លូវចិត្ត របស់មន្ទីរពេទ្យបង្អែកខេត្តសៀមរាប ដែលពិនិត្យ និងសម្ភាសន៍ ដោយលោកវេជ្ជ. មុំ សុវណ្ណារ៉ា ឯកទេសវិកលវិទ្យា បានឲ្យដឹងថា ស្រ្តីម្នាក់ អាយុ៤៦ឆ្នាំ រស់នៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប បានពិនិត្យឃើញថាស្រ្តីរូបនេះ មានជម្ងឺវិកលចរិក (Schizophrenia- Schizoaffective) និងបុរសម្នាក់ទៀត អាយុ៣៧ឆ្នាំ រស់នៅភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប បានពិនិត្យឃើញថាបុរសរូបនេះ មានជម្ងឺវិកលចរិក (Schizophrenia)។
សូមបញ្ជាក់ដែរថា តាមរបាយការណ៍បូកសរុបលទ្ធផលការងារប្រចាំឆ្នាំ២០២៤ របស់រដ្ឋបាលខេត្តសៀមរាប បានឱ្យដឹងថា មជ្ឈមណ្ឌលសំចតសង្គមកិច្ច បានទទួលជនរងគ្រោះ ជនអនាថា អ្នកសុំទាន និងជនវិបល្លាសស្មារតីឱ្យស្នាក់នៅ មានចំនួន ២៩៣នាក់ ព្រមទាំងបានបញ្ជូនទៅគ្រួសារ សាច់ញាតិ និងសហគមន៍វិញ ចំនួន ២៥២នាក់ និងបានបញ្ជូនជនរងគ្រោះ ជនវិបល្លាសស្មារតីទៅព្យាបាលនៅមជ្ឈមណ្ឌលថែទាំ និងស្ដារនីតិសម្បទាជនវិបល្លាសស្មារតី នៅភូមិបារគូ ឃុំបារគូ ស្រុកកណ្ដាលស្ទឹង ខេត្តកណ្ដាល ចំនួន ៤១នាក់ ៕
អត្ថបទ និងរូបភាព : លោក ហាំ ម៉េងហួត
កែសម្រួល : មន្ទីរព័ត៌មានខេត្តសៀមរាប
