នៅព្រឹកថ្ងៃទី២៤ ខែមករា ឆ្នាំ២០២៥នេះ អង្គការទស្សនពិភពលោក និងរដ្ឋបាលខេត្ដសៀមរាប បានបើកកិច្ចប្រជុំពិភាក្សាស្វែងរកការផ្ដល់ធាតុចូល និងការគាំទ្រពីអ្នកពាក់ព័ន្ធ សម្រាប់រៀបចំយុទ្ធនាការគ្រប់គ្រាន់ ដែលគ្រោងនឹងធ្វើឡើងនៅថ្ងៃទី២២ខែកុម្ភៈ ឆ្នាំ២០២៥ខាងមុខនេះ ដោយដឹកនាំប្រជុំក្រោមអធិបតីភាព លោក អ៊ឹង គឹមលាង អភិបាលរងខេត្ត និងមានការចូលរួមពីអង្គភាពពាក់ព័ន្ធ និងតំណាងអង្គការទស្សនពិភពលោក សរុបប្រមាណ៣០នាក់។
ជាមួយគ្នានេះដែរ លោក ឈន តុលា ប្រធានតំបន់ប្រតិបត្ដិប្រចាំខេត្ដសៀមរាប បានលើកឡើងក្នុងកិច្ចប្រជុំពិភាក្សាថា គោលបំណងនៃយុទ្ធនាការនេះ ដើម្បីអំពាវនាវឱ្យមានការវិនិយោគ ភាពជាម្ចាស់ និងការប្តេជ្ញាចិត្តពីភាគីពាក់ព័ន្ធ ដើម្បីកែលម្អរបបអាហារដែលមានសុខភាព និងជម្រុញការប្តេជ្ញាចិត្តក្នុងចំណោមភាគីពាក់ព័ន្ធនានា ក្នុងការអនុវត្តយុទ្ធសាស្ត្រសន្តិសុខស្បៀងជាតិ ឆ្នាំ២០២៤-ឆ្នាំ២០២៨ ព្រមទាំងលើកកម្ពស់ការយល់ដឹង និងផ្សព្វផ្សាយ ស្តីអំពីសុវត្ថិភាពចំណីអាហារ របបអាហារដែលមានសុខភាពល្អ ការជ្រើសរើសអាហារ និងទម្លាប់នៃការបរិភោគ។
លោកក៏មានប្រសាសន៍បន្ដថា អ្នកចូលរួមយុទ្ធនាការកម្មវិធីគ្រប់គ្រាន់នៅថ្នាក់ក្រោមជាតិ មានវាគ្មិនសំខាន់ៗចូលរួមតាមរយៈសុន្ទរកថាគន្លឹះៗ អំពីសមិទ្ធផល វឌ្ឍនភាព និងការប្តេជ្ញាចិត្តក្នុងការលើកកម្ពស់សន្តិសុខស្បៀង និងអាហារូបត្ថម្ភនៅកម្ពុជាក្នុងកម្រិតថ្នាក់ក្រោមជាតិ ព្រមទាំងមានអ្នកចូលរួមមកពីគ្រប់ស្ថាប័នពាក់ពន្ធ័ ដៃគូអភិវឌ្ឍន៍ អង្គការក្រៅរដ្ឋាភិបាល អ្នកស្រាវជ្រាវ ប្រតិបត្តិករអាជីវកម្មម្ហូបអាហារ កសិករ សិស្សានុសិស្ស និងក្រុមយុវជន នៅថ្នាក់ក្រោមជាតិ ដើម្បីចូលរួម អបអរសាទរការផ្សព្វផ្សាយ និងធ្វើឲ្យប្រសើរឡើងសុវត្ថិភាពចំណីអាហារ ក៏ដូចជាបញ្រ្ជាបនូវការយល់ដឹងអំពី ការគ្រប់គ្រងឧប្បត្តិវហេតុសុវត្ថិភាពចំណីអាហារនៅក្នុងតំបន់។
ក្នុងនោះផងដែរ លោក អ៊ឹង គឹមលាង អភិបាលរងខេត្ដសៀមរាប បានសម្ដែងការពេញចិត្ដចំពោះគម្រោងយុទ្ធនាការកម្មវិធីគ្រប់គ្រាន់ នៅថ្នាក់ក្រោមជាតិរបស់អង្គការទស្សនពិភពលោក ព្រោះនាពេលបច្ចុប្បន្ន ការទទួលទានអាហាររបស់ប្រជាពលរដ្ឋ កំពុងប្រឈមនឹងផលប៉ះពាល់ដល់សុខភាព ខណៈដែលការលក់ចំណីអាហារមួយចំនួនរបស់អាជីវករ មិនមានការត្រួតពិនិត្យត្រឹមត្រូវពីអ្នកជំនាញសុខាភិបាល។
ជាមួយគ្នានេះ ក្បួនដង្ហែរអមដោយពាក្យស្លោក ឱ្យមានអត្ថន័យគ្រប់គ្រាន់ ហើយឱ្យមានការចូលរួមពីបណ្ដាអង្គការក្រៅរដ្ឋាភិបាល ប្រជាពលរដ្ឋ យុវជន សិស្សានុសិស្ស សមាគមស្រូវអង្ករ អាជីវករ ដៃគូរពាក់ព័ន្ធ ព្រមទាំងមានការចូលរួមពីមន្ដ្រីរាជការតាមមន្ទីរអង្គភាពពាក់ព័ន្ធផងដែរ។
សូមបញ្ជាក់ថា យុទ្ធនាការកម្មវិធីគ្រប់គ្រាន់ ក៍មានការដង្ហែក្បួនចេញពីវត្ដដំណាក់ ឆ្ពោះទៅកាន់ទីតាំងសួនច្បារព្រះរាជដំណាក់ ក្រុងសៀមរាប អមជាមួយពាក្យស្លោកនៃយុទ្ធនាការ ជីវជាតិគ្រប់គ្រាន់ អាហារគ្រប់គ្រាន់ សម្រាប់ការកែលម្អភាពចម្រុះនៃរបបអាហាររបស់កុមារ ដែលអាចធ្វើឱ្យស្ថានភាពសុខភាពកាន់តែប្រសើរឡើង។
អត្ថបទ និងរូបភាព៖ លោក ឈិត សាវី
កែសម្រួល៖ លោក ហាំ ម៉េងហួត
