ករណីក្រុមក្មេងទំនើងចំនួន ០២ក្រុម ដែលបានបង្កឱ្យប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់ក្នុងក្រុងសៀមរាប ត្រូវបានកម្លាំងការិយាល័យអន្តរាគមន៍ សហការជាមួយកម្លាំងផែនការងារនគរបាលព្រហ្មទណ្ឌ នៃស្នងការនគរបាលខេត្តសៀមរាប ធ្វើការស្រាវជ្រាវ និងឃាត់ខ្លួនបានជនសង្ស័យសរុប ០៩នាក់ នេះបើតាមការផ្សព្វផ្សាយរបស់ ការិយាល័យអន្តរាគមន៍ និងតម្រួតបទបញ្ជា នៃស្នងការដ្ឋាននគរបាលខេត្តសៀមរាប នៅថ្ងៃទី២៧ ខែមករានេះ។
តាមការផ្សព្វផ្សាយដដែល បញ្ជាក់ថា ក្រុមក្មេងទំនើងខាងលើ បានចេញធ្វើសកម្មភាពដាច់ដោយឡែកពីគ្នា ដោយក្រុមទី១ មានគ្នាចំនួន ០៦នាក់ បានធ្វើសកម្មភាពប្រដាប់ដោយដាវចំនួន០១ដើម បង្កហិង្សា លើជនរងគ្រោះត្រង់ចំណុចផ្លូវសុខសាន្ត ស្ថិតក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប វេលាម៉ោងប្រមាណ ១២អាធ្រាត្រឈានចូលថ្ងៃទី២៦ ខែមករាម្សិលមិញនេះ។ និងក្រុមទី២ មានគ្នាចំនួន ០៣នាក់ ប្រដាប់ដោយកាំបិតចំនួន ០១ដើម ដាក់តាមខ្លួន និងបានជិះម៉ូតូចំនួន០១គ្រឿង ចូលមកក្នុងក្រុងសៀមរាប តាមរកគូរទំនាស់ ដើម្បីសងសឹក នៅវេលាម៉ោងប្រមាណ ២ទាបភ្លឺ ថ្ងៃទី២៦ ខែមករា។
បច្ចុប្បន្ន ក្រុមក្មេងទំនើងទាំង ០៩នាក់នេះ ត្រូវបានកម្លាំងការិយាល័យជំនាញព្រហ្មទណ្ឌ នៃស្នងការដ្ឋាននគរបាលខេត្តសៀមរាប កសាងសំណុំរឿងបញ្ជូនទៅសាលាដំបូង ដើម្បីអនុវត្តនីតិវិធីច្បាប់បន្ត៕
ប្រភព៖ ការិយាល័យអន្តរាគមន៍ និងតម្រួតបទបញ្ជានៃស្នងការដ្ឋាននគរបាលខេត្តសៀមរាប
