នៅរសៀលថ្ងៃទី២៦ ខែមករា ឆ្នាំ២០២៥នេះ សមណសិស្ស សិស្សនៃពុទ្ធិកវិទ្យាល័យរាជបូណ៌ ក្រុងសៀមរាប បានរួមគ្នាប្រារព្ធពិធីបុណ្យតបគុណគ្រូ ដើម្បីរម្លឹក និងតបស្នងនូវឧបការគុណដ៏ធំធេង មិនអាចពណ៌នាបានទៅដល់ព្រះឧទ្ទេសាចារ្យ លោកគ្រូអ្នកគ្រូគ្រប់រូបនៃពុទ្ធិកវិទ្យាល័យរាជបូណ៌ បានលះបង់ទាំងកម្លាំងកាយ ទាំងកម្លាំងចិត្ត កម្លាំងប្រាជ្ញាស្មារតី និងពេលវេលាដ៏មានតម្លៃ ក្នុងការបង្ហាត់បង្រៀនសមណសិស្ស សិស្សគ្រប់រូបឱ្យបានរួចផុតពីអវិជ្ជា គឺសេចក្តីល្ងង់ខ្លៅ ដែលពិធីនេះប្រព្រឹត្តិទៅក្រោមព្រះវត្តមាន សម្តេចព្រះព្រហ្មរតនមុនី ពិន សែម សិរីសុវណ្ណោ ឧត្តមទីប្រឹក្សាគណៈសង្ឃនាយក ព្រះចៅអធិការវត្ត និងជាព្រះនាយកនៃពុទ្ធិកវិទ្យាល័យរាជបូណ៌។
លោក វណ្ណ ប៊ុនណា ប្រធានមន្ទីរធម្មការ និងសាសនាខេត្ត បានឱ្យដឹងថា បច្ចុប្បន្នលោកគ្រូអ្នកគ្រូមួយចំនួន មិនត្រូវបានលើកកម្ពស់ ឬផ្តល់តម្លៃ ហើយអ្នកខ្លះក៏ត្រូវបានបំភ្លេច ដោយសិស្សខ្លះក្រោយពីបញ្ចប់ការសិក្សាមិនសូវបាននឹកឃើញដល់គ្រូឡើយ។ ហេតុនេះសូមឱ្យបុណ្យតបគុណគ្រូមានជារៀងរហូត ដើម្បីលើកគុណតម្លៃ ផ្តល់ក្តីនឹករលឹក និងតបគុណទៅតាមលទ្ធភាពរៀងៗខ្លួន ព្រោះថាលោកគ្រូអ្នកគ្រូជាឪពុកម្តាយទីពីររបស់យើង បង្រៀនយើងឱ្យមានចំណេះដឹង។ ដោយឡែកសមណសិស្សនៅក្នុងវិស័យពុទ្ធសាសនាមានគ្រូដល់ទៅបី គឺគ្រូទីមួយឪពុកម្តាយ ទីពីរគ្រូឧបជ្ឈាដែលបានបំបួស និងទីបីលោកគ្រូអ្នកគ្រូដែលបានផ្តល់ចំណេះដឹងទាំងផ្នែកផ្លូវធម៌ និងផ្លូវលោក។ ហេតុនេះ សូមស្នើដល់សិស្សគ្រប់រូប កុំមើលរំលងនូវការលះបង់ដ៏ធំធេងរបស់លោក ទោះបីពេលបង្រៀនបានប្រើពាក្យតូចធំ មិនពីរោះពិសា កាយវិការមិនសមរម្យណាមួយក៏ដោយ ប៉ុន្តែគ្មានគ្រូឯណាចង់ឱ្យសិស្សរបស់ខ្លួនអាក្រក់នោះឡើយ។
សម្ដេចព្រះព្រហ្មរតនមុនី ពិន សែម សិរីសុវណ្ណោ មានថេរដីកាថា គ្រប់អ្នកសិក្សាទាំងអស់ មិនថាបព្វជិត ឬគ្រហស្ថទេ ត្រូវតែមាននូវកតញ្ញូកតវេទិតាធម៌ គឺការដឹងគុណហើយធ្វើតបទៅវិញ ដឹងគុណដល់នរណាមួយដែលជួយបង្ហាត់បង្រៀនក្តី ទំនុកបម្រុងក្តី ចិញ្ចឹមបីបាច់ក្តី ហើយធ្វើសេចក្តីល្អផ្សេងៗតបទៅវិញ តាមលទ្ធភាព និងតាមអធ្យាស្រ័យរបស់ខ្លួនចំពោះគ្រូ និងអ្នកមានឧបការៈនោះ។ លើសពីនេះទៅទៀតព្រះពុទ្ធ ជាម្ចាស់ក៏បានសម្តែងអំពីត្រៃកូដធម៌ ជាធម៌ដ៏កំពូលទាំងបី គឺសច្ច ខន្តី កតញ្ញូ សម្រាប់បរិស័ទទាំងបួនប្រតិបត្តិតាមបានកើតជាប្រយោជន៍ដល់ខ្លួនឯងនិងអ្នកដទៃ។ មិនត្រឹមតែប៉ុណ្ណោះទេព្រះឧទ្ទេសាចារ្យ លោកគ្រូ អ្នកគ្រូ ក៏ជាអ្នកចង្អុលបង្ហាញផ្លូវឱ្យសិស្សបានដើរត្រូវទៅរកសេចក្តីល្អ មានសីលធម៌ សុជីវធម៌ និងគុណធម៌ក្នុងសង្គម នឹងធ្វើខ្លួនឱ្យថ្លៃថ្នូរសក្តិសមជាសិស្សល្អ យុវជនគំរូក្នុងសតវត្សរ៍ទី២១ ជាទំពាំងស្នងឫស្សី ឱ្យក្លាយជាសង្ឃ បញ្ញវន្តក្នុងសម័យសកលភាវូបនីយកម្ម និងជាកុលបុត្រខ្មែរមហានគរ។
សូមជម្រាបថា ពិធីបុណ្យតបគុណគ្រូលើកទី១២ ក៏មានរៀបចំពិធីប្រគល់បណ្ណសរសើរដល់សមណសិស្ស សិស្ស ថ្នាក់ឆ្នាំទី៣ បឋមភូមិ និងទុតិយភូមិ ប្រគេនជូនវត្ថុអនុស្សាវរីយ៍ ចំពោះគណៈគ្រប់គ្រងសាលា ព្រះឧទ្ទេសាចារ្យ លោកគ្រូ អ្នកគ្រូ និងកិច្ចខមាទោសរបស់សមណសិស្សចំពោះលោកគ្រូអ្នកគ្រូផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
