គម្រោងទឹកជីវិត ដែលជាគម្រោងទី២ របស់សមាគមបញ្ញវន្ដកម្ពុជាដើម្បីអភិវឌ្ឍន៍ ត្រូវបានសម្ពោធដាក់ឱ្យប្រើប្រាស់ជាផ្លូវការនូវ នៅក្នុងវត្តរាជបូណ៌ ក្រុងសៀមរាប នាព្រឹកថ្ងៃទី២៤ ខែមករា ឆ្នាំ២០២៥នេះ ក្រោមព្រះវត្តមាន សម្តេចព្រះព្រហ្មរតនមុនី សិរីសុវណ្ណោ ពិន សែម គណៈមហានិកាយ នៃព្រះរាជាណាចក្រកម្ពុជា និងជាព្រះចៅអធិការវត្តរាជបូណ៌ ដោយមានការចូលរួមពី លោកជំទាវ សេង វួចហ៊ុន ប្រធានសមាគម និង លោក លី សារី អភិបាលរងខេត្ត រួមនឹងថ្នាក់ដឹកនាំមន្ទីរអង្គភាព យាយជីតាជី និងសិស្សានុសិស្សជាច្រើនរូប។
លោកជំទាវ សេង វួចហ៊ុន បានឱ្យដឹងថា គម្រោងទឹកជីវិត ត្រូវបានរៀបចំឡើងក្នុងគោលបំណងរួមចំណែកជាមួយរាជរដ្ឋាភិបាលកម្ពុជា ដែលបានដាក់ចេញជាមូលដ្ឋានគ្រឹះដ៏សំខាន់នៃសេដ្ឋកិច្ចកម្ពុជា គឺកត្តា មនុស្ស ទឹក ភ្លើង និងផ្លូវ។ ចំពោះការដាក់ឱ្យប្រើប្រាស់នាពេលនេះ ជាគម្រោងទី២ ហើយក៏ជាសកម្មភាពមនុស្សធម៌មួយក្នុងចំណោមសកម្មភាពមនុស្សធម៌នានាដែលសមាគមធ្លាប់ធ្វើកន្លងមក និងជាកិច្ចគាំទ្រដល់រាជរដ្ឋាភិបាលសម្រេចគោលដៅផ្គត់ផ្គង់ទឹកស្អាតឱ្យបាន ១០០ភាគរយ ត្រឹមឆ្នាំ២០៣០ នៅទូទាំងប្រទេស។ កន្លងមកសមាគមបញ្ញវន្ដកម្ពុជាដើម្បីអភិវឌ្ឍន៍ បានសម្ពោធដាក់ឱ្យប្រើប្រាស់ជាផ្លូវការនូវម៉ាស៊ីនចម្រោះទឹកស្អាតម្ដងរួចមកហើយ នៅវត្តរាជបូណ៌នេះ កាលពីខែតុលា ឆ្នាំ២០២៤កន្លងទៅ។
លោក លី សារី អភិបាលរងខេត្ដ មានប្រសាសន៍ថា ការសម្ពោធដាក់ឱ្យប្រើប្រាស់នូវគម្រោងទឹកជីវិត លើកទី២នេះ ពិតជាចាំបាច់ និងមានសារៈសំខាន់ណាស់ក្នុងការចូលរួមជំរុញវិស័យផ្គត់ផ្គង់ទឹកស្អាត និងអនាម័យជនបទឱ្យកាន់តែមានវឌ្ឍនភាពថែមទៀត និងជាពិសេសដើម្បីឈានទៅសម្រេចគោលដៅនៃការផ្គត់ផ្គង់ទឹកស្អាត និងអនាម័យនៅជនបទឱ្យបាន ១០០ភាគរយ នៅឆ្នាំ២០៣០។ រដ្ឋបាលខេត្ដដែលមានមន្ទីរអភិវឌ្ឍជនបទជាសេនាធិការ បាននឹងកំពុងអនុវត្ដការងារផ្គត់ផ្គង់ទឹកស្អាតយ៉ាងសកម្ម និងផុសផុលតាមរយៈការផ្ដល់នូវការសាងសង់ហេដ្ឋារចនាសម្ពន្ធទឹកនៅជនបទដូចជា សាងសង់អណ្ដូងថ្មី ការជួសជុលអណ្ដូង ការជីកស្រះសហគមន៍ ការសាងសង់នូវប្រព័ន្ធចែកចាយទឹកខ្នាតតូច រួមទាំងការផ្ដល់នូវពាងសម្រាប់ត្រងទឹកភ្លៀងផងដែរ។
សម្ដេចព្រះព្រហ្មរតនមុនី ពិន សែម សិរីសុវណ្ណោ មានថេរដីកាថា ទឹកជាផ្នែកមួយយ៉ាងសំខាន់សម្រាប់ជីវិតមនុស្ស សត្វ ក្នុងចំណោមធាតុទាំងបួន គឺទឹក ដី ភ្លើង ខ្យល់។ ការបង្កើតឱ្យមានប្រព័ន្ធចម្រោះទឹកស្អាតប្រើប្រាស់នេះ គឺជាការលើកកម្ពស់នូវសុខភាព អនាម័យ ដល់បងប្អូនប្រជាពលរដ្ឋ និងសហគមន៍ទាំងមូលថែមទៀតផង៕
អត្ថបទ និងរូបភាព៖ លោក អោត រត់, ទ្រា ពន្លឺ
កែសម្រួល៖ លោក អ៊ុន ណារាជ្យ
