នៅព្រឹកថ្ងៃទី២៣ ខែមករា ឆ្នាំ២០២៥នេះ មន្ទីរអប់រំ យុវជន និងកីឡាខេត្តសៀមរាប បានបើកសន្និបាតបូកសរុបលទ្ធផលការងារអប់រំឆ្នាំ២០២៣-២០២៤ និងលើកទិសដៅការងារឆ្នាំ២០២៤-២០២៥ ក្រោមអធិបតីភាព ឯកឧត្តម បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដោយមានការអញ្ជើញចូលរួមពីសំណាក់ឯកឧត្តម លោកជំទាវសមាជិកក្រុមប្រឹក្សាខេត្ត លោកស្រីអភិបាលរងខេត្ត តំណាងមន្ទីរអង្គភាពក្នុងខេត្ត និងអ្នកពាក់ព័ន្ធជាច្រើនរូបទៀត។
លោក លី ប៊ុនណា ប្រធានមន្ទីរអប់រំ យុវជន និងកីឡាខេត្ដ មានប្រសាសន៍ថា វិស័យអប់រំក្នុងខេត្ដសៀមរាប ត្រូវបានពង្រឹង និងពង្រីកស្ទើរគ្រប់ទីកន្លែង គួបផ្សំនឹងការផ្តល់សេវាអប់រំរបស់មន្រ្តីអប់រំ លោកគ្រូអ្នកគ្រូ ប្រកបដោយការទទួលខុសត្រូវ ធ្វើឱ្យប្រជាជនយល់កាន់តែច្បាស់ពីតម្លៃនៃការអប់រំ។ តែទោះយ៉ាងណាការងារអប់រំពុំទាន់បានបញ្ចប់នៅឡើយ កុមារ និងយុវជនគ្រប់រូប ត្រូវការសេវាអប់រំប្រកបដោយសមធម៌បរិយាបន្ន និងប្រសិទ្ធភាពខ្ពស់។ ជាមួយនោះ មន្ត្រីអប់រំគ្រប់លំដាប់ថ្នាក់ បានរិះរកគ្រប់វិធីសាស្ត្រ គំនិតផ្តួចផ្តើមថ្មីៗ ដើម្បីកសាងនូវលក្ខខណ្ឌចាំបាច់នានា ជំរុញឱ្យវិស័យអប់រំ យុវជន និងកីឡា តម្រង់ឆ្ពោះទៅរកភាពរីកចម្រើននិងជោគជ័យ ព្រមទាំងឆ្លើយតបទៅនឹងគោលដៅអភិវឌ្ឍប្រកបដោយចីរភាពឆ្នាំ២០១៥-២០៣០។
លោកស្រី ម៉ននី រង្សី អភិបាលរងខេត្ដសៀមរាប មានប្រសាសន៍ថា ភាពជោគជ័យដែលមន្ទីរអប់រំខេត្តសៀមរាប សម្រេចបានក្នុងឆ្នាំសិក្សា២០២៣-២០២៤បានកើតឡើងជាបន្តបន្ទាប់ ជាក់ស្ដែងក្មួយៗសិស្សានុសិស្ស ដែលបានទទួលជោគជ័យក្នុងការប្រឡងប្រណាំងអង្គភាពផ្តល់សេវាសាធារណៈគំរូ សាលាស្អាត នាយកល្អ គ្រូល្អ និងការប្រឡងបញ្ចប់ភូមិសិក្សានីមួយៗ និងលទ្ធផលប្រឡងសញ្ញាបត្រមធ្យមសិក្សាទុតិយភូមិកន្លងមកថ្មីៗនេះ ដែលជាសក្ខីកម្មបញ្ជាក់ថា ប្រទេសកម្ពុជា បានធ្វើសមាហរណកម្មខ្លួនចូលទៅក្នុងតំបន់ និងសាកលលោក ហើយកំពុងដើរតួនាទីយ៉ាងសកម្មក្នុងឋានៈជាសមាជិកស្មើភាព និងស្មើសិទ្ធិក្នុងកម្រិតតំបន់ និងពិភពលោក។
លោកស្រីអភិបាលរងខេត្ត បន្តថា ពិតណាស់កម្ពុជា ក៏ទាមទារឱ្យមានការអភិវឌ្ឍធនធានមនុស្សប្រកបដោយគុណភាព សមត្ថភាព និងគុណធម៌ ដែលជាកត្តាគន្លឹះសម្រាប់ទ្រទ្រង់កំណើនសេដ្ឋកិច្ចជាតិ និងភាពប្រកួតប្រជែងរបស់ប្រទេស ទាំងពេលបច្ចុប្បន្ន និងសម្រាប់អនាគត។ ការកសាង និងអភិវឌ្ឍធនធានមនុស្សជាកត្តាសំខាន់ គឺសំដៅលើការកសាងទាំងសមត្ថភាព ទាំងចំណេះដឹង ចំណេះធ្វើ សហគ្រិនភាព ជំនាញ ការច្នៃប្រឌិត និងនវានុវត្តន៍លើគ្រប់ផ្នែក គ្រប់វិស័យ ពិសេសផ្នែកវិទ្យាសាស្ត្រ និងបច្ចេកវិទ្យា ព្រមទាំងសមត្ថភាពក្នុងការ ស្រាវជ្រាវរបកគំហើញថ្មី និងការអភិវឌ្ឍ។
ឯកឧត្តម បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី មានប្រសាសន៍ថា ស្របទៅនឹងយុទ្ធសាស្ត្ររបស់រាជរដ្ឋាភិបាលកម្ពុជា ក្នុងគោលដៅពង្រឹងគុណភាពគ្រឹះស្ថានសិក្សារដ្ឋចាប់ពីថ្នាក់មត្តេយ្យសិក្សាដល់មធ្យមសិក្សា ក្រសួងបានកំណត់អាទិភាពចំនួន៤ បន្ថែមទៀតគឺ ការអប់រំឌីជីថល ការបង្កើតមជ្ឈមណ្ឌលឧត្តមភាពនៅគ្រឹះស្ថានឧត្តមសិក្សា ការកសាងប្រព័ន្ធ និងការអភិវឌ្ឍសមត្ថភាព និងការអភិវឌ្ឍការអប់រំកាយ និងកីឡា។
ឯកឧត្ដម ឧបនាយករដ្ឋមន្ត្រី មានប្រសាសន៍ទៀតថា ចំពោះវិធានការគន្លឹះដែលបានដាក់ចេញដោយ សម្តេចធិបតី ហ៊ុន ម៉ាណែត នាយករដ្ឋមន្ត្រី ទៅក្នុងស្តង់ដារសាលារៀនគំរូដោយផ្តោតលើ ការពង្រឹងអភិបាលកិច្ចសាលារៀន ក្នុងគោលដៅកែលម្អលទ្ធផលសិក្សារបស់សិស្ស ផ្លាស់ប្តូរវប្បធម៌ សាលារៀន ពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបថល្អរបស់បុគ្គលិកអប់រំ និងសិស្សានុសិស្ស ដោយផ្តោតលើការពង្រឹងការគ្រប់គ្រងសាលារៀន រួមទាំងការបង្កើតគណៈកម្មការគ្រប់គ្រងសាលារៀន ការរៀបចំផែនការអភិវឌ្ឍសាលារៀន ការធ្វើតែស្តស្តង់ដារ និងការវាយតម្លៃការបំពេញការងាររបស់បុគ្គលិក។ ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សា ដើម្បីពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស ដោយគ្រឹះស្ថានសិក្សាត្រូវខិតខំប្រឹងប្រែងអនុវត្តកម្មវិធីសិក្សាថ្មី ជាពិសេសការអនុវត្តកម្មវិធីក្រៅម៉ោងសិក្សាបន្ថែម ដើម្បីបង្កើនម៉ោងសិក្សាឱ្យបានយ៉ាងហោចណាស់ ២ម៉ោងសិក្សាបន្ថែមទៀត។
ឯកឧត្ដមរដ្ឋមន្ត្រី ក៏បានវាយតម្លៃខ្ពស់ ចំពោះសមិទ្ធផលរបស់មន្ទីរអប់រំខេត្តសៀមរាប ដែលសម្រេចបានកន្លងមក និងសូមថ្លែងនូវការកោតសរសើរ ចំពោះបុគ្គលិកអប់រំដែលបានយកចិត្តទុកដាក់លើការងារអប់រំរហូតទទួលបាននូវជ័យលាភីជាច្រើនក្នុងឆ្នាំកន្លងមកផងដែរ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
