ដើម្បីត្រៀមសម្រាប់ព្រឹត្តិការណ៍ហូបនំបញ្ចុកនៅថ្ងៃទី០៩ ខែមិថុនា ខាងមុខនេះ នៅព្រឹកថ្ងៃទី០៧ ខែមិថុនា ឆ្នាំ២០១៩នេះ មន្ត្រីជំនាញកាំកុងត្រូលខេត្តសៀមរាប សហការជាមួយមន្ទីរពាណិជ្ជកម្មខេត្ត អាជ្ញាធរដែនដី និងគណៈគ្រប់គ្រងផ្សារ បានចុះប្រតិបត្តិការត្រួតពិនិត្យទៅលើភាពមិនប្រក្រតី នៃទំនិញម្ហូបអាហារ នៅផ្សារលើធំថ្មី ភូមិដក់ពោធ៍ សង្កាត់ស្លក្រាម ក្នុងក្រុងសៀមរាប ខេត្តសៀមរាប។
លោក ព្រៅ ខេមរិទ្ធ ប្រធានសាខាកាំកុងត្រូលខេត្តសៀមរាប បានអះអាងថា ចំពោះការចុះត្រួតពិនិត្យសុវត្ថិភាពលើនំបញ្ចុកឬចំណីម្ហូបអាហារ នៅផ្សារលើធំថ្មី មន្ត្រីជំនាញរបស់លោកពុំបានរកឃើញនូវសារធាតុគីមីហាមឃាត់ ដែលបានផ្ទុកនៅក្នុងនំបញ្ចុក ឬម្ហូបចំណីគ្រប់ប្រភេទ និង ទំនិញគ្រឿងឧបភោគបរិភោគមួយចំនួនដែលបានដាក់តាំងលក់នៅក្នុងផ្សារឡើយ។
លោក បន្តថា ការចុះប្រតិបត្តិការណ៍នៅថ្ងៃនេះ គឺក្នុងគោលបំណងធានាឲ្យបាននៅសុវត្ថិភាព នៃការពិសារនំបញ្ចុក អោយបានល្អប្រសើរលើផ្នែកសុខភាព នាថ្ងៃអាទិត្យទី០៩ខែមិថុនា ឆ្នាំ ២០១៩ខាងមុខ គឺជាទិវា ពិសារនំបញ្ចុកសាមគ្គីជាតិកម្ពុជា។ ដូច្នេះមន្ត្រីកាំកុងត្រូលយើង បានធ្វើការណែនាំត្រួតពិនិត្យដល់បងប្អូនអាជីវករមួយចំនួនដែលបានលក់នំបញ្ចុកជាលក្ខណៈគ្រួសារ ដើម្បីឲ្យចូលរួមសហការជាមួយនឹងការចុះត្រួតពិនិត្យទំនិញនៅទីផ្សារនេះ ចំពោះម្ហូបអាហារ ដោយផ្តោតលើការយកចិត្តទុកដាក់ជាពិសេស បន្លែ ប្រហុក គ្រឿងផ្សំសម្លនំបញ្ចុក និងសសៃនំបញ្ចុកជាដើម។
លោក ព្រៅ ខេមរិទ្ធ ក៏បានឲ្យដឹងថា ជាលទ្ធផលចុះផ្សារនៅព្រឹកនេះ មន្ត្រីជំនាញ និង ស្ថាប័នពាក់ព័ន្ធ បានធ្វើតេស្ដបឋមរកមិនឃើញសារធាតុគីមី នៅក្នុងនំបញ្ចុកនិងទំនិញគ្រឿងហូបចុក ឬទំនិញខូចគុណភាពក្ដី ក៏ក្រុមការងាររបស់លោកនៅតែបន្តការយកចិត្តទុកដាក់នឹងចែកចាយនូវស្លាក់សញ្ញាស្តីពីការហាមឃាត់ ការប្រើប្រាស់ ដើម្បីអប់រំណែនាំពន្យល់អំពីបញ្ហាការវិចខ្ចប់ ការទុកដាក់ឲ្យមានអនាម័យល្អ ឬការលក់ដូរធ្វើយ៉ាងណាឲ្យមានការប្រុងប្រយ័ត្នជាមុនទើបជាការប្រសើរនឹងអំពាវនាវដល់ក្រុមអាជីវករលក់ដូរ ប្រជាពលរដ្ឋ អ្នកប្រើប្រាស់ និងសាធារណៈជនទាំងអស់ រួមគ្នាទប់ស្កាត់ និង បញ្ឈប់ការប្រើប្រាស់សារធាតុគីមីផងដែរ។
លោក ព្រៅ ខេមរិទ្ធ បានបន្តទៀតថា សម្រាប់ការចុះពិនិត្យនៅថ្ងៃនេះ ក្រុមការងាររបស់លោក បានធ្វើការពិនិត្យទៅលើម្ហូប និងចមណីអាហារមួយចំនួន រួមមានដូចជា៖ នំបញ្ចុក ត្រយោងចេក សណ្តែកបណ្តុះ ប្រហុក ផ្អកត្រី គល់ស្លឹកគ្រៃហាន់រួច និង សុពលភាពនៃការប្រើប្រាស់ហួសកាលបរិច្ឆេតគ្រប់ប្រភេទ សំដៅដល់គ្រឿងកំប៉ុងនិងឥវ៉ាន់ចាប់ហួយនៅតាមតូបនានាក្នុងផ្សារជាដើម ៕
អត្ថបទ និងរូបភាព ៖ ស៊ាន សុផាត
កែសម្រួល ៖ អ៊ុន ណារាជ្យ
