ក្នុងកិច្ចប្រជុំក្រុមការងារគ្រប់គ្រងក្របខ័ណ្ឌអនុវត្តការជំរុញបង្កើនការងារថែទាំសុខភាពបឋមខេត្តសៀមរាប នៅថ្ងៃទី១០ ខែកុម្ភៈ ឆ្នាំ២០២៥នេះ លោក នាក់ ណេរ៉ុន អភិបាលរងខេត្ត បានលើកឡើងថា ការងារថែទាំសុខភាពបឋម ជាកាតព្វកិច្ចរបស់យើងទាំងអស់គ្នាជាអាជ្ញាធរមូលដ្ឋានដែលចាំបាច់ត្រូវធ្វើ តាមរយៈការអប់រំផ្សព្វផ្សាយពីការថែទាំសុខភាពបឋមជូនដល់បងប្អូនប្រជាពលរដ្ឋ ក្នុងន័យដើម្បីជួយកាត់បន្ថយការចំណាយលើការព្យាបាលជំងឺជំងឺផ្សេងៗ។
លោក នាក់ ណេរ៉ុន មានប្រសាសន៍ថា ក្នុងនីតិកាលទី៧នេះ រាជរដ្ឋាភិបាលកម្ពុជា បានកំពុងយកចិត្តទុកដាក់ពង្រឹង និងពង្រីកការអភិវឌ្ឍលើគ្រប់វិស័យ ក្នុងនោះវិស័យសុខាភិបាល ក៏នៅតែជាវិស័យអាទិភាពមួយនៅគ្រប់ដំណាក់កាល ដែលរាជរដ្ឋាភិបាលបានយកចិត្តទុកដាក់យ៉ាងខ្លាំងនៅក្នុងការថែទាំសុខភាពរបស់ប្រជាពលរដ្ឋ។ ជាពិសេសការជំរុញការថែទាំសុខភាពបឋមរបស់ប្រជាពលរដ្ឋផ្ទាល់តែម្ដង ដោយកាលណាយើងម្នាក់ៗយល់ដឹងអំពីការថែទាំសុខភាពបឋម យើងអាចកាត់បន្ថយការទៅជួបពេទ្យដើម្បីព្យាបាលជំងឺ។
លោកក៏បានជំរុញដល់គ្រប់មន្ទីរអង្គភាព និងអាជ្ញាធរក្រុងស្រុកទូទាំងខេត្ត ត្រូវបន្តយកចិត្តទុកដាក់ធ្វើការអប់រំផ្សព្វផ្សាយដល់ប្រជាពលរដ្ឋតាមមូលដ្ឋានក្នុងសហគមន៍ឱ្យពួកគាត់បានយល់ដឹងអំពីការថែទាំសុខភាពបឋមនេះ។ កិច្ចការថែទាំសុខភាពបឋម ជាការបង្ការមួយយ៉ាងល្អព្រោះវាបានជួយឱ្យយើងកាត់បន្ថយការចំណាយលើការព្យាបាលជំងឺផ្សេងៗ ដូចទៅនឹងពាក្យស្លោកមួយលើកឡើងថា ការពារប្រសើរជាងព្យាបាល។ ស្របពេលជាមួយគ្នានេះ ការអនុវត្តការថែទាំសុខភាពជូនប្រជាពលរដ្ឋ ក៏កំពុងត្រូវបានកែលម្អ និងរីកចម្រើនជាបន្តបន្ទាប់ ពិសេសសេវាសុខភាពខិតកាន់តែជិតដល់មូលដ្ឋានដែលជាតម្រូវការរបស់ប្រជាពលរដ្ឋ។
ព័ត៌មានជាតិ ថ្មីៗ
លោកអភិបាលរងខេត្ត បន្តថាទន្ទឹមនឹងនេះហេដ្ឋារចនាសម្ព័ន្ធរូបវន្តវិស័យសុខាភិបាល ត្រូវបានកែលម្អពង្រីក និងការលើកកម្ពស់ជាប្រចាំ ក្នុងការផ្តល់សេវាសុខាភិបាលនៅតាមមណ្ឌលសុខភាព មន្ទីរពេទ្យបង្អែក ដូចជា សេវាសម្ភពបន្ទាន់ សេវាសង្គ្រោះបន្ទាន់ សេវាថែទាំទារក-កុមារ ក៏ដូចជាសេវាអន្តរាគមន៍ សុខភាពសាធារណៈផ្សេងទៀតកាន់តែមានលក្ខណៈប្រសើរឡើងជាលំដាប់៕
អត្ថបទ និងរូបភាព៖ លោក អ៊ុន ណារាជ្យ
