ថវិកាចំនួន ២ ៦០០០ដុល្លារ រួមនឹងសម្ភារៈសិក្សាមួយចំនួនទៀត ដែលប្រមូលបានពីកម្មវិធីគម្រោងអង្គរ និងសប្បុរសជននៃប្រទេសកូរ៉េ ត្រូវបានប្រគល់ជូនដល់មជ្ឈមណ្ឌលកុមារកំព្រាខេត្តសៀមរាប ដែលពិធីប្រគល់ធ្វើឡើងកាលពីថ្ងៃទី២៣ ខែកុម្ភៈ ឆ្នាំ២០២៥នេះ ក្រោមវត្តមាន លោកជំទាវ ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណៈរដ្ឋកូរ៉េ និង លោក យុន លីនណេ អភិបាលរងខេត្តសៀមរាប រួមនឹងសប្បុរសជនប្រទេសកូរ៉េជាច្រើនទៀត។
លោកជំទាវ ជ្រឹង បុទុមរង្សី មានប្រសាសន៍ថា ព្រឹត្តិការណ៍សប្បុរសធម៌នាពេលនេះ ជាឬសគល់ប្រកបដោយចក្ខុវិស័យវែងឆ្ងាយនៃភាពមេត្តាករុណារបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ ពេជ ចន្ទមុន្នី ក្នុងដំណើរបំពេញទស្សនកិច្ចផ្លូវការនៅសាធារណរដ្ឋកូរ៉េ កាលពីខែឧសភា ឆ្នាំ២០២៣កន្លងទៅ ដោយបានផ្តួចផ្តើមគំនិតកិច្ចសហប្រតិបត្តិការ ដើម្បីជំរុញបុព្វហេតុសប្បុរសធម៌នេះឡើង។ តាមរយៈការផ្តួចផ្តើមគំនិត បំផុស និងអំពាវនាវដ៏ល្អ និងមានសារៈសំខាន់នេះ ស្ថានទូតកម្ពុជាប្រចាំសាធារណៈរដ្ឋកូរ៉េ បានខិតខំយកចិត្តទុកដាក់ដោយសហការជាមួយសមាគមវប្បធម៌កូរ៉េ និងអ្នកពាក់ព័ន្ធក្នុងស្រុកសំខាន់ៗប្រឹងប្រែងរួមគ្នាដើម្បីការងារមនុស្សធម៌ទាំងអស់គ្នា។
លោកជំទាវ បានបញ្ជាក់ថា សម្រាប់មូលនិធិសប្បុរសធម៌ជួយដល់មជ្ឈមណ្ឌលកុមារកំព្រាខេត្តសៀមរាប នឹងនៅតែមានជាបន្តទៅទៀត ពោលគឺគ្មានកុមារណាម្នាក់ត្រូវស្រេកឃ្លាន គ្មានគ្រួសារជាប់ក្នុងភាពក្រីក្រ និងគ្មានសហគមន៍បាត់បង់បរិស្ថានល្អនោះទេ។ លោកជំទាវ ក៏បានលើកទឹកចិត្តដល់គណៈគ្រប់គ្រងមណ្ឌលបន្តថែរក្សាក្មួយៗឱ្យដូចជាកូន ក្មួយ ក្នុងគ្រួសារខ្លួនឯង ប្រកបដោយក្តីស្រឡាញ់ អាណិតអាសូរ និងយកចិត្តទុកដាក់ឱ្យបានខ្ពស់បំផុត។
លោក យុន លីនណេ អភិបាលរងខេត្ត បានថ្លែងអំណរគុណដល់សប្បុរសជន ដែលបានអញ្ជើញមកសួរសុខទុក្ខ និងផ្តល់មូលនិធិឱ្យមជ្ឈមណ្ឌលកុមារកំព្រាខេត្ត ដែលបង្ហាញពីការគិតគូរយកចិត្តទុកដាក់ចំពោះកុមារ ដើម្បីឱ្យការរស់នៅរបស់កូនៗ ក្មួយៗកាន់តែមានភាពកក់ក្តៅ មានអាហារូបត្ថម្ភគ្រប់គ្រាន់ មានឱកាសទទួលបានសិទ្ធិដូចក្មេងដទៃទៀត ជាពិសេសជំរុញឱ្យកុមារទាំងនេះក្លាយជាទំពាំងស្នងឬស្សី ជាសសរទ្រូងប្រទេសជាតិ ក្នុងការរួមចំណែកជាមួយរាជរដ្ឋាភិបាលកម្ពុជាដើម្បីអភិវឌ្ឍសង្គមជាតិ។ ក្នុងន័យនេះ សូមឱ្យក្មួយៗ ត្រូវខិតខំប្រឹងប្រែងរៀនសូត្រប្រកបដោយគន្លងធម៌ និងត្រូវមានក្តីសង្ឃឹម និងជឿជាក់ដោយមុតមាំដោយឈរលើភាពតស៊ូ ព្យាយាមជម្នះគ្រប់ការលំបាកទាំងអស់។
សូមជម្រាបថា មជ្ឈមណ្ឌលកុមារកំព្រាខេត្តសៀមរាប បង្កើតឡើងនៅឆ្នាំ១៩៧៩ ស្ថិតក្នុងសង្កាត់ទឹកវិល ក្រុងសៀមរាប បច្ចុប្បន្នមានកុមារ ៤៥នាក់ ស្រី២៤នាក់ និងមានបុគ្គលិកប្រចាំការចំនួន៧នាក់ ហើយប្រភពថវិកាសម្រាប់ទ្រទ្រង់ជាប្រភពថវិការបស់រដ្ឋផ្តល់តាមរយៈរដ្ឋបាលខេត្តសៀមរាប៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
