នារាត្រីថ្ងៃទី២២ ខែកុម្ភៈ ឆ្នាំ២០២៥ ជាឆ្នាំទី១៥នៃព្រឹត្តិការណ៍ដង្ហែតុក្កតាយក្សគឺជាព្រឹត្តិការណ៍ដ៏អស្ចារ្យមួយ ត្រូវបានដង្ហែចេញពីរង្វង់មូលវត្តដំណាក់ប្របខាងកើតស្ទឺងឆ្ពោះទៅកាន់សួនច្បារ មុខព្រះរាជដំណាក់ក្រុងសៀមរាប ក្រោមគោលបំណងចូលរួមលើកស្ទួយទាក់ទាញដល់អារម្មណ៍អ្នកទេសចរណ៍ឱ្យមកទស្សនាកម្ពុជាកាន់តែច្រើន ជួយដល់ក្មេងៗចេះធ្វើការជាក្រុម និងចង់ឱ្យពួកគេយល់កាន់តែច្បាស់ពីតម្លៃសិល្បៈវប្បធម៌ និងបរិស្ថានទូទៅជុំវិញខ្លួន បន្ថែមពីនេះក្មេងៗទាំងនោះបានបង្ហាញស្នាដៃបានពីការខិតខំរបស់ពួកគេជូនដល់មហាជនទស្សនាដោយរីករាយផង។ព្រឹត្តិការណ៍នេះគេឃើញមហាជនភ្ញៀវទេសចរជាតិ និងភ្ញៀវបរទេស មូលមីរឈរអបសងខាងផ្លូវដើម្បីអបអរសាទរនិងសប្បាយរីករាយ ដែលអាចប៉ាន់ប្រមាណជា១ម៉ឺននាក់។
លោក អ៊ុន សាវ៉ាន់ អ្នកចាត់ការទូទៅនៃគម្រោងតុក្កតាយក្សបានឱ្យដឹងថា៖តួអង្គទេវៈ គឺជាប្រធានបទសម្រាប់ឆ្នាំ២០២៥ បង្កើតជាទម្រង់តាមរចនាបទ សិល្បៈខ្មែរ តួអង្គទេវកថា រាមកេរ្ត៍ រចនាឡើងដោយក្មេងៗ ប្រមាណ ៨០០នាក់ មកពីសាលារដ្ឋ ឯកជន និងអង្គការក្រៅរដ្ឋាភិបាលនានា។ អាយ៉ង ទីងមោងឬហៅថាតុក្កតាយក្ស ជាគម្រោងដ៏ធំបំផុតធ្វើឡើងក្នុងគោលបំណង បណ្តុះស្មារតី ដល់កុមារ និងយុវជននៅតាមអង្គការនានា ឱ្យចេះធ្វើការជាក្រុម តាមរយៈវិស័យសិល្បៈ បណ្តុះឱ្យពួកគាត់ស្រឡាញ់ សាសនា វប្បធម៌ ប្រពៃណីទំនៀមទំលាប់ខ្មែរ ស្រឡាញ់បរិស្ថាន គោរពច្បាប់ចរាចរណ៍ និងរួមគ្នា បង្ហាញលើកកម្ពស់ស្នាដៃសិល្បៈរបស់បុព្វបុរសខ្មែរ ជូនសាធារណជនឲ្យកាន់តែទូលំទូលាយ។
លោក អ៊ុន សាវ៉ាន់ បន្តថាការរៀបចំដង្ហែក្បួនតុក្កតាយក្សនេះ គឺមានការចូលរួមពីក្មេងៗមកអង្គការក្រៅរដ្ឋាភិបាល ក្នុងគោលបំណងលើកស្ទួយវិស័យសិល្បៈ វប្បធម៌ខ្មែរ បញ្ហាអនាម័យ បរិស្ថាន ការលើកកម្ពស់ការយល់ដឹងអំពីការអភិវឌ្ឍ វិស័យអប់រំជូនសាធារណជនឲ្យកាន់តែទូលំទូលាយ ។
ឆ្នាំនេះរៀបចំជារូបតំណាងចំនួន០៩រួមមាន នាងទេពមច្ឆា គ្រុឌ ហនុមានដែលយកតាមរចនាបទបន្ទាយស្រី រូបនាគតាមរចនាបទបាយ័ន រូបតោរចនាបទសម្បូរព្រៃគុហ៍ ព្រះគណេស នាងកិន្នរី សត្វមករ និងអសុរៈ តាមរចនាបទបាយ័ន ដែលរូបតំណាងទាំងអស់នេះ រួមគ្នាបង្កើតឡើងដោយប្រើពេលប្រមាណជាងមួយខែ។
ក្បួនដង្ហែនេះក៏មានការចូលរួមពីក្រុមតន្រ្តីបុរាណ តន្រ្តីសម័យ ដូចជាក្រុមស្គរដៃ ក្រុមសម្លេងភ្លេងទ័ព ឆែយុំា ហ្វារ ល្ខោនសៀកកម្ពុជា ក្រុមតន្រ្តីសាលាវត្តរាជបូណ៌ ក្រុមតន្រ្តីកាយរិទ្ធិខេត្តសៀមរាប ក្រុមមេធាស្រ្តីស្គរដៃ។ល។
អត្ថបទ និងរូបភាព៖លោកយូ វង្ស លោកឈិត សាវី
កែសម្រួល៖ ហាំ ម៉េងហួត
