នៅថ្ងៃទី២៦ ខែកុម្ភៈ ឆ្នាំ២០២៥នេះ ឯកឧត្តម តាន់ ថាណា រដ្ឋលេខាធិការក្រសួងការពារជាតិ និងជាប្រធានក្រុមការងារ រាជរដ្ឋាភិបាលចុះមូលដ្ឋានស្រុកស្វាយលើ អញ្ជើញជាអធិបតីក្នុងពិធីប្រកាសក្រុមការងាររាជរដ្ឋាភិបាលចុះមូលដ្ឋានស្រុក និងឃុំទាំង៥ នៃស្រុកស្វាយលើ ខេត្តសៀមរាប ដោយមានការអញ្ជើញចូលរួមឯកឧត្តម លោកជំទាវ លោក លោកស្រី ក្រុមការងាររាជរដ្ឋាភិបាលចុះមូលដ្ឋានស្រុកស្វាយលើ និងឃុំទាំង០៥ ព្រមទាំងសមាជិក សមាជិកា ជាច្រើនរូប។
ក្នុងឱកាសនោះ ឯកឧត្តម តាន់ ថាណា បានជំរុញដល់
ក្រុមការងាររាជរដ្ឋាភិបាលចុះមូល ត្រូវចុះសម្រង់ និងដោះស្រាយបញ្ហារ ប្រឈមនានា របស់ប្រជាពលរដ្ឋ នៅតាមបណ្តា ភូមិ-ឃុំ ឲ្យបានទាន់ពេលវេលាដើម្បីឆ្លើយតបនូវកម្មវិធី នយោបាយយុទ្ធសាស្ត្របញ្ចកោណដំណាក់កាលទី១ ផែនការយុទ្ធសាស្ត្រអភិវឌ្ឍន៍ជាតិ គោលនយោបាយ ភូមិ-ឃុំមានសុវត្ថិភាព កម្មវិធីគោលនយោបាយតាមវិស័យ ជាពិសេសត្រូវយកចិត្តទុកដាក់អំពីស្ថានភាពជីវភាពរស់នៅរបស់ប្រជាពលរដ្ឋនៅមូលដ្ឋាន។
ប្រធានក្រុមការងាររាជរដ្ឋាភិបាលជំរុញបន្ថែមដល់ក្រុមការងារត្រូវ
ចុះពង្រឹងការងាររដ្ឋបាលថ្នាក់មូលដ្ឋាន តាមរយៈការត្រួតពិនិត្យ ការតាមដាន និងគាំទ្រអនុវត្តកម្មវិធី គម្រោង និងផែនការសកម្មភាពនានា លើកកម្ពស់គណនេយ្យភាពរបស់រដ្ឋបាលឃុំ ក្នុងការផ្តល់សេវាសាធារណៈ និងការអភិវឌ្ឍនៅតាមមូលដ្ឋានឲ្យមានប្រសិទ្ធភាព រៀបចំវេទិការសាធារណៈ នៅតាមមូលដ្ឋាន ដើម្បីស្តាប់សំណូមពរ របស់ប្រជាពលរដ្ឋ យកចិត្តទុកដាក់ដោះស្រាយបញ្ហានានា ផ្អែកលើច្បាប់ និងលិខិតបទដ្ឋានគតិយុត្ត កៀងគរធនធានពីប្រភពនានា ដើម្បីគាំទ្រជីវភាពប្រជាពលរដ្ឋ និង សហការណ៍ទប់ស្កាត់បទល្មើសនានា ដែលកើតនៅមូលដ្ឋាន ។
លោក អៀង ពិសិដ្ឋ អភិបាលស្រុកស្វាយលើ ក៏បានឲ្យដឹងថា ដើម្បីឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋា ភិបាល អណត្តិទី៧ នេះ មន្ត្រីរដ្ឋបាលស្រុក ក្រុមប្រឹក្សាស្រុក មន្ទីរ អង្គភាពជំនាញពាក់ព័ន្ធ អាជ្ញាធរគ្រប់លំដាប់ថ្នាក់បានខិតខំប្រឹងប្រែងអនុវត្តតួនាទី ភារកិច្ចតាមលក្ខខណ្ឌការងារ ដែលរាជរដ្ឋាភិបាលប្រគល់ជូនពាក់ព័ន្ធ និងការងាររដ្ឋបាលទូទៅ ការងារអត្រានុកូលដ្ឋាន ការងារអភិវឌ្ឍហេដ្ឋារចនាសម្ព័ន្ធរូបវ័ន្ត ការងារសេដ្ឋកិច្ច ការងារសង្គមកិច្ច ការងារគ្រប់គ្រងធនធានធម្មជាតិ និងការងារសន្តិសុខសណ្តាប់ធ្នាប់ សាធារណៈ ទទួលបានលទ្ធផល់យ៉ាងល្អប្រសើរ៕
អត្ថបទ៖លោក ធន់ ពូថេ
កែសម្រួល៖លោកស្រី សូ ស៊ីមាន
