មន្ត្រីជាន់ខ្ពស់ក្រសួងមហាផ្ទៃ បានជំរុញដល់អាជ្ញាធរមានសមត្ថកិច្ចទូទាំងខេត្តសៀមរាប ធ្វើយ៉ាងណាបន្តពង្រឹង និងពង្រីកលើសកម្មភាពបង្ក្រាបក្រុមក្មេងទំនើង ដែលតែងតែបង្កភាពអសន្តិសុខក្នុងមូលដ្ឋានប្រជាពលរដ្ឋ ដើម្បីរក្សាបាននូវទំនុកចិត្តជូនប្រជាពលរដ្ឋ ខណៈដែលឆ្នាំ២០២៤កន្លងទៅនេះ ខេត្តសៀមរាប ករណីក្មេងទំនើងមានការកើនឡើងគួរឱ្យកត់សម្គាល់។
ក្នុងកិច្ចប្រជុំត្រួតពិនិត្យការអនុវត្តគោលនយោបាយ ភូមិឃុំសង្កាត់ មានសុវត្ថិភាព ប្រចាំឆ្នាំ២០២៤ និងលើកទិសដៅបន្តឆ្នាំ២០២៥ របស់រដ្ឋបាលខេត្តសៀមរាប នៅរសៀលថ្ងៃទី២៦ ខែកុម្ភៈ ឆ្នាំ២០២៥នេះ ឯកឧត្តម សួស អង្គារ៍ រដ្ឋលេខាធិការក្រសួងមហាផ្ទៃ មានប្រសាសន៍ថា ខេត្តសៀមរាប ជាគោលដៅធំនៃការទទួលរៀបចំព្រឹត្តិការណ៍ និងកម្មវិធីធំៗ ដោយមានវត្តមានថ្នាក់ដឹកនាំ មន្ត្រីជាន់ខ្ពស់មកពីបណ្ដាប្រទេសនានា និងភ្ញៀវទេសចរផងនោះ ចូលមកជាប្រចាំ។ ក្នុងន័យនេះ ភារកិច្ចចាំបាច់ គឺជំរុញឱ្យអ្នកពាក់ព័ន្ធទាំងអស់ ត្រូវយកចិត្តទុកដាក់ក្នុងថែរក្សាសន្តិសុខ សណ្ដាប់ធ្នាប់ របៀបរៀបរយ ឱ្យខេត្តសៀមរាប សក្តិសមជាខេត្តទេសចរណ៍ប្រវត្តិសាស្ត្រ ក្នុងប្រទេសមានសុខសន្តិភាព។
ឯកឧត្តម សង្កត់ធ្ងន់ថា ចំពោះមុខនេះកងកម្លាំងប្រដាប់អាវុធទាំងអស់ ត្រូវអនុវត្តវិធានការឱ្យបានម៉ឺងម៉ាត់បំផុត បន្តប្រតិបត្តិការបង្រ្កាបឱ្យដល់ឬសគល់ ពិសេសចំពោះក្រុមក្មេងទំនើងដែលបានបង្កភាពចលាចលនៅក្នុងមូលដ្ឋាននានារបស់ខ្លួន។ ចំពោះបញ្ហាក្មេងទំនើងនេះ សមត្ថកិច្ចក្រុងស្រុកទូទាំងខេត្តសៀមរាប ត្រូវបង្កើនការចុះល្បាតនៅតាមមូលដ្ឋានគ្រប់គ្រងរបស់ខ្លួនដោយត្រូវត្រួតពិនិត្យជាប់ជាប្រចាំ និងគ្រប់គ្រងលើមុខសញ្ញានីមួយៗ ឱ្យបានច្បាស់លាស់ ពិសេសក្រុមក្មេងទំនើង ដើម្បីឈានដល់ការបង្ក្រាបទាន់ពេលវេលា ព្រមទាំងចាត់វិធានការតាមផ្លូវច្បាប់ក្នុងករណីដែលមុខសញ្ញាមានសកម្មភាពល្មើសច្បាប់។
លោក អ៊ឹង គឹមលាង អភិបាលរងខេត្តសៀមរាប មានប្រសាសន៍ថា ពិតណាស់ ដើម្បីចូលរួមទប់ស្កាត់បញ្ហាទាំងអស់នេះ ការអនុវត្តគោលនយោបាយភូមិឃុំសង្កាត់មានសុវត្ថិភាព គឺជាកត្តាសំខាន់ ដែលវាអាចជួយឱ្យអាជ្ញាធរខេត្ត អាចបង្ក្រាប ទប់ស្កាត់បានទាន់ពេលវេលា នូវរាល់បទល្មើសនានាក្នុងមូលដ្ឋាន ដូចជាបទល្មើសគ្រឿងញៀន ចោរកម្ម ល្បែងស៊ីសង គ្រោះថ្នាក់ចរាចរណ៍ និងបទល្មើសផ្សេងៗទៀតផងដែរ។
តាមរបាយការណ៍ លោកឧត្តមសេនីយ៍ទោ ហួត សុធី ស្នងការនគរបាលខេត្ត បានឱ្យដឹងថា សម្រាប់ឆ្នាំ២០២៤កន្លងទៅ សមត្ថកិច្ចខេត្តសៀមរាប បានធ្វើការបង្ក្រាបក្មេងទំនើងបានចំនួន៤២លើក ឃាត់ខ្លួនក្រុមក្មេងទំនើងបានចំនួន២៣១នាក់។ ក្នុងចំណោម៤២លើកខាងលើ ក្រុមក្មេងទំនើងបានបង្កភាពអាណាធិបតេយ្យ ៦ករណី, អំពើហិង្សា១៣ករណី, ធ្វើឱ្យខូចខាតដោយចេតនា៥ករណី, អំពើហិង្សាទៅវិញទៅមក១២ករណី និងចរាចរណ៍អាវុធសម្រាប់ប្រហារផ្សេងៗទៀត ៧ករណី។ ដោយឡែកចំពោះករណីគ្រឿង សមត្ថកិច្ចធ្វើការបង្ក្រាបបានចំនួន ៣១០លើក កើនឡើង២២លើកធៀបនឹងឆ្នាំ២០២៣ និងឃាត់ខ្លួនមនុស្សបានចំនួន ២ ៤៦៦នាក់ ស្រី១៨១នាក់៕
អត្ថបទ និងរូបភាព៖ លោក អ៊ុន ណារាជ្យ
