សហអ្នកនិពន្ធជាច្រើនរូប សហការជាមួយអាជ្ញាធរជាតិអប្សរា និងវិស័យឯកជនមួយចំនួនទៀត បានរួមគ្នាចងក្រងសៀវភៅមួយក្បាល មានចំណងជើង“លើសពីអង្គរ” ដែលបានរំលេចពីអត្ថប្រយោជន៍នៃព្រៃឈើ បណ្ដាញផ្លូវគមនាគមន៍បុរាណ ព្រែកជីកបុរាណ មធ្យោបាយដឹកជញ្ជូនថ្មនាសម័យបុរាណ ដើម្បីកសាងប្រាសាទ ប្រពៃណីនិងវប្បធម៌ ដែលផ្សារភ្ជាប់ជីវភាពរបស់អ្នកស្រុកអង្គរ ជាពិសេសព្រឹត្តិការណ៍សំខាន់ៗ ដែលកើតមានលើទឹកដីប្រាសាទនេះ។
ក្នុងសន្និសីទកាសែតសម្ពោធសៀវភៅលើសពីអង្គរ នារសៀលថ្ងៃទី២៦ ខែកុម្ភៈ ម្សិលមិញនេះ លោក គី សុខលីម អ្នកនិពន្ធសៀវភៅ “លើសពីអង្គរ” ថ្លែងថា ឆ្លងកាត់ការខិតខំប្រឹងប្រែងអស់រយៈពេលជាងមួយឆ្នាំ ក្នុងការងារស្រាវជ្រាវ ចងក្រង រឿងរ៉ាវប្រវត្តិជាច្រើន ក្រៅពីប្រវត្តិនៃប្រាសាទ សៀវភៅមានកំរាសជាង៣០០ទំព័រ បានរំលេចនូវរឿងរ៉ាវជាច្រើន សម្រាប់អ្នកអាន រួមមានប្រពៃណី ទំនៀមទម្លាប់ ជីវភាពរស់នៅ ផលប្រយោជន៍នៃព្រៃឈើ ទឹក មធ្យោបាយដឹកជញ្ជូនថ្មនាសម័យបុរាណ បូករួមជាមួយហេតុផលជាច្រើន ដែលទេសចរគួរតែមកទស្សនាខេត្តសៀមរាប និងព្រឹត្តិការណ៍សំខាន់ៗ ដែលបានកើតមានលើទឹកដីប្រាសាទមួយនេះ រួមជាមួយភាពរីកចម្រើននៃសម័យបច្ចុប្បន្នផង។ អ្នកអាននឹងទទួលបានចំណេះដឹងពីរឿងរ៉ាវជាច្រើននៅតំបន់ប្រវត្តិសាស្ត្រអង្គរ ក្រៅពីប្រវត្តិនៃប្រាសាទបុរាណ ខណៈសៀវភៅដែលត្រៀមចេញជាផ្លូវការនេះ ការមានការគាំទ្រយ៉ាងច្រើនពីសំណាក់មិត្តអ្នកអាន។
លោក សែតកៅ ហ្វីលីព ប្រធានសមាគមក្លឹបទេសចរណ៍សៀមរាប លើកឡើងដែរថា សៀវភៅខាងលើ ពិតជាបានបង្ហាញខ្លឹមសារសំខាន់ៗ និងសក្តានុពលជាច្រើនរបស់រមណីយដ្ឋានអង្គរ ដែលនឹងនាំឱ្យអ្នកអានស្គាល់តំបន់នេះកាន់តែច្បាស់លើសពីអ្វីដែលគាត់មើលឃើញ ដែលពីមុនគេគិតត្រឹមតែថាទៅលេងអង្គរ គឺទៅមើលថ្មប្រាសាទ។ លោករំពឹងថា សៀវភៅនេះនឹងត្រូវបោះពុម្ពផ្សាយជាអន្តរសាភា ដើម្បីជាការផ្សព្វផ្សាយឱ្យបានកាន់តែទូលាយទៅកាន់អ្នកទេសចរបរទេសដែលចង់ឈ្វេងយល់បន្ថែមអំពីតំបន់រមណីយដ្ឋានអង្គរ។ សៀមរាប ជាប៉ូលទេសចរណ៍ដ៏សំខាន់របស់កម្ពុជា ក្នុងនោះឧទ្យានអង្គរ ដែលជារមណីយដ្ឋានវប្បធម៌ ប្រវត្តិសាស្ត្រដ៏ធំរបស់មនុស្សជាតិ បានដើរតួយ៉ាងសំខាន់នៅក្នុងការទាក់ទាញអ្នកទេសចរចម្រុះជាតិសាសន៍មកទស្សនាកម្សាន្តរាប់លាននាក់ក្នុងមួយឆ្នាំៗ។
លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌ នៃអាជ្ញាធរជាតិអប្សរា បានបញ្ជាក់ថា សៀវភៅ “លើសពីអង្គរ” ជាចំណែកមួយដែលបានរៀបរាបពីការពិតនៅក្នុងតំបន់អង្គរ ប៉ុន្តែបើនិយាយអំពីរតនសម្បត្តិនៃតំបន់រមណីយដ្ឋាននេះ មានច្រើនរាប់មិនអស់។ ព្រោះរមណីដ្ឋានអង្គរ ក្រៅពីជាកន្លែងកម្សាន្ត ទីនេះក៏ជាកន្លែងព្យាបាលសុខភាពទាំងផ្លូវកាយ និងផ្លូវចិត្ត ហើយទីនេះក៏ជាមជ្ឈមណ្ឌលសិក្សាស្រាវជ្រាវមិនចេះរីងស្ងួតដែរ។ អ្វីដែលអង្គរមាន គេអាចសរសេរយកមកចងក្រងជាសៀវភៅ “លើសពីអង្គរ” បែបនេះជាច្រើនភាគបន្តបន្ទាប់ក៏មិនអស់ដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
