នៅថ្ងៃទី២៧ ខែកុម្ភៈ ឆ្នាំ២០២៥នេះ រដ្ឋលេខាធិការដ្ឋានអាកាសចរស៊ីវិល សហការជាមួយអាជ្ញាធរខេត្តសៀមរាប និងអង្គភាពស្ថាប័នពាក់ព័ន្ធ បានធ្វើលំហាត់សមយុទ្ធទ្រង់ទ្រាយធំក្រោមប្រធានបទ “យន្តហោះធ្លាក់នៅក្នុងអាកាសយានដ្ឋាន” ដើម្បីធ្វើការហ្វឹកហ្វឺន និងសាកល្បងសមត្ថភាពពីគ្រប់អ្នកពាក់ព័ន្ធក្នុងការឆ្លើយតបទាន់ពេលវេលា រហ័ស និងមានលក្ខណៈត្រឹមត្រូវ ជួយសង្គ្រោះជនរងគ្រោះពេលមានគ្រោះមហន្តរាយ និងឧបទ្ទវហេតុគ្រោះថ្នាក់យន្តហោះដោយប្រកាសណាមួយ។
ឯកឧត្តម ជា អូន រដ្ឋលេខាធិការ និងជាអ្នកនាំពាក្យអាកាសចរស៊ីវិល បានបញ្ជាក់ថា សមយុទ្ធនេះ គឺដើម្បីសាកល្បងផែនការសង្គ្រោះបន្ទាន់របស់អាកាសយានដ្ឋាន និងវាយតម្លៃសមត្ថភាពប្រតិបត្តិការរបស់ខ្លួន ក្នុងទំនាក់ទំនងក្នុងពេលកើតហេតុជាក់ស្តែង។ សាកល្បងនីតិវិធីក្នុងការហៅទំនាក់ទំនងទូរសព្ទ និងហ្វ្រេកង់ប្រើប្រាស់ពេលមានគ្រោះអាសន្ន និងសហការក្នុងការឆ្លើយតបរបស់ភ្នាក់ងារខាងក្នុង និងក្រៅអាកាសយានដ្ឋាន។ សាកល្បងការឆ្លើយតបវេជ្ជសាស្ត្រទាំងភ្នាក់ងារខាងក្នុង និងក្រៅអាកាសយានដ្ឋាន និងសាកល្បងក្នុងការទំនាក់ទំនងទីបញ្ជាការចល័ត និងមជ្ឈមណ្ឌលសហប្រតិបត្តិការគ្រប់គ្រងគ្រោះមហន្តរាយ។
ឯកឧត្តម ជា អូន បញ្ជាក់ថា សមយុទ្ធនេះ ធ្វើឡើងស្របតាមគោលការណ៍របស់អង្គការអាកាសចរណ៍អន្តរជាតិ ដែលតម្រូវឱ្យគ្រប់អាកាសយានដ្ឋានអន្តរជាតិ ធ្វើរយៈពេល២ឆ្នាំម្ដង។ ចំពោះសមយុទ្ធនាពេលនេះដែរ វាក៏ជាឱកាសធ្វើឱ្យក្រុមហ៊ុនអាកាសចរអន្តរជាតិធំៗមានទំនុកចិត្ត ក្នុងការហោះដឹកភ្ញៀវទេសចរមកកាន់ប្រទេសកម្ពុជា ជាពិសេសខេត្តសៀមរាប។ ដូច្នេះទាក់ទងសុវត្ថិភាព សន្តិសុខអាកាសចរ បើសិនជាយើងពុំធ្វើលំហាត់សមយុទ្ធជាភស្តុតាងឱ្យបានត្រឹមត្រូវទេនោះ ខាងក្រុមហ៊ុនអាកាសចរអន្តរជាតិធំៗ គេមិនហ៊ានចុះចត នៅព្រលានយន្តហោះយើងឡើយ ខណៈដែលបច្ចុប្បន្នមានអ្នកដំណើរចូលមកកាន់ខេត្តសៀមរាប តាមរយៈអាកាសយានដ្ឋានអន្តរជាតិសៀមរាបអង្គរ ក្នុង១ថ្ងៃមានប្រមាណ ៦.០០០នាក់៕
ព័ត៌មានជាតិ ថ្មីៗ
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
