ក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានស្រុកអង្គរធំ ខេត្ដសៀមរាប នៅព្រឹកថ្ងៃទី២៨ ខែកុម្ភ: ឆ្នាំ២០២៥នេះ ឯកឧត្ដម នាយឧត្ដមសេនីយ៍ ឃុន វុធ រដ្ឋលេខាធិការក្រសួងការពារជាតិ និងជាប្រធានក្រុមការងារ បានជំរុញឱ្យក្រុមការងារទាំងអស់ ពង្រឹង និងលើកកម្ពស់ប្រសិទ្ធភាពក្នុងការបំពេញការងារឱ្យបានទាន់វេលា យល់ឱ្យច្បាស់ពីតួនាទីភារកិច្ចដែលត្រូវបំពេញ ធ្វើយ៉ាងណាលើកកម្ពស់ប្រសិទ្ធភាពការងារឱ្យកាន់តែប្រសើរឡើង។
ឯកឧត្តមមានប្រសាសន៍ថា ការបង្កើតក្រុមការងាររាជរដ្ឋាភិបាលចុះមូលដ្ឋានគួបផ្សំជាមួយថ្នាក់ជាតិ និងថ្នាក់ក្រោមជាតិ គឺដើម្បីរួមគ្នាធ្វើកិច្ចការងារមូលដ្ឋាន ជាពិសេសប្រមូលសំណូមពររបស់ប្រជាពលរដ្ឋ និងរកមធ្យោបាយដោះស្រាយបញ្ហាឱ្យបានលឿន។ ជាមួយគ្នានេះ សូមសំណូមពរដល់សមាជិកសមាជិកាក្រុមការងារទាំងអស់ ត្រូវបន្ដការខិតខំប្រឹងប្រែងបន្ថែមទៀត ដើម្បីឱ្យទូទាំងមូលដ្ឋានស្រុកអង្គរធំ កាន់តែរីកចម្រើន លូតលាស់ និងអភិវឌ្ឍលើគ្រប់វិស័យ។
បើតាមលោក ពៅ ប៊ុនធឿន អភិបាលស្រុកអង្គរធំ លើកឡើងថា ក្រុមការងាររាជរដ្ឋាភិបាលចុះមូលដ្ឋានស្រុកអង្គរធំ បានចូលរួមចំណែកយ៉ាងសកម្ម និងការខិតខំប្រឹងប្រែងក្នុងការបំពេញតួនាទី ភារកិច្ច ដោះស្រាយ ដើម្បីឆ្លើយតបទៅនឹងសំណូមពរប្រជាពលរដ្ឋ សម្រាប់បម្រើបុព្វហេតុនៃការអភិវឌ្ឍ និងរីកចម្រើនលើគ្រប់វិស័យ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
