ភូមិចំនួន៣ រួមមានភូមិគោកចាន់ ភូមិឧទ័យ និងភូមិគោកកណ្ដាល ក្នុងឃុំល្វាក្រាំង ស្រុកវ៉ារិន ខេត្តសៀមរាប ត្រូវបានមន្ត្រីជំនាញនៃមន្ទីររៀបចំដែនដី និងអាជ្ញាធរស្រុក ប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ ដែលពិធីប្រកាសនេះធ្វើឡើង នៅថ្ងៃទី២៨ ខែកុម្ភៈ ឆ្នាំ២០២៥នេះ ក្នុងបរិវេណវត្តប្រាសាទច័ន្ទគីរី។
លោក ប៊ូ ជុំសម្បត្តិ អនុប្រធានមន្ទីររៀបចំដែនដីខេត្ត បង្ហាញថា ការផ្សព្វផ្សាយណាពេលនេះ គឺជាការផ្សព្វផ្សាយជាសាធារណៈនូវដំណើរការចុះបញ្ជីដីធ្លីមានលក្ខណៈជាប្រព័ន្ធ រួមមាន ការកំណត់ព្រំដី ការវាស់វែង និងការវិនិច្ឆ័យ ដែលអនុវត្តផ្ទាល់ដោយមន្ត្រីជំនាញ សហការជាមួយអាជ្ញាធរមូលដ្ឋាន និងអ្នកដែលពាក់ព័ន្ធ។ ការចុះបញ្ជីដីធ្លីជាប្រព័ន្ធនេះ ជាការចុះកំណត់ព្រំដី វាស់វែង និងវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដី ហើយធ្វើការផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដី ហើយផ្តល់សិទ្ធិចំពោះតែក្បាលដីណាដែលមិនមានទំនាស់ ឬមិនពាក់ព័ន្ធនឹងដីរដ្ឋ។
លោកអនុប្រធានមន្ទីរ បានស្នើឱ្យប្រជាពលរដ្ឋទាំងអស់ដែលជាម្ចាស់ដី ឬអ្នកកាន់កាប់ដី ត្រូវចូលរួមបោះបង្គោលព្រំដី ដោយមានការឯកភាពព្រំរវាងអ្នកជាប់ព្រំ ហើយត្រូវត្រៀមឯកសារពាក់ព័ន្ធឱ្យបានរួចរាល់ និងគ្រប់គ្រាន់ ដើម្បីឱ្យមន្រ្តីជំនាញចុះបញ្ជីធ្វើបាននូវភាពសុក្រឹត្យ ត្រឹមត្រូវទាំងលក្ខណៈបច្ចេកទេស និងទាំងលក្ខណៈច្បាប់។ ក្នុងនោះក៏សូមឱ្យអាជ្ញាធរ និងប្រជាពលរដ្ឋដែលបានចូលរួមប្រជុំ ជួយផ្សព្វផ្សាយបន្តដល់បងប្អូនដែលពុំបានចូលរួមឱ្យពួកគាត់បានដឹង និងចូលរួមបោះបង្គោលព្រំដីផងដែរ។
លោក ធិននី វិធូរ អភិបាលស្រុកវ៉ារិន មានប្រសាសន៍ថា ការចុះបញ្ជីដីធ្លីមានលក្ខណៈជាប្រព័ន្ធ ពិតជាមានសារៈសំខាន់ណាស់ សម្រាប់បងប្អូនប្រជាពលរដ្ឋជាម្ចាស់ក្បាលដី ក្នុងការទទួលបានបណ្ណកម្មសិទ្ធិស្របច្បាប់គ្រប់ៗគ្នា ហើយការចុះបញ្ជីដីធ្លីនេះ គឺចុះបញ្ជីទាំងដីឯកជន និងដីរដ្ឋ ដែលអនុវត្តទៅតាមនីតិវិធី និងបច្ចេកវិទ្យាទំនើប មានតម្លាភាព និងការទទួលខុសត្រូវ ដែលប្រទេសជឿនលឿនលើពិភពលោកកំពុងអនុវត្តហើយមានប្រសិទ្ធភាពលើការគ្រប់គ្រងដីធ្លី។ ក្នុងនោះក៏សូមឱ្យបងប្អូន ចូលរួមសហការឱ្យបានល្អជាមួយមន្ត្រីជំនាញ ដើម្បីជួយពន្លឿនការចុះវាស់វែងដីធ្លីឱ្យបានលឿនជូនបងប្អូន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
