នៅព្រឹកថ្ងៃទី២៧ ខែកុម្ភៈ ឆ្នាំ២០២៥នេះ សមាគមរ៉ូតតារី (Rotary) 3690 ប្រចាំតំបន់កូយ៉ាងសាម និងអង្គការឡូធើសវើល (Lotus World) បានសហការជាមួយអាជ្ញាធរស្រុកអង្គរជុំ បានរៀបចំពិធីសម្ពោធអគារសិក្សាថ្មីមួយខ្នង មាន២បន្ទប់ នៅសាលាបឋមសិក្សាគោកស្នួល ស្ថិតនៅក្នុងភូមិគោកស្នួល ឃុំគោកដូង ស្រុកអង្គរជុំ ខេត្តសៀមរាប ក្រោមអធិបតីភាពលោក ភន់ សុខុម អភិបាលស្រុកអង្គរជុំ, លោក អ៊ី ជុងជីន នាយកសមាគមរ៉ូតតារី (Rotary) ដោយមានការអញ្ជើញចូលរួមពីប្រធានការិយាល័យអប់រំ យុវជន និងកីឡាស្រុក អាជ្ញាធរឃុំ កងកម្លាំងប្រដាប់អាវុធ ប្រជាពលរដ្ឋ និងសិស្សានុសិស្សជាច្រើនរូប។
ថ្លែងក្នុងពីធីនេះ លោក អ៊ី ជុងជីន នាយកប្រចាំតំបន់ និងជាតំណាងសមាគមន រ៉ូតតារី (Rotary) បានបង្ហាញនូវក្ដីពេញចិត្តក្នុងការជួយឧបត្ថម្ភជាជំនួយផ្សេងៗមកកាន់សិស្សានុសិស្សនៅក្នុងសាលាបឋមសិក្សាគោកស្នួលនេះ ក្រោយពេលលោកបានឃើញសមិទ្ធផលអគារថ្មីមួយខ្នងនាពេលនេះ បានបញ្ជាក់ថា ការស្វែងរកជំនួយរបស់ក្រុមការងារនៃសមាគមរ៉ូតារី ពិតជាស័ក្ដិសម និងបានឆ្លើយតបយ៉ាងពិតប្រាកដនូវសេចក្ដីត្រូវការរបស់សិស្សានុសិស្ស លោកគ្រូ អ្នកគ្រូ នៅក្នុងសាលាមួយនេះពិតមែន។ លោក អ៊ី ជុងជីន សង្ឃឹមថាអគារថ្មីមួយខ្នង២បន្ទប់នេះ នឹងបានជួយសម្រួល និងដោះស្រាយនូវបញ្ហាមួយចំនួនដែលសាលាបឋមសិក្សាគោកស្នួលជួបប្រទះនាពេលកន្លងមក មិនតែប៉ុណ្ណោះលោករំពឹងថាសិ្សស្សានុសិស្សទាំងអស់នៅក្នុងសាលានេះនឹងអាចសិក្សាប្រកបដោយផាសុខភាព ដោយទទួលបានលទ្ធផលល្អនាពេលអនាគត។
ព័ត៌មានជាតិ ថ្មីៗ
មានប្រសាសន៍នាឱកាសនោះ លោក ភន់ សុខុម អភិបាលស្រុកអង្គរជុំ បានបង្ហាញនូវសេចក្ដីសោមនស្សរីករាយ និងការស្វាគមន៍យ៉ាងកក់ក្តៅចំពោះវត្តមាននៃសមាគមកូយ៉ាងសាម និងអង្គការឡូធើសវើល ដែលបានខិតខំប្រឹងប្រែង និងយកចិត្តទុកដាក់ចំពោះសិស្សានុសិស្សក្នុងមូលដ្ឋាននេះ តាមរយៈការកៀរគរសប្បុរសជនកូរ៉េខាងត្បូងជាច្រើន មកជួយអភិវឌ្ឍហេដ្ឋារចនាសម្ព័ន្ធនានាក្នុងសាលាបឋមសិក្សាគោកស្នួលនាពេលនេះ។
លោកអភិបាលស្រុកអង្គរជុំ បន្តថា តាមរយៈជំនួយដ៏ថ្លៃថ្លានេះ លោករំពឹង និងជឿជាក់ថា ការជួយឱ្យមានការបោះជំហានទៅមុខនៃវិស័យអប់រំ និងកំពុងឆ្លើយតបទៅនឹងតម្រូវការនៃការអភិវឌ្ឍន៍សង្គម សេដ្ឋកិច្ច នាពេលបច្ចុប្បន្ន និងអនាគត ហើយសង្ឃឹមថា លោកគ្រូ អ្នកគ្រូ និងក្មួយៗសិស្សានុសិស្សទាំងអស់ ខិតខំយកចិត្តទុកដាក់ក្នុងការបង្រៀន និងការរៀនសូត្រដែលនាំឱ្យសិស្សអាចទទួលបាននូវវិជ្ជាសម្បទា បំណិត សម្បទា ចរិយាសម្បទា និងកាយសម្បទារឹងមាំ ស័ក្តិសមជាធនធានមនុស្សដ៏រឹងមាំរបស់កម្ពុជា ប្រកបដោយចំណេះដឹង ជំនាញ និងភាពថ្លៃថ្នូរ។
គួរជម្រាបដែរថា នៅក្នុងពិធីនេះក៏មានការចែកជូននូវសម្ភារៈសិក្សាមួយចំនួនដល់សិស្សានុសិស្សប្រមាណជិត២០០នាក់ និងបានជួយពិនិត្យ និងផ្ដល់ជូននូវឧបករណ៍ជំនួយការស្ដាប់ដល់លោកតា លោកយាយ ចំនួន៤នាក់ និងសិស្ស១នាក់ផងដែរ។
អត្ថបទ និងរូបភាព៖ ហេង វន្នី
កែសម្រួល៖ ហាំ ម៉េងហួត
