នៅព្រឹកថ្ងៃទី២៦ ខែកុម្ភៈ ឆ្នាំ ២០២៥ នេះ លោក សុខ ថុល អភិបាលរងខេត្តសៀមរាប បានដឹកនាំកិច្ចប្រជុំគណៈកម្មាធិការសម្របសម្រួលបច្ចេកទេសរបស់ក្រុមប្រឹក្សាខេត្តសៀមរាប អាណត្តិទី៤ លើកទី១ ក្នុងឆ្នាំ២០២៥ ដោយមានការអញ្ជើញចូលរួមពី ឯកឧត្តម លោក លោកស្រី សមាជិក សមាជិកាក្រុមប្រឹក្សាខេត្ត នាយក/នាយករងរដ្ឋបាលខេត្ត ប្រធានការិយាល័យជំនាញពាក់ព័ន្ធ លោក លោកស្រី អភិបាលក្រុង/ស្រុក រួមមាន តំណាងអាជ្ញាធរជាតិអប្សារា តំណាងគ្រឺះស្ថានអង្គរ និងមន្រ្តីជំនាញពាក់ព័ន្ធផងដែរ។
ក្នុងកិច្ចប្រជុំនេះ គឺដើម្បីពិនិត្យ និងអនុម័តលើសេចក្តីព្រាងរបៀបវារៈដូចជា ៖១-ពិនិត្យ ពិភាក្សា និងអនុម័តលើសេចក្តីព្រាងប្រតិទិនកិច្ចប្រជុំគណៈកម្មាធិការសម្របសម្រួល បច្ចេកទេសរបស់ក្រុមប្រឹក្សាខេត្ត អាណត្តិទី៤ ឆ្នាំ២០២៥។ ២-ផ្សព្វផ្សាយសេចក្តីណែនាំស្តីពីការអនុវត្តសេចក្ដីសម្រេចអង្គសន្និបាត បូកសរុបលទ្ធផលការងារ ប្រចាំឆ្នាំ២០២៤ និងលើកទិសដៅការងារឆ្នាំ២០២៥” របស់រដ្ឋបាលខេត្តសៀមរាប។ ៣-ពិនិត្យ និងធ្វើបច្ចុប្បន្នភាព នៃការដោះស្រាយសំណួរ-សំណូមពរ ដែលបានលើកឡើង ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត កាលពីឆ្នាំ២០១៩-២០២០- ២០២២ និងឆ្នាំ២០២៣។
ព័ត៌មានជាតិ ថ្មីៗ
លោក សុខ ថុល អភិបាលរងខេត្តសៀមរាប មានប្រសាសន៍លើកឡើងថា កិច្ចប្រជុំនេះ ជាកិច្ចប្រជុំដ៏មានសារៈសំខាន់ ដើម្បីឆ្លងយោបល់ និងអនុម័តលើសេចក្តីព្រាងខាងលើ មុននឹងដាក់ជូនក្នុងសម័យប្រជុំសាមញ្ញារបស់ក្រុមប្រឹក្សាខេត្ត ពិនិត្យ និងអនុម័ត ដូចនេះ អ្នកពាក់ព័ន្ធទាំងអស់ ត្រូវយកចិត្តទុកដាក់ពិនិត្យ ពិភាក្សា និងផ្តល់យោបល់កែលម្អ ធ្វើយ៉ាងណាឲ្យសេចក្តីព្រាងនេះបានល្អប្រសើរ មានប្រសិទ្ធភាព ស៊ីសង្វាក់គ្នាជាមួយនឹងផែនការថវិកាទៅតាមវិស័យនីមួយៗ។
ក្នុងនោះដែរ លោកសុខ ថុល ក៏បានណែនាំដល់កងកម្លាំងប្រដាប់អាវុធគ្រប់ថ្នាក់ត្រូវបន្តយកចិត្តទុកដាក់ខ្ពស់ ក្នុងការរក្សាសន្តិសុខ សុវត្ថិភាព សណ្តាប់ធ្នាប់សាធរណៈ និងស្ថេរភាពនយោបាយនៅក្នុងភូមិសាស្ត្រខេត្ត ឱ្យកាន់តែល្អប្រសើរថែមទៀត ដើម្បីបន្តកិច្ចការអភិវឌ្ឍខេត្ត និងសេចក្តីសុខ របស់ប្រជាពលរដ្ឋ ជាពិសេសមន្ត្រីគ្រប់លំដាប់ថ្នាក់ត្រូវបន្តខិតខំប្រឹងប្រែងឱ្យសកម្មភាពថែមទៀត ចំពោះការដោះស្រាយបញ្ហា សំណូមពរនានា ដែលប្រជាពលរដ្ឋកំពុងតែជួបប្រទះ។
លោក សុខថុល បានមានប្រសាសន៍បញ្ជាក់ ឱ្យអាជ្ញាធរ ពាក់ព័ន្ធត្រូវតែខិតខំប្រើសេវា ឱ្យកាន់តែលឿនរហ័ស និងមានការជឿទុកចិត្ត លុបបំបាត់នូវភាពអសកម្មនានា កុំធ្វើឱ្យមានការថ្នាំងថ្នាក់ចិត្តពីសំណាក់ប្រជាពលរដ្ឋនៅមូលដ្ឋាន។ ជាមួយគ្នានេះផងដែរ លោកអភិបាលរងខេត្ត ក៏បានស្នើដល់រដ្ឋបាលក្រុង/ស្រុក មន្ទីរ/អង្គភាព កងកម្លាំងប្រដាប់អាវុធគ្រប់ថ្នាក់ទាំងអស់ បន្តក្តាប់សភាពការណ៍ទូទៅ ការងារសន្តិសុខ និងការងារភេវរកម្ម បង្កើនកិច្ចប្រតិបត្តិការល្បាតពួនស្ទាក់ ២៤ម៉ោង/២៤ម៉ោង បង្កើតក្រុមការងារប្រចាំការ(Hotline)ត្រៀមកម្លាំងអន្តរាគមន៍ទាន់ពេលវេលា សហការល្អជាមួយសមត្ថកិច្ចពាក់ព័ន្ធ និងប្រមូលផ្តុំកម្លាំងសរុប រក្សាសន្តិសុខ ពង្រឹងកិច្ចការពារធានាសន្តិសុខសុវត្ថិភាពជូនគណៈប្រតិភូជាន់ខ្ពស់ជាតិ អន្តរជាតិ ភ្ញៀវទេសចរ វិនិយោគិន និងព្រឹត្តិការណ៍នានាដែលរៀបចំនៅក្នុងខេត្ត។ បន្តពង្រឹង និងអនុវត្តគោលនយោបាយ “ភូមិ ឃុំ សង្កាត់ មានសុវត្ថិភាព” និងចលនាប្រឡងប្រណាំង ដោយពិនិត្យវាយតម្លៃទៅលើសូចនាករសំខាន់ៗ បន្តពង្រឹងការគ្រប់គ្រងប្រជាការពារ និងចលនាមហាជន ឱ្យចូលរួមរាយការណ៍ពីភាពអសកម្ម និងបទល្មើសនានានៅតាមមូលដ្ឋាន ក្រោមទិសស្លោក “ប្រជាពលរដ្ឋម្នាក់ជាអ្នកផ្តល់ព័ត៌មានម្នាក់” ដើម្បីចាត់វិធានការបង្ការ ទប់ស្កាត់ បង្ក្រាបបទល្មើស និងឆ្លើយតបទាន់ពេលវេលា ។ បន្តយកចិត្តទុកដាក់ជំរុញការងារកំណែទម្រង់រដ្ឋបាលសាធារណៈ និងការងារគណនេយ្យភាព-សង្គម ។បន្តពង្រឹងការផ្តល់សេវារដ្ឋបាល តាមរយៈច្រកចេញចូលតែមួយនៅថ្នាក់ខេត្ត ក្រុង ស្រុក និងយន្តការច្រកចេញចូលតែមួយឃុំ សង្កាត់ឱ្យបានល្អប្រសើរ ឆាប់រហ័ស។ បន្តផ្សព្វផ្សាយ និងបណ្តុះបណ្តាលប្រជាកសិករអំពីបច្ចេកទេសកសិកម្ម ជំរុញការងារបង្កបង្កើនផលិតផលកសិកម្ម។ បន្តពង្រឹងការផ្តល់សេវាសុខាភិបាលប្រកបដោយគុណភាព តាមរយៈការពង្រឹងក្រមសីលធម៌វិជ្ជាជីវៈ និងអភិវឌ្ឍន៍សមត្ថភាពបន្ថែមរបស់គ្រូពេទ្យ៕
អត្ថបទ៖លោក ទ្រា ពន្លឺ
កែសម្រួល៖លោកស្រី សូ ស៊ីមាន
