សាសនិកឥស្លាមខេត្តសៀមរាប នារសៀលថ្ងៃទី២៣ ខែកុម្ភៈ ឆ្នាំ២០២៥នេះ បានរៀបចំពិធីស្រហាន់អាហ្គាម៉ា ដើម្បីអបអរ និងទទួលស្វាគមន៍ការមកដល់ខែរ៉ាម៉ាដន រួមនឹងការឡើងសូត្រព្រះគម្ពីរ រអាល់គូរអាន ការសម្តែងចម្រៀងជាក្រុមៗរបស់ប្អូនៗសិស្សានុសិស្ស ដែលពិធីនេះមានការអញ្ជើញចូលរួមពី ឯកឧត្តម អែល សៀត សមាជិកក្រុមប្រឹក្សាខេត្ត និងប្រធានសាសនាឥស្លាមខេត្តស្តីទី រួមនឹងអាជ្ញាធរមូលដ្ឋាន បងប្អូនខ្មែរឥស្លាម និងសិស្សានុសិស្សជាច្រើន។
ឯកឧត្តម អែល សៀត លើកឡើងថា ការធ្វើពិធីអបអរសាទរស្រហាន់អាហ្គាម៉ា និងទទួលស្វាគមន៍ការមកដល់ខែរ៉ម៉ាឌន គឺអាចមកដល់ដើមខែមីនាខាងមុខនេះ សម្រាប់អ្នកកាន់សាសនាឥស្លាម។ ខែរ៉ាម៉ាឌន ជាខែដ៏ពិសិដ្ឋរបស់ឥស្លាមគ្រប់ទិសទីនៅលើសកលលោក ដែលកាន់សាសនាឥស្លាមគ្រប់រូបឱ្យអនុវត្តន៍ទាំងចាស់ទាំងក្មេង ប្រុសស្រី សូម្បីតែកុមារក៏ត្រូវរៀនបួស តាមលទ្ធភាពរបស់ខ្លួនផងដែរ។ ដើម្បីឱ្យបួសបានពេញលេញ អ្នកបួសត្រូវតមពីការនិយាយស្តីអាក្រក់ ធ្វើអំពើមិនគប្បីប៉ះពាល់ដល់អារម្មណ៍អ្នកដទៃ ពិសេសគឺដាក់ខ្លួនឱ្យស្មើភាព ចៀសវាងពីភាពរើសអើង ឬច្រណែនឈ្នានីស ចំពោះសមាជិកក្នុងសហគមន៍ខ្លួន ដើម្បីបង្កើតបាននូវបរិយាកាសសហការគ្នា និងជំរុញឱ្យប្រព្រឹត្តអំពើល្អ និងទប់ស្កាត់មិនឱ្យធ្វើអំពើអាក្រក់។
ឯកឧត្តម អែល សៀត មានប្រសាសន៍ថា គ្រប់កម្មវិធីនានាដែលយើងបានជួបជុំគ្នានេះដែរ កើតទៅបានដោយសារប្រទេសជាតិយើងមានសុខសន្តិភាព ដែលកម្ពុជាទទួលបានដោយសារគុណបំណាច់ដ៏ធំធេង មិនអាចកាត់ថ្លៃបានរបស់ សម្តេចតេជោ ហ៊ុន សែន អតីតនាយករដ្ឋមន្ត្រី និងបន្តមក សម្តេចធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន ខណៈកម្ពុជាក៏មានអ្នកកាន់សាសនាឥស្លាម បាននឹងកំពុងរួមរស់រួមសុខរួមទុក្ខ ក្រោមដំបូលសន្តិភាពតែមួយ ជាមួយសាសនាព្រះពុទ្ធ ដែលជាសាសនារបស់រដ្ឋ។
ឯកឧត្តមបន្តថា រាជរដ្ឋាភិបាលតែងតែយកចិត្តទុកដាក់ ផ្តល់សេរីភាពជំនឿសាសនាយ៉ាងទូលំទូលាយដល់ប្រជាជនទូទៅ ដោយឈរលើមូលដ្ឋាននៃការពង្រឹងសុខដុមនីយកម្មរវាងសាសនិក នៃគ្រប់និកាយសាសនា ប្រឆាំងរាល់ទង្វើរើសអើង សំដៅទប់ស្កាត់ការយកសាសនាទៅធ្វើអាជីវកម្ម ដែលអាចបង្កវិបត្តិសាសនានៅកម្ពុជា។ ជាមួយនេះ សេរីភាពនៃការគោរពសាសនាឥស្លាម ត្រូវបានរាជរដ្ឋាភិបាលបើកទូលាយដល់បងប្អូនឥស្លាម ដូចជាសិស្សនិស្សិតឥស្លាមអាចស្លៀកសម្លៀកបំពាក់ប្រពៃណីឥស្លាម នៅតាមគ្រឹះស្ថានសិក្សាគ្រប់កម្រិត បងប្អូនជាស្ត្រីអាចទទូរក្បាល និងបុរសអាចពាក់កាតឹបថតរូបសម្រាប់ប្រើប្រាស់លើឯកសាររដ្ឋបាល ដូចជា លិខិតឆ្លងដែន អត្តសញ្ញាណបណ្ណ។ល។ ជាពិសេសការបើកសិទ្ធិទូលំទូលាយឱ្យទទួលយក ការប្រតិបត្តិតាមជំនឿសាសនារបស់ខ្លួន ទំនៀមទម្លាប់ ប្រពៃណី និងការអនុញ្ញាតឱ្យទទួលបានការងារក្នុងជួររដ្ឋាភិបាល ក៏ដូចជារដ្ឋសភា ព្រឹទ្ធសភា និងតាមអង្គភាព ក្រសួង មន្ទីរនានាផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
