នៅរសៀលថ្ងៃទី២៥ ខែកុម្ភៈ ឆ្នាំ២០២៥ម្សិលមិញនេះ ឯកឧត្តម កៅ អុីមរ៉ន រដ្ឋលេខាធិការក្រសួងព័ត៌មាន បានអញ្ជើញជួបសំណេះសំណាលជាមួយថ្នាក់ដឹកនាំ និងមន្ត្រីរាជការនៃមន្ទីរព័ត៌មានខេត្តសៀមរាប ក្នុងន័យដើម្បីស្វែងយកពីការងារប្រចាំថ្ងៃរបស់មន្ទីរ លើការងារផ្សព្វផ្សាយ ជាពិសេសដើម្បីពង្រឹងប្រសិទ្ធភាព និងគុណភាពការងារវិស័យព័ត៌មាន ដោយមានការចូលរួមពី ឯកឧត្តម លីវ សុខុន ទីប្រឹក្សាក្រសួងព័ត៌មានផង។
មានប្រសាសន៍ក្នុងឱកាសនោះ ឯកឧត្តម កៅ អុីមរ៉ន បានថ្លែងកោតសរសើរ និងវាយតម្លៃខ្ពស់ ចំពោះលទ្ធផលការងារដែលមន្ទីរព័ត៌មានខេត្តសៀមរាប អនុវត្តបានកន្លងមក ទោះបីជួបការលំបាកខ្វះខាតក្តី តែបានប្រឹងប្រែងរួមគ្នាជម្នះគ្រប់ការលំបាក ដែលបង្ហាញពីការលះបង់គ្រប់បែបយ៉ាងដើម្បីវិស័យព័ត៌មាន និងសោតទស្សន៍ ក្នុងខេត្តកាន់តែមានការរីកចម្រើន។ ជាមួយនោះ ឯកឧត្តមក៏បានលើកទឹកចិត្តដល់ថ្នាក់ដឹកនាំ និងមន្ត្រីរាជការនៃមន្ទីរព័ត៌មានខេត្តសៀមរាប សូមបន្តកិច្ចខិតខំប្រឹងប្រែងអនុវត្តតួនាទីភារកិច្ចរបស់ខ្លួនស្របតាមក្រមសីលធម៌ វិជ្ជាជីវៈ រក្សាសាមគ្គីភាពផ្ទៃក្នុង សហការស្អិតរមួតជាមួយបណ្តាមន្ទីរអង្គភាពនានា និងត្រូវមានភាពសកម្ម បុរេសកម្ម អន្ដរសកម្មលើការងារវិស័យព័ត៌មានក្នុងខេត្ត ព្រោះថាមន្ទីរព័ត៌មានជាសេនាធិការរបស់គណបញ្ជាការឯកភាពរដ្ឋបាលខេត្ដ លើការងារគ្រប់គ្រងព័ត៌មាននៅក្នុងខេត្ដ។
ឯកឧត្តមរដ្ឋលេខាធិកា មានប្រសាសន៍ថា ចំណុចត្រូវយកចិត្ដទុកដាក់ គឺបន្តការផលិត និងផ្សព្វផ្សាយព័ត៌មានវិជ្ជមានអំពីកិច្ចខិតខំប្រឹងប្រែងរបស់រដ្ឋបាលខេត្តក្រុងស្រុក និងមន្ទីរអង្គភាព អំពីសក្តានុពល និងសមិទ្ធផលនានាដែលខេត្តសម្រេចបាន និងបន្តពង្រឹងការងារទប់ស្កាត់ ឆ្លើយតប និងបន្សាបព័ត៌មានក្លែងក្លាយ ព្រមទាំងការងារគ្រប់គ្រងសាធារណមតិ តាមរយៈយន្តការគន្លឺះគឺ ភាពសកម្ម បុរេសកម្ម អន្ដរសកម្ម ព្រោះថាកិច្ចការព័ត៌មាន និងសាធារណមតិ ជាកិច្ចការងារចាំបាច់ និងសំខាន់ណាស់។
ឯកឧត្តម មានប្រសាសន៍ទៀតថា បច្ចុប្បន្ននេះលទ្ធភាពនៃការបញ្ចេញព័ត៌មានក្លែងក្លាយកាន់តែសម្បូរបែប ហេតុនេះត្រូវបន្តក្តាប់ឱ្យបាន ក្នុងករណីមានការចុះផ្សាយណាមួយខុសពីការពិត ដើម្បីឈានទៅលុបបំបាត់ និងចូលរួមក្នុងការប្រយុទ្ធប្រឆាំង ពាក់ព័ន្ធនឹងព័ត៌មានក្លែងក្លាយ។ ជាមួយគ្នានោះ ឯកឧត្តម ក៏បាននាំយកនូវប្រសាសន៍ផ្តាំផ្ញើរបស់ ឯកឧត្តមរដ្ឋមន្ត្រីក្រសួងព័ត៌មាន ដែលជានិច្ចកាលឯកឧត្តម តែងតែជំរុញលើកទឹកចិត្តដល់ថ្នាក់ដឹកនាំ និងមន្ត្រីនៃមន្ទីរព័ត៌មានរាជធានីខេត្ត តាមដាន និងក្តាប់ឱ្យបានដើម្បីធានាបាននូវសន្តិសុខព័ត៌មានតាមរយៈ ៣ចំណុចសំខាន់ៗ គឺទី១.សិទ្ធិទទួលបានព័ត៌មាន ទី២.ព័ត៌មានប្រកបដោយគុណភាពឆ្លងការផ្ទៀងផ្ទាត់ និងទី៣.សុវត្ថិភាពព័ត៌មាន ពោលគឺប្រជាពលរដ្ឋទទួលបានព័ត៌មានពិតមិនមែនជាព័ត៌មានក្លែងក្លាយ និងមិនមែនជាព័ត៌មានញុះញង់ ដែលមិនបង្កឱ្យមានអសន្តិសុខនៅក្នុងសង្គមជាតិ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
