ក្នុងជំនួបសម្ដែងការគួរសម និងពិភាក្សាការងាររវាងរដ្ឋបាលខេត្តសៀមរាប ដឹកនាំដោយ ឯកឧត្តម ប្រាក់ សោភ័ណ អភិបាលខេត្ត ជាមួយគណៈប្រតិភូចិន ដឹកនាំដោយ ឯកឧត្តម យីន លី សមាជិកការិយាល័យនយោបាយមជ្ឈិមបក្សកុម្មុយនីស្តចិន និងជាលេខាធិការគណៈកម្មាធិការបក្សកុម្មុយនីស្តចិន ទីក្រុងប៉េកាំង នាល្ងាចថ្ងៃទី២៣ ខែកុម្ភៈ ឆ្នាំ២០២៥នេះ ភាគីខេត្តសៀមរាប និងទីក្រុងប៉េកាំង បានបង្ហាញការប្ដេជ្ញាចិត្តលើការពង្រឹងទំនាក់ទំនងកិច្ចសហប្រតិបត្តិការលើបណ្ដាវិស័យអាទិភាព ជាពិសេសការជំរុញវិស័យទេសចរណ៍ខេត្តក្រុងទាំងពីរ ឱ្យបានទៅវិញទៅមកកាន់តែល្អប្រសើរ។
ឯកឧត្តម ប្រាក់ សោភ័ណ អភិបាលខេត្ត មានប្រសាសន៍ថា ការមកដល់ប្រទេសកម្ពុជា ពិសេសខេត្តសៀមរាប របស់គណៈប្រតិភូជាន់ខ្ពស់គណបក្សកុម្មុយនីស្តចិននាពេលនេះ ជាការឆ្លុះបញ្ចាំងឱ្យឃើញនូវការយកចិត្តទុកដាក់របស់ប្រមុខរដ្ឋាភិបាលប្រទេសទាំងពីរ ពិសេសកិច្ចសហការដ៏ល្អរវាងរដ្ឋបាលខេត្តសៀមរាប និងទីក្រុងប៉េកាំង ក្នុងការពង្រឹង និងពង្រីកចំណងមិត្តភាព ស្របតាមស្មារតី មិត្តដែកថែប និងសហគមន៍វាសនារួមកម្ពុជា-ចិន ប្រកបដោយភាពស៊ីជម្រៅ និងភាពជាក់ស្ដែង ក៏ដូចជាក្របខណ្ឌកិច្ចសហប្រតិបត្តិការត្បូងពេជ្ររវាងកម្ពុជា និងចិន ដែលផ្ដោតលើវិស័យអាទិភាពចំនួន៦ ក្នុងនោះរួមបញ្ចូលទាំងការផ្លាស់ប្តូរប្រជាជន និងប្រជាជន។
ឯកឧត្តមអភិបាលខេត្ត សង្ឃឹមថា តាមរយៈទស្សនកិច្ចរបស់គណៈប្រតិភូនាពេលនេះដែរ នឹងធ្វើឱ្យចំណងមិត្តភាពរវាងខេត្តក្រុងទាំងពីរកាន់តែល្អប្រសើរឡើង ពីសេសការជំរុញនូវកំណើនភ្ញៀវទេសចរ ខណៈដែលខេត្តសៀមរាប ក៏ដូចជាក្រុងប៉េកាំង គឺជាខេត្តក្រុងដែលសម្បូរទៅដោយសម្បត្តិវប្បធម៌ដូចគ្នា ដែលជាន្នូលដ៏សំខាន់ក្នុងការជួយជំរុញដល់កំណើតសេដ្ឋកិច្ចសម្រាប់ប្រទេសទាំង២ ព្រោះវាគឺប្រភពចំណូលសេដ្ឋកិច្ចដែលមិនចេះរីងស្រួត។ ហើយសម្រាប់ខេត្តសៀមរាប ប្ដេជ្ញា នឹងជំរុញវិស័យទេសចរណ៍នេះឱ្យមានការផ្លាស់ប្ដូរគ្នាទៅវិញទៅមក ធ្វើយ៉ាងណាឱ្យមានកំណើនភ្ញៀវទេសចរកើនឡើងសម្រាប់ខេត្តក្រុងទាំង២ផងដែរ។
ឯកឧត្តម យីន លី បានលើកឡើងថា រយៈពេលជាច្រើនឆ្នាំកន្លងទៅនេះ ក្រោមកិច្ចទំនាក់ទំនងល្អរវាងប្រមុខថ្នាក់ដឹកនាំប្រទេសទាំង២ បានធ្វើឱ្យកិច្ចសហប្រតិបត្តិការ និងចំណងមិត្តភាពក៏តែល្អប្រសើរឡើងជាបន្តបន្ទាប់។ ជាក់ស្ដែងក្នុងឱកាសដែល សម្ដេចធិបតី ហ៊ុន ម៉ាណែត ចូលកាន់តំណែងជានាយករដ្ឋមន្ត្រី សម្ដេចបានជ្រើសរើសយកប្រទេសចិន ជាប្រទេសទី១ ដើម្បីបំពេញទស្សនកិច្ច ដែលនេះសបញ្ជាក់ឱ្យឃើញពីស្មារតីមិត្តដែកថែប កម្ពុជា-ចិនផងដែរ។
ក្នុងនាមភាគីចិន ឯកឧត្តម យីន លី បានបង្ហាញការគាំទ្រលើការជំរុញវត្តមានភ្ញៀវទេសចរពីគ្នាទៅវិញទៅមកនេះ ហើយសង្ឃឹមថានាពេលខាងមុខ ខេត្តសៀមរាប និងទីក្រុងប៉េកាំង នឹងមានជើងហោះហើរត្រង់ ដែលជាកត្តាមួយដ៏សំខាន់ក្នុងការជំរុញកំណើនភ្ញៀវទេសចរឱ្យមកទស្សនានៅតំបន់ទេសចរណ៍ខេត្តក្រុងទាំងពីរ។ ហើយឯកឧត្តម ក៏បានប្ដេជ្ញាចិត្ត ក្នុងការចូលរួមជំរុញការផ្លាស់ប្ដូរវប្បធម៌រវាងខេត្តក្រុងនៃប្រទេសទាំង២ឱ្យបានកាន់តែល្អប្រសើរ ជាមួយនឹងការជំរុញវត្តមានភ្ញៀវទេសចរចិន ឱ្យមកទស្សនាប្រទេសកម្ពុជា ជាពិសេសខេត្តសៀមរាប ឱ្យមានចំនួនកាន់តែច្រើនឡើងបន្ថែមទៀតផងដែរ៕
អត្ថបទ៖ លោក អ៊ុន ណារាជ្យ
រូបភាព៖ លោក ធន់ ពូថេ
