សមាគមសហគ្រិនស្ដ្រីកម្ពុជាខេត្តសៀមរាប នារសៀលថ្ងៃទី០៤ ខែមីនា ឆ្នាំ២០២៥នេះ បានរៀបចំវេទិកាស្ដ្រីដើម្បីអ្នកទាំងអស់គ្នា និងអបអរសាទរខួបលើកទី១១៤ ទិវាអន្តរជាតិនារី ៨មីនា ឆ្នាំ២០២៥ ក្រោមប្រធានបទ “ស្ដ្រីលើវិថីអ្នកជំនួញសម័យAI” ក្រោមអធិបតីភាព លោកជំទាវ ទុយ ជិ ប្រាក់សោភ័ណ អនុប្រធានគណៈកម្មាធិការកាកបាទក្រហមកម្ពុជាខេត្តសៀមរាប និងជាប្រធានកិត្តិយសសមាគមកាយឫទ្ធិនារីកម្ពុជាខេត្ត ដោយពិធីនេះក៏មានការរួមពី លោក សុខ ថុល អភិបាលរងខេត្ដ ព្រមទាំងសមាជិកជាច្រើនរូប។
លោកជំទាវ ជា សុកនួន ប្រធានសមាគមសហគ្រិនស្ត្រីកម្ពុជាខេត្ដសៀមរាប បានឱ្យដឹងថា ជារៀងរាល់ឆ្នាំសមាគម តែងធ្វើការចែករំលែកចំណេះដឹងជាសាធារណៈពីវាគ្មិនដែលមានចំណេះដឹង ចំណេះធ្វើ បទពិសោធនៅក្នុងគ្រួសារ ការងារអាជីវកម្ម ក្នុងគោលបំណងលើកកម្ពស់ភាពជាអ្នកដឹកនាំ គ្រប់គ្រងអាជីវកម្ម ការបែងចែកតុល្យភាពការងារ និងគ្រួសារ ការចូលរួមចំណែកអភិវឌ្ឍសង្គម ពិសេសការធ្វើទីផ្សារតាមបែបប្រព័ន្ធបច្ចេកវិទ្យាទំនើប។
លោកជំទាវបន្តថា សមាគមក៏តែងចងចាំនូវវីរៈតស៊ូរបស់បុព្វវីរៈនារីក្នុងការទាមទារសិទ្ធិ ដែលធ្វើឱ្យពួកគាត់មិនអាចភ្លេចប្រារព្ធទិវាអន្តរជាតិនារី ៨មិនា នេះឡើយ ដើម្បីឆ្លើយតបទៅនឹងគោលនយោបាយ វិធានការសំខាន់ៗរបស់អង្គការសហប្រជាជាតិ គឺទី១.ការលើកកម្ពស់សមភាពយេនឌ័រ ទី២.ការពង្រឹងនិងបង្កើនភាពអង់អាចរបស់ស្រ្តី ទី៣. ស្រ្តីនិងការអប់រំបណ្តុះបណ្តាល ទី៤.ស្រ្តីក្នុងការធ្វើសេចក្តីសម្រេចចិត្ត និងសិទ្ធិអំណាច ទី៥. ស្រ្តីនិងបច្ចេកវិទ្យាឌីជីថល ទី៦.ការលើកកម្ពស់សីលធម៌សង្គមនិងតម្លៃស្រ្តី និងទី៧.បណ្តុះភាពជាអ្នកដឹកនាំ ពិសេសការចូលរួមអភិវឌ្ឍសង្គមជាតិ តាមរយៈការប្រកបអាជីវកម្មដោយស្មោះត្រង់ និងការចូលរួមលះបង់ធ្វើសកម្មភាពមនុស្សធម៌សង្គម។
លោកជំទាវ ទុយ ជិ ប្រាក់ សោភ័ណ ប្រធានកិត្តិយសសមាគមកាយឫទ្ធិនារីកម្ពុជាខេត្ត មានប្រសាសន៍ថា វេទិកានៅថ្ងៃនេះ មានន័យសម្រាប់ការលើកកម្ពស់ស្ត្រី និងជាអាទិភាពក្នុងសង្គមបច្ចុប្បន្ន ព្រោះមានសារៈសំខាន់ដល់ការអភិវឌ្ឍជំនាញ បច្ចេកវិទ្យា និងចាប់ផ្តើមអាជីវកម្ម ដើម្បីឱ្យស្ត្រីកម្ពុជា អាចបន្តបង្កើនសមត្ថភាព ក្លាយជាអ្នកដឹកនាំអាជីវកម្ម និងអភិវឌ្ឍសង្គមជាតិ។ លោកជំទាវ ក៏សូមថ្លែងនូវការកោតសសើរចំពោះសមាគមសហគ្រិនស្ត្រីកម្ពុជាខេត្ត ជាពិសេសក្រុមប្រឹក្សាភិបាលទាំងអស់ ដែលបានបំពេញការងារយ៉ាងសម្បើមក្នុងការជួយគាំទ្រ និងការពារស្រ្តី ជាពិសេសស្ត្រីជាសហគ្រិន តាមរយៈការបណ្តុះបណ្តាលជំនាញនានា ការប្រឹក្សាយោបល់ ការកសាងបណ្តាញធុរកិច្ច ក្នុងការប្រមូលបញ្ហាប្រឈមនានា ដើម្បីនាំយកបញ្ហាប្រឈម ឬសំឡេងស្ត្រី ទៅជូនស្ថាប័ន ឬអ្នកធ្វើគោលនយោបាយពាក់ព័ន្ធនានា ក្នុងការស្វែងរកដំណោះស្រាយ ក៏ដូចជាការរៀបចំកម្មវិធីផ្សេងៗ ដើម្បីឆ្លើយតបទៅនឹងតម្រូវការរបស់សហគ្រិនស្ត្រី។
លោកជំទាវក៏បានលើកឡើងថា សហគ្រិនស្ត្រីកម្ពុជា បានធ្វើសកម្មភាពយ៉ាងច្រើន ជាពិសេសការពង្រឹង និងពង្រីកកិច្ចសហប្រតិបត្តិ ការជាមួយដៃគូពាក់ព័ន្ធនានា។ ក្នុងនោះសមាគម ក៏ជាដៃគូដែលមិនអាចខ្វះបាន និងជាដៃគូយុទ្ធសាស្ត្រយូរអង្វែងផងដែរ សម្រាប់កិច្ចការសហគ្រិនភាពរបស់យើង ដើម្បីឱ្យមានចីរភាព។
លោកជំទាវ បានលើកទឹកចិត្តដល់ក្រុមប្រឹក្សាឱ្យខិតខំប្រឹងប្រែង ដើម្បីស្ត្រីយើង ជាពិសេសស្ត្រីជាសហគ្រិន ពីព្រោះពួកគេបានចូលរួមចំណែកយ៉ាងសកម្ម ក្នុងការកសាងសេដ្ឋកិច្ចជាតិ៕
អត្ថបទ និងរូបភាព៖ លោក ឈិត សាវី, មុី សុខារិទ្ធ
កែសម្រួល៖ លោក អ៊ុន ណារាជ្យ
