ភូមិចំនួន៨ ស្ថិតក្នុងឃុំឬស្សីលក ស្រុកជីក្រែង ខេត្តសៀមរាប រួមមាន៖ សំរោងកញ្ចោច ភូមិបឹង ភូមិស្ពានតូច ភូមិយាង ភូមិឬស្សីលក ភូមិទទឹងថ្ងៃ ភូមិក្រូច និងភូមិត្រពាំងរុន ត្រូវបានមន្ត្រីជំនាញនៃមន្ទីររៀបចំដែនដី សហការជាមួយរដ្ឋបាលស្រុក ប្រកាសកំណត់តំបន់វិនិច្ឆ័យសម្រាប់ធ្វើការចុះបញ្ជីដីធ្លីមានលក្ខណៈជាប្រព័ន្ធ នៅថ្ងៃទី០៥ ខែមីនា ឆ្នាំ២០២៥នេះ នៅក្នុងបរិវេណវត្តខ្សាច់ ក្រោមវត្តមាន លោក ធូ ចន្ថុល អភិបាលរងស្រុក និង លោក ហ៊ី សាយ ប្រធានមន្ទីររៀបចំដែនដីខេត្ត។
លោក ហ៊ី សាយ បានឱ្យដឹងថា ការចុះបញ្ជីដីធ្លីមានលក្ខណៈជាប្រព័ន្ធ ត្រូវមានការបោះបង្គោល កំណត់ព្រំដី និងឯកសារពាក់ព័ន្ធមួយចំនួនទៀត ដូចជា អត្តសញ្ញាណបណ្ណ សៀវភៅគ្រួសារ សៀវភៅស្នាក់នៅ សេចក្តីចម្លងសំបុត្របញ្ជាក់កំណើត សេចក្តីចម្លងសំបុត្រអាពាហ៍ពិពាហ៍ សេចក្តីចម្លងសំបុត្រមរណភាពលិខិតបញ្ជាក់ភាពនៅលីវ។ មួយទៀត គឺឯកសារបណ្ណសម្គាល់សិទ្ធិកាន់កាប់ប្រើប្រាស់ដីធ្លី បណ្ណសម្គាល់សិទ្ធិកាន់កាប់អចលនវត្ថុ បង្កាន់ដៃទទួលពាក្យ លិខិតផ្ទេរសិទ្ធិដីធ្លី លិខិតអំណោយផ្តាច់ លិខិតបញ្ជាក់ ឬលិខិតអះអាងប្រវត្តិដី និងលិខិតផ្សេងៗ។
លោកប្រធានមន្ទីរបន្តថា ចំពោះការចុះបញ្ជីត្រូវអនុវត្តតាមនីតិវិធី ៥ដំណាក់កាល ទី១.កំណត់តំបន់ធ្វើការវិនិច្ឆ័យ និងដំណើរការផ្សព្វផ្សាយពីការចុះបញ្ជីដីធ្លីមានលក្ខណៈជាប្រព័ន្ធ ,ទី២.ប្រតិបត្តិការបច្ចេកទេស ចុះកំណត់ព្រំ វាស់វែង និងវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដី ,ទី៣.ការបិទផ្សាយជាសាធារណៈនូវឯកសារនៃការវិនិច្ឆ័យ មានរយៈពេល១៥ថ្ងៃ ដើម្បីទុកលទ្ធភាពឱ្យម្ចាស់ដី និងអ្នកពាក់ព័ន្ធ ធ្វើការផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដីរបស់ខ្លួន ព្រមទាំងធ្វើការតវ៉ាក្នុងករណីមានការខុសឆ្គង ទី៤.ការសម្រេចលើឯកសារវិនិច្ឆ័យ ធ្វើរបាយការណ៍ពីលទ្ធផលនៃការបិទផ្សាយជាសាធារណៈនូវឯកសារនៃការវិនិច្ឆ័យ ដើម្បីពិនិត្យ និងសម្រេចលើការផ្ដល់សិទ្ធិចំពោះក្បាលដីណា ដែលមិនមានទំនាស់ ឬមិនពាក់ព័ន្ធនឹងដីរដ្ឋ និងទី៥ជាដំណាក់កាលចេញវិញ្ញាបនបត្រនិងប្រគល់ជូនម្ចាស់ដី។
លោក ធូ ចន្ថុល អភិបាលរងស្រុកជីក្រែង បានណែនាំដល់ប្រជាពលរដ្ឋដែលមានដីនៅក្នុងភូមិទាំង៨ ត្រូវចូលរួមសហការជាមួយក្រុមការងារវាស់វែង និងចង្អុលបង្ហាញទីតាំងក្បាលដី ព្រំដី និងបោះបង្គោលច្បាស់លាស់ និងមានការឯកភាពគ្នា ចៀសវាងមានជម្លោះ ដើម្បីទទួលមកវិញនូវវិញ្ញាបនបត្រសម្គាល់ម្ចាស់អចលនវត្ថុទាំងអស់គ្នា។ លោកថា ដីរបស់បងប្អូនពលរដ្ឋដែលបានចុះបញ្ជីដីធ្លីមានលក្ខណៈជាប្រព័ន្ធនេះ គឺទទួលបានអត្ថប្រយោជន៍ច្រើនណាស់ក្នុង ការលើកស្ទួយកម្រិតជីវភាពគ្រួសារ កាត់បន្ថយទំនាស់ដីធ្លី ធានាសុវត្ថិភាពក្នុងការកាន់កាប់ដីធ្លី ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដដែលត្រូវបានការពារដោយច្បាប់ និងធានាដោយរដ្ឋ ដែលអាចបង្កបង្កើនផល និងប្រកបរបរផ្សេងៗលើដីរបស់ខ្លួនដោយគ្មានការព្រួយបារម្ភ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
