ការដេញថ្លៃគម្រោងផ្លូវបេតុងអាមេ១ខ្សែ ស្ថិតនៅភូមិធ្លកអណ្ដូង សង្កាត់ស្លក្រាម ក្រុងសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី០៦ ខែមីនា ឆ្នាំ២០២៥ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរក្រុង គណៈកម្មការលទ្ធកម្មសង្កាត់ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ខៀវ សត ប្រធានគណៈកម្មាធិការលទ្ធកម្មសង្កាត់ បានឱ្យដឹងថា ចំពោះមូលនិធិសង្កាត់ឆ្នាំ២០២៥នេះ សង្កាត់បានដាក់ដេញថ្លៃគម្រោងសាងសង់ផ្លូវបេតុងអាមេ ១ខ្សែ ប្រវែង ៦១៧ម៉ែត្រ ទទឹង៦ម៉ែត្រ កម្រាស់បេតុង០.១៥ម៉ែត្រ មានចាក់ក្រួសធម្មជាតិស្មារផ្លូវទាំងសងខាង ពង្រីកផ្កាត្រកួនដើមផ្លូវ ១១ម៉ែត្រគុណនឹង៣ម៉ែត្រ ស្លាកគម្រោងចំនួន១ ស្លាកចរាចរ១ និងសូឡាបំភ្លឺ៤០ដើម ស្ថិតក្នុងតម្លៃប៉ាន់ស្មាន ៤៦៩ ៤៨៦ ៤៨៩រៀល ដោយមានក្រុមហ៊ុនចំនួន៣ បានដាក់សំណើ។ ជាលទ្ធផល បានទៅលើក្រុមហ៊ុន រតនៈធីតា ក្នុងតម្លៃ ៤៦៨ ០០០ ០០០រៀល។
ជាមួយនឹងការទទួលបានសិទ្ធិនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
