ក្នុងឱកាសដឹកនាំកិច្ចប្រជុំសាមញ្ញលើកទី១០ របស់ក្រុមប្រឹក្សាខេត្តសៀមរាប អាណត្តិទី៤ នៅព្រឹកថ្ងៃទី០៥ ខែមីនា ឆ្នាំ២០២៥នេះ ឯកឧត្តម លី សំរិទ្ធ ប្រធានក្រុមប្រឹក្សាខេត្ត ជំរុញដល់អាជ្ញាធរក្រុងស្រុក ត្រូវយកចិត្តទុកដាក់ពិនិត្យតាមដានលើករណីមានមន្ត្រីឃុំសង្កាត់ណា ដែលទារថ្លៃសេវាខុសច្បាប់លើការធ្វើអត្រានុកូលដ្ឋានជូនប្រជាពលរដ្ឋ ខណៈដែលប្រជាពលរដ្ឋពួកគាត់កំពុងមានតម្រូវការចាំបាច់ក្នុងការធ្វើឯកសារសម្រាប់ការចុះបញ្ជីដីធ្លី។
ឯកឧត្តម លី សំរិទ្ធ បានណែនាំដល់រដ្ឋបាលក្រុងស្រុក ត្រូវចុះធ្វើការតាមដាន ពិនិត្យនូវបញ្ហាទាំងនេះ នៅតាមបណ្តាឃុំសង្កាត់ក្នុងមូលដ្ឋានខ្លួន ក្នុងការតម្រង់ទិសប្រកបដោយគតិយុត្ត តាមការណែនាំរបស់រាជរដ្ឋាភិបាល ក្នុងការធ្វើសំបុត្រអត្រានុកូលដ្ឋានជូនប្រជាពលរដ្ឋដោយឥតគិតថ្លៃ។ ពិតណាស់ បើមានករណីនេះ វានឹងធ្វើឱ្យប្រជាពលរដ្ឋមិនពេញចិត្តចំពោះអាជ្ញាធរមូលដ្ឋាន ព្រោះមិនបានគិតពីទុក្ខលំបាករបស់ប្រជាពលរដ្ឋ ដែលនេះវានឹងធ្វើឱ្យប៉ះពាល់ដល់គោលការណ៍របស់រាជរដ្ឋាភិបាលទៀតផង។
ក្នុងឱកាសនោះដែរ ឯកឧត្តម ក៏បានជំរុញដល់គណៈកម្មការរៀបចំគម្រោងរបស់រដ្ឋបាលខេត្ត ត្រូវអនុវត្តឱ្យបានជាប្រចាំលើការងាររបស់គណៈកម្មការរបស់ខ្លួន។ ជាមួយឯកឧត្តម បានស្នើដល់រដ្ឋបាលសាលាខេត្ត បង្កើតគណៈកម្មការត្រួតពិនិត្យនូវរាល់កិច្ចការងារ និងសកម្មភាពរបស់គណៈអភិបាលខេត្ត ដែលអនុវត្តបាន ព្រមទាំងសូមឱ្យមន្តី្រធ្វើរបាយការណ៍ ធ្វើការត្រួតពិនិត្យឡើងវិញនូវរាល់ខ្លឹមសារ អក្ខរាវិរុទ្ធ និងតួលេខនៅក្នុងរបាយការណ៍ មុននឹងដាក់ឆ្លងកិច្ចប្រជុំរបស់ក្រុមប្រឹក្សាខេត្ត។
លោក អុឺង គឹមលាង អភិបាលរងខេត្ត បានធ្វើការវាយតម្លៃខ្ពស់ ចំពោះលទ្ធផលដែលរដ្ឋបាលខេត្ត អនុវត្តបានប្រចាំខែកុម្ភៈ ព្រមទាំងបានធ្វើការណែនាំបន្ថែមដល់រដ្ឋបាលក្រុងស្រុក ក្នុងការអនុវត្តទៅតាមទិសដៅនៃអង្គសន្និបាតរបស់រដ្ឋបាលខេត្ត ដែលបានដាក់ចេញក្នុងឆ្នាំ២០២៥ ឱ្យសម្រេចបានជោគជ័យ។ កត្តាសំខាន់ត្រូវយកចិត្តទុកដាក់លើការងារសន្តិសុខ សណ្តាប់ ធ្នាប់សាធារណៈ បំបាត់ឱ្យបានក្រុមក្មេងទំនើង ករណីគ្រឿងញៀន និងគោរពច្បាប់ចរាចរណ៍ផ្លូវគោក ព្រមទាំងបង្រ្កាបឱ្យខាងតែបានចំពោះបទល្មើសព្រៃឈើ និងជលផល និងគ្រប់គ្រងឱ្យបាននូវព្រៃលិចទឹកបឹងទន្លេសាប(តំបន់៣) ហើយចំពោះបុគ្គលណានៅតែបំពានរានដីព្រៃលិចទឹកតំបន់បី ត្រូវតែធ្វើការផ្តន្ទាទោសទៅតាមច្បាប់៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
