នាយកប្រតិបត្តិ វេទិកានៃអង្គការមិនមែនរដ្ឋាភិបាលស្តីពីកម្ពុ លើកថា ផែនការយុទ្ធសាស្ត្រអភិវឌ្ឍន៍ជាតិ គឺជាឧបករណ៍គោលនយោបាយទូទៅរបស់រាជរដ្ឋាភិបាលកម្ពុជាដែលត្រូវបានបង្កើតឡើងជាលើកដំបូងនៅក្នុងឆ្នាំ២០០៦-២០១០ ដោយប្រមូលផ្តុំគោលនយោបាយសំខាន់ៗ របស់រដ្ឋាភិបាល ក្នុងនោះរួមមានការអភិវឌ្ឍន៍សេដ្ឋកិច្ច, ការអប់រំ, សុខាភិបាល, កសិកម្ម, ផែនការដីធ្លី និងបរិស្ថាន ព្រមទាំងវិស័យជាច្រើនទៀត។
ទន្ទឹមនឹងនោះ មន្រ្តីអង្គការសង្គមស៊ីវិលសង្គេតឃើញថា ការអនុវត្តផែនការយុទ្ធសាស្រ្តអភិវឌ្ឍន៍ជាតិរយៈពេល ៥ឆ្នាំរបស់រាជរដ្ឋាភិបាលកម្ពុជាកន្លងមកនេះ ទទួលបានភាពជោគជ័យច្រើន ប៉ុន្តែក៍នៅមានបញ្ហាមួយចំនួនដែលមិនទាន់អនុវត្តទៅបានល្អ ដូចជាពាក់ព័ន្ធករណីដីធ្លីជាដើម។
ថ្លែងនៅក្នុងសិក្ខាសាលាថ្នាក់ក្រោមជាតិស្តីពី ការប្រមូលធាតុចូល របស់អង្គការសង្គមស៊ីវិល ដើម្បីចូលរួមចំណែកក្នុងការរៀបចំផែនការយុទ្ធសាស្រ្តអភិវឌ្ឍន៍ជាតិ ២០១៩-២០២៣ នៅខេត្តសៀមរាប ព្រឹកថ្ងៃទី១៥ ខែសីហា ឆ្នំា២០១៨នេះ លោក តឹក វណ្ណារ៉ា នាយកប្រតិបត្តិ វេទិកានៃអង្គការមិនមែនរដ្ឋាភិបាលស្តីពីកម្ពុជា បានមានប្រសាសន៍ថា រាជរដ្ឋាភិបាលកម្ពុជា ក្រោមកិច្ចសម្របសម្រួល របស់ក្រសួងផែនការបច្ចុប្បន្ននេះ បាននឹងកំពុងរៀបចំផែនការយុទ្ធសាស្រ្តជាតិ របស់ខ្លួនសម្រាប់រយៈពេល ៥ឆ្នំាបន្តគឺចាប់ពីឆ្នាំ២០១៩-២០២៣ ដើម្បីឲ្យការរៀបចំផែនការប្រកបដោយបរិយាប័ន្ន ត្រូវតែមានការចូលរួមពីគ្រប់ភាគីពាក់ព័ន្ធ។ សម្រាប់ក្រុមអង្គការសង្គមស៊ីវិលនៅថ្ងៃនេះ បានជួបប្រជុំគ្នា ប្រមូលធាតុចូល ក្នុងគោលបំណង ចូលរួមធ្វើឲ្យផែនការយុទ្ធសាស្រ្តនេះ ឆ្លើយតបទៅនឹងសេចក្តីត្រូវការរបស់ប្រជាជន និងសង្គមទាំងមូលគឺការអភិវឌ្ឍន៍សេដ្ឋកិច្ច សង្គម និងការការពារបរិស្ថានជាពិសេស គឺការគ្រប់គ្រងដីធ្លី។ ក្នុងន័យនេះអង្គការសង្គមស៊ីវិល ក៏មានតួនាទីយ៉ាងសំខាន់ផងដែរ ក្នុងការចូលរួមចំណែករៀបចំផែនការយុទ្ធសាស្រ្តអភិវឌ្ឍន៍ជាតិទៅតាមវិស័យដែលខ្លួនកំពុងតែធ្វើ។
ព័ត៌មានជាតិ ថ្មីៗ
មានប្រសាសន៍ក្នុងពិធីនេះ លោកស្រី លឹម សូលីន នាយិកាប្រចាំប្រទេសនៃអង្គការ Oxfam បានថ្លែងថា អង្គការលោកស្រី នឹងនៅតែបន្តចូលរួមអភិវឌ្ឍសេដ្ឋកិច្ច និងសង្គមជាមួយរាជរដ្ឋាភិបាល ហើយអង្គការOxfam និងបន្តផ្តល់បច្ចេកទេស និងថវិកាដល់អង្គការដៃគូដែលបានចុះធ្វើសកម្មភាពផ្ទាល់នៅមូលដ្ឋាន។
លោកស្រីបានបន្តថា រៀបចំផែនការយុទ្ធសាស្រ្តអភិវឌ្ឍន៍ជាតិនេះ អង្គការសង្គមស៊ីវិលគឺត្រូវតែចូលរួមឱ្យបានសកម្មជាមួយរដ្ឋាភិបាល ព្រោះថា អង្គការសង្គមស៊ីវិល គឺជាផ្នែកមួយ ដែលបានធ្វើការជាប់ជាមួយប្រជាពលរដ្ឋនៅមូលដ្ឋាន ដឹងពីអ្វីដែលប្រជាពលរដ្ឋនៅប្រឈមខ្វះខាត និងការអនុវត្តរបស់រាជរដ្ឋាភិបាលកន្លងមកមិនទាន់បានល្អ ហើយរៀបចំធាតុចូលទំាងនោះដាក់ជូនទៅស្ថាប័ន ក្រសួងជំនាញ ដើម្បីពិនិត្យ និងដាក់ចូលទៅក្នុងផែនការយុទ្ធសាស្រ្តអភិវឌ្ឍន៍ជាតិ២០១៩-២០២៣ ដើម្បីអនុវត្តបន្ត៕
អត្ថបទ និង រូបថត ៖ លោក ទ្រា ពន្លឺ និងលោកជា ស្រស់
កែសម្រួលអត្ថបទ ៖ លោក សេង ផល្លី
